COVID-19
អន្តរជាតិ
នៅអ៊ីរ៉ង់ មនុស្សម្នាក់ស្លាប់រៀងរាល់៧នាទីដោយសារ COVID-19 ប្រជាជនអ៊ីរ៉ង់ពាក់ម៉ាស់នៅទីសាធារណៈ។_រូបភាព៖_AFP
× នៅអ៊ីរ៉ង់ មនុស្សម្នាក់ស្លាប់រៀងរាល់៧នាទី ដោយសារជំងឺ COVID-19 ។ នេះបើតាមការផ្សាយរបស់ទូរទស្សន៍រដ្ឋដែលដកស្រង់ដោយទីភ្នាក់ងារព័ត៌មាន Reuters ។ បើតាមទិន្ន័យរបស់ក្រសួងសុខាភិបាល មានមនុស្សស្លាប់ចំនួន២១៥នាក់ ក្នុងរយៈពេល២៤ម៉ោងនៅថ្ងៃទី៣ សីហាប៉ុណ្ណោះ។
ទូរទស្សន៍រដ្ឋអ៊ីរ៉ង់ បានស្រង់សម្តីលោក Sima Sadat អ្នកនាំពាក្យក្រសួងសុខាភិបាលអ៊ីរ៉ង់ ដោយបង្ហាញថា នៅថ្ងៃទី៣ ខែសីហា មានមនុស្សស្លាប់ដោយសារ COVID-19 ចំនួន២១៥នាក់ ដែលធ្វើឲ្យអ្នកស្លាប់ដោយសារ COVID-19 នៅអ៊ីរ៉ង់កើនឡើងដល់១៧,៤០៥នាក់ និងចំនួនឆ្លងកើនឡើងដល់ ៣១២,០៣៥ករណី។ ទំនងចង់បង្ហាញពីភាពធ្ងន់ធ្ងរនៃការឆ្លងជំងឺនេះ មន្ត្រីអ៊ីរ៉ង់ដដែលបញ្ជាក់ថា ករណីស្លាប់កើតមានច្រើនរៀងរាល់ថ្ងៃ។
ក្រសួងសុខាភិបាល តាមរយៈទូរទស្សន៍ជាតិអ៊ីរ៉ង់បានលើកឡើងថា ករណីឆ្លង និងស្លាប់គឺបណ្តាលការមិនបានធ្វើគម្លាតសុវត្ថិភាពម៉ត់ចត់ និងពាក់ម៉ាស់ឲ្យបានត្រឹមត្រូវ។
យ៉ាងណាមិញ អ្នកជំនាញមួយចំនួន សង្ស័យទៅលើសុក្រិតភាពនៃទិន្ន័យនៃចំនួនអ្នកឆ្លងនិងស្លាប់ដែលចេញដោយរដ្ឋាភិបាលអ៊ីរ៉ង់។ ជាក់ស្តែងរបាយការណ៍ចេញដោយមជ្ឈមណ្ឌលស្រាវជ្រាវរបស់រដ្ឋសភាអ៊ីរ៉ង់ បានអះអាងពីករណីឆ្លងដែលអាចមានចំនួនច្រើនជាងអ្វីដែលក្រសួងសុខាភិបាលអ៊ីរ៉ងចុះផ្សាយដល់ទៅ២ដង។ នេះយោងតាមការដកស្រង់ព័ត៌មានរបស់ទីភ្នាក់ងារព័ត៌មាន Reuters។
នាពេលបច្ចុប្បន្ននេះ ស្ថានការណ៍នៃការឆ្លងជំងឺ COVID-19 នៅអ៊ីរ៉ង់ មានសភាពធូរស្រាលធៀបជាងមុន ខណៈអាជ្ញាធរអ៊ីរ៉ង់ ក៏បានបន្ធូរបន្ថយការរឹតត្បិតតាំងពីពាក់កណ្តាលខែមេសាមកដែរ។ទោះជាយ៉ាងណាក្តីអាជ្ញាធរអ៊ីរ៉ង់បានព្រមានថាគេនឹងចេញវិធានការតឹងរឹងសារជាថ្មី បើសិនជាប្រជាជនមិនគោរពតាមបញ្ញត្តិសុខាភិបាល។ តាំងតែពីខែមុនមក រដ្ឋាភិបាលអ៊ីរ៉ង់បានតម្រូវឲ្យប្រជាជនពាក់ម៉ាស់នៅទីសាធារណៈ។
នៅថ្ងៃទី១០ សីហាខាងមុខនេះ ក្រុមការងារប្រយុទ្ធនឹងជំងឺ COVID-19 របស់អ៊ីរ៉ង់ នឹងត្រូវប្រកាសថាតើគួរអនុញ្ញាតឲ្យមានការប្រឡងចូលសកលវិទ្យាល័យនៅទូទាំងប្រទេសឫ អត់។ ការប្រឡងដែលមានសិស្សជាង១លាននាក់ចូលរួមនេះ តម្រូវឲ្យធ្វើនៅក្នុងខែសីហា។ ប៉ុន្តែនៅតាមបណ្តាញសង្គម ប្រជាជនអ៊ីរ៉ង់មួយចំនួនបានអំពាវនាវឲ្យពន្យារពេលប្រឡង៕
© រក្សាសិទ្ធិដោយ thmeythmey.com