កីឡាអន្តរជាតិ
អន្តរជាតិ
Brentford អាចរកបាន២០០លានដុល្លារ បើឈ្នះ Fulham ទៅលេង Premier League
× Brentford ត្រូវតតាំងជាមួយ Fulham ក្នុងវគ្គផ្តាច់ព្រ័ត្រ Championship play-off ដើម្បីដណ្តើមកៅអីទៅលេងក្របខណ្ឌ Premier League រដូវកាល ២០២០-២១ នៅរាត្រីថ្ងៃទី៤ ខែសីហា វេលាម៉ោង១និង៤៥នាទីរំលងអាធ្រាត្រ [ម៉ោងនៅកម្ពុជា]។ នេះជាឱកាសរបស់ Brentford វិលត្រឡប់ទៅកាន់លីគកំពូលជាលើកដំបូងក្នុងរយៈពេល៧៣ឆ្នាំ និងជាផ្លូវដើម្បីជួយក្លិបនេះអាចរកបានប្រាក់ចំណូលដល់ទៅ ១៦០លានផោន (២០៩លានដុល្លារអាមេរិក) ផង។
បើយោងតាមរបាយការណ៍របស់ក្រុមហ៊ុនគណនេយ្យ Deloitte ក្លិប Brentford អាចមានឱកាសរកប្រាក់ចំណូលបានដល់ទៅ២០៩លានដុល្លារប្រសិនពួកគេអាចឈានទៅបង្ហាញខ្លួនក្នុងក្របខណ្ឌលីគកីឡាបាល់ទាត់កំពូលអង់គ្លេសរយៈពេល៣រដូវកាល ខណៈ Fulham ក៏នឹងអាចរកបាន ១៧៦លានដុល្លារផងដែរ ក្រោយពីជ័យជម្នះនៅកីឡដ្ឋាន Wembley នៅរាត្រីនេះ។
តាមការប៉ាន់ស្មានរបស់ Deloitte ប្រាក់ ១១១លានដុល្លារ នឹងបានមកពីប្រព័ន្ធផ្សព្វផ្សាយ និង ៩៨លានដុល្លារទៀត បានពីការបង់ប្រាក់ក្នុងរយៈពេល៣រដូវកាលបន្ទាប់ ប្រសិនបើ Brentford ត្រូវកាត់ចេញទៅលីគទីពីរវិញ។ ប៉ុន្តែបើ Brentford អាចបន្តខ្លួននៅ Premier League សម្រាប់រដូវកាលទី៤ទៀតនោះ ពួកគេអាចកើនប្រាក់ចំណូលឡើងដល់ ៣៤៦ លានដុល្លារ។
ដោយឡែក Fulham អាចរកចំណូលបានត្រឹម ១៧៦លានដុល្លារក្នុងរយៈពេល៣ឆ្នាំ នៅ Premier League ដែលតិចជាង Brentford ដ្បិតពួកគេត្រូវកាត់បន្ថយប្រាក់មួយចំនួនដោយសារធ្លាប់ទទួលបានប្រាក់មួយចំនួនមកហើយពីកាត់ចោលទៅ Championship កាលពីឆ្នាំ ២០១៩ កន្លងទៅ។
ក្រុម Fulham និង Brentford បានទម្លាក់ក្រុមគូប្រជែងរៀងខ្លួន ក្នុងការប្រកួតវគ្គជម្រុះ Championship play-off ទាំងពីរជើង។ លទ្ធផលការប្រកួតក្នុងវគ្គជម្រុះនោះ Fulham បានយកឈ្នះ Cardiff City ៣-២ (ជើងទីមួយឈ្នះ២-០, ១-២) ខណៈដែល Brentford បានវាយបកយកឈ្នះ Swansea City ដោយលទ្ធផល ៣-២ (ជើងទី១ចាញ់ ១-០, ឈ្នះ ៣-១ វិញ)។
Brentford បានបញ្ចប់ក្នុងចំណាត់ថ្នាក់លេខ ៣ ក្នុងតារាង Championship ឈរពីលើក្រុម Fulham ដោយបញ្ចប់ក្នុងចំណាត់ថ្នាក់ទី៤។ ក្រុមពីលេខ៣ដល់លេខ៦ ត្រូវប្រកួត play-off ខណៈក្រុមជើងឯក និងរងជើងឯកបានកៅអីស្វ័យប្រវត្តិទៅក្របខណ្ឌកំពូល៕
Tag:
Brentford
Fulham
Premier League
© រក្សាសិទ្ធិដោយ thmeythmey.com