អន្តរជាតិ
នយោបាយអន្តរជាតិ
អ្នកស្រី អ៊ុងសាន ស៊ូជី ប្រកាសឈរឈ្មោះប្រជែងក្នុងការបោះឆ្នោតខែវិច្ឆិកា
អ្នកស្រី អ៊ុងសាន ស៊ូជី មេដឹកនាំមីយ៉ាន់ម៉ា បក់ដៃទៅកាន់អ្នកគាំទ្រ ពេលទៅដល់អគារគណៈកម្មការរៀបចំការបោះឆ្នោតមីយ៉ាន់ម៉ា នៅថ្ងៃទី ៤ ខែសីហា ដើម្បីដាក់ពាក្យឈរឈ្មោះជាបេក្ខជនក្នុងការបោះឆ្នោត នាខែវិច្ឆិកា (Reuters)
×![]()
មេដឹកនាំមីយ៉ាន់ម៉ា អ្នកស្រី អ៊ុងសាន ស៊ូជី នៅថ្ងៃទី ៤ ខែសីហា បានប្រកាសជាផ្លូវការក្នុងការឈរឈ្មោះប្រជែងអាណត្តិទី២ក្នុងការបោះឆ្នោត ដែលនឹងរៀបចំឡើងនាខែវិច្ឆិកាខាងមុខ។ ការបោះឆ្នោតនេះដែរ ត្រូវបានគេមើលឃើញថាជាការពិសោធកំណែទម្រង់ប្រជាធិបតេយ្យមិនប្រាកដប្រជារបស់ប្រជាជាតិអាស៊ីអាគ្នេយ៍មួយនេះ។ 
ច្រើនទសវត្សរ៍ក្រោយការដឹកនាំរបស់របបសឹក អ្នកស្រី អ៊ុងសាន ស៊ូជី ដែលបានឈ្នះពានរង្វាន់ណូបែលសន្តិភាពសម្រាប់យុទ្ធនាការទាមទារប្រជាធិបតេយ្យ បានចូលកាន់អំណាចក្នុងឆ្នាំ២០១៦ ក្រោយយកឈ្នះភ្លូកទឹកភ្លូកដីក្នុងការបោះឆ្នោតថ្នាក់ជាតិ។ ក៏ប៉ុន្តែរដ្ឋាភិបាលអ្នកស្រី ត្រូវបានបង្ខំឲ្យចែកអំណាចជាមួយពួកយោធា។
នៅថ្ងៃទី ៤ ខែសីហា អ្នកស្រី ស៊ូជី អាយុ ៧៥ឆ្នាំ បានបក់ដៃទៅកាន់អ្នកគាំទ្រប្រមាណ៥០នាក់ នៅជាយក្រុងយ៉ាំងហ្គោន មុនពេលដាក់ពាក្យស្នើសុំដើម្បីឈរឈ្មោះជាបេក្ខជនក្នុងការបោះឆ្នោតនៅគណៈកម្មការរៀបចំការបោះឆ្នោត។ តាមការចុះផ្សាយរបស់ទីភ្នាក់ងារព័ត៌មាន Reuters អ្នកគាំទ្រខ្លះរបស់អ្នកស្រី ស៊ូជី បានពាក់ម៉ាស់ពណ៌ក្រហម ដើម្បីបង្ហាញភាពស្មោះស្ម័គ្រចំពោះបក្សសម្ព័ន្ធជាតិដើម្បីប្រជាធិបតេយ្យ (NLD) ហើយស្រែកថា៖«អ្នកម្ដាយ ស៊ូ សូមឲ្យមានសុខភាពល្អ»។
កេរ្តិ៍ឈ្មោះអ្នកស្រីលើឆាកអន្តរជាតិ ត្រូវបានធ្លាក់ចុះជាទម្ងន់ពាក់ព័ន្ធនឹងសំណុំរឿងធ្វើទុក្ខបុកម្នេញលើជនជាតិភាគតិចកាន់សាសនាឥស្លាម រ៉ូហ៊ីងយ៉ា ។ យ៉ាងណា អ្នកស្រីនៅតែទទួលការគោរពស្រលាញ់ច្រើនពីពលរដ្ឋអ្នកស្រីផ្ទាល់ ដែលភាគច្រើនជាអ្នកកាន់សាសនាព្រះពុទ្ធ។
ក្នុងឆ្នាំ ២០១៧ យុទ្ធនាការវាយបង្ក្រាបដឹកនាំដោយក្រុមយោធាមីយ៉ាន់ម៉ា បានបង្ខំឲ្យជនជាតិភាគតិចរ៉ូហ៊ីងយ៉ាជាង ៧៣ម៉ឺននាក់រត់ភៀសខ្លួនទៅតាមព្រំដែនបង់ក្លាដែស។ នៅទីនោះ ពួកគេស្នាក់អាស្រ័យនៅជំរំជនភៀសខ្លួន។
ក្រុមអ្នកស៊ើបអង្កេតរបស់អង្គការសហប្រជាជាតិ បានចេញសេចក្តីសន្និដ្ឋានថា យុទ្ធនាការយោធានេះ ត្រូវបានអនុវត្តឡើងដោយមានចេតនាប្រល័យពូជសាសន៍។ ក្នុងខែមករា អ្នកស្រី អ៊ុងសាន ស៊ូជី បានសារភាពថា ឧក្រិដ្ឋកម្មសង្គ្រាម ប្រហែលត្រូវបានប្រព្រឹត្តទៅប្រឆាំងជនជាតិភាគតិចរ៉ូហ៊ីងយ៉ា ក៏ប៉ុន្តែច្រានចោល ការធ្វើប្រល័យពូជសាសន៍ ។ ត្រង់នេះ អ្នកស្រីបកស្រាយថា ជនភៀសខ្លួនទាំងនោះ បាននិយាយពន្លើសពាក់ព័ន្ធនឹងការធ្វើទុក្ខបុកម្នេញពួកគេ។
យ៉ាងណា កាលពីខែវិច្ឆិកា ឆ្នាំ២០១៩ ប្រទេសអាហ្វ្រិក ហ្កំប៊ី បានដាក់ពាក្យបណ្ដឹងទៅកាន់តុលាការយុត្តិធម៌អន្តរជាតិ (ICJ) ដោយចោទប្រកាន់មីយ៉ាន់ម៉ាថាកំពុងធ្វើប្រល័យពូជសាសន៍ប្រឆាំងជនភាគតិចរ៉ូហ៊ីងយ៉ា ៕
Tag:
មីយ៉ាន់ម៉ា
អ៊ុងសាន ស៊ូជី
បោះឆ្នោត
© រក្សាសិទ្ធិដោយ thmeythmey.com
