ជាតិ
អាជ្ញាធរអប្សរាប្រើពេល៤ខែដើម្បីជួសជុលប្រាសាទដំរីក្រាបដែលកំពុងទ្រុឌទ្រោម
× ភ្នំពេញ៖ អាជ្ញាធរជាតិអប្សរា នឹងជួសជុលប្រាសាទដំរីក្រាបនៅលើភ្នំគូលែន ដែលរងការខូតខាតខ្លាំងដោយសារទឹកភ្លៀង និងរុក្ខជាតិដុះពីលើ ដើម្បីសង្គ្រោះប្រាសាទឱ្យផុតពីគ្រោះថ្នាក់ និងការបែកបាក់កាន់តែខ្លាំង។ តាមទំព័រហ្វេសប៊ុករបស់អាជ្ញាធរជាតិអប្សរា កាលពីថ្ងៃទី៣០ ខែកក្កដា គម្រោងអភិរក្ស និងជួសជុលប្រាសាទនេះ មានរយៈពេល៤ខែ ដោយចាប់ផ្តើមពីថ្ងៃទី២០ ខែសីហា និងបញ្ចប់នៅថ្ងៃទី៣១ ខែធ្នូ ឆ្នាំ២០២០។
តាមអាជ្ញាធរជាតិអប្សរា បុគ្គលិកជំនាញ នៃនាយកដ្ឋានអភិរក្សប្រាសាទក្រៅឧទ្យានអង្គរ នឹងពង្រឹងខឿនដែលពុកផុយនៅជុំវិញតួប៉ម ជួសជុលខ្លោងទ្វារខាងកើត រៀបផ្ជិត ពង្រឹងស្នាមប្រេះតូចធំនៅលើជញ្ជាំង ដំបូល និងជួសជុលដំបូលដែលពុកផុយ។
ប្រាសាទដំរីក្រាប មានទីតាំងស្ថិតនៅភូមិអន្លង់វែងធំ ឃុំខ្នងភ្នំ ស្រុកស្វាយលើ ខេត្តសៀមរាប និងត្រូវបានសាងសង់ឡើង ក្នុងរជ្ជព្រះបាទជ័យវរ្ម័នទី២ (គ.ស.៨០២-៨៥០)។ ប្រាសាទនេះ គឺជាប្រាសាទឥដ្ឋ ដែលមានប៉ម៣ សង់លើខឿនតែមួយ មានកំពែងព័ទ្ធជុំវិញ ហើយក៏ជាប្រាសាទមួយ ក្នុងចំណោមប្រាសាទជាច្រើន ដែលស្ថិតក្នុងរចនាបថគូលែន៕
Tag:
ទេសចរណ៍
ភ្នំគូលែន
© រក្សាសិទ្ធិដោយ thmeythmey.com