អន្តរជាតិ
អ្នកស្លាប់ក្នុងហេតុការណ៍ផ្ទុះឃ្លាំងគីមីនៅបេរូតឡើងដល់៧៨នាក់ហើយ រីឯរបួសជាង៤០០០នាក់
ក្រុមជួយសង្រ្គោះកំពុងសែងជនរងគ្រោះក្រោយហេតុការណ៍ផ្ទុះនៅបេរូត។ រូបភាព AFP
×![]()
ដោយ: ធៀន ភារិន្ទ
មនុស្សយ៉ាងហោចណាស់ ៧៨នាក់ស្លាប់ និង ៤ពាន់រងរបួសករណីផ្ទុះដ៏កក្រើកចំនួន២ដង នៅរដ្ឋធានីបេរូត ប្រទេសលីបង់ នៅថ្ងៃទី៤ ខែសីហា។ អាជ្ញាធរ មិនទាន់រកឃើញមូលហេតុច្បាស់លាស់នៅឡើយទេ ខណៈប្រតិបត្តិការរុករកអ្នករងគ្រោះកំពុងធ្វើឡើង។
ឧប្បទ្ទវហេតុផ្ទុះចំនួនពីរលើកបន្តបន្ទាប់គ្នានៅក្នុងទីក្រុងបេរូត របស់លីបង់ បានបង្កឲ្យមានវិនាសសកម្មយ៉ាងខ្លាំងទៅលើហេដ្ឋារចនាសម្ព័ន្ធនៅក្នុងរដ្ឋធានីលីបង់ និងប្រជាជនក្នុងទីក្រុង។ មនុស្សយ៉ាងហោចណាស់ ៧៨នាក់ បានបាត់បង់ជីវិត និង ៤ពាន់នាក់រងរបួស ចំណែកមនុស្សជាច្រើននាក់ទៀត បានបាត់ខ្លួន។ ការបាក់បែកសំណង់អាគារ និងការដាច់ភ្លើងអគ្គិសនី ធ្វើឲ្យអាជ្ញាធរជួបបញ្ហាពិបាកស្វែងរកប្រជាជន ដែលបានបាត់ខ្លួន។
អាជ្ញាធរលីបង់ មិនទាន់រកឃើញមូលហេតុផ្ទុះនៅឡើយទេ។ ប៉ុន្តែគេសង្ស័យថា ករណីផ្ទុះកើតចេញពីឃ្លាំងផ្ទុកសារធាតុគីមីអាម៉ូញ៉ូមនីត្រាត (Ammonium nitrate) ដែលមានចំនួនប្រមាណ២៧០០តោន នៅកំពង់ផែក្នុងទីក្រុងបេរូត ដែលត្រូវបានស្តុកទុកតាំងពីឆ្នាំ២០១៤មក។ សារធាតុគីមីនេះ អាចយកប្រើប្រាស់ជាជី និងជាសមាសធាតុនៃគ្រឿងផ្ទុះផងដែរ។ នេះបើតាមការចុះផ្សាយរបស់សារព័ត៌មាន Al Jazeera។
បន្ទាប់ពីមានករណីផ្ទុះនេះ ប្រធានាធិបតីលីបង់ លោកMichel Aoun បានកោះប្រជុំក្រុមប្រឹក្សាការពារជាតិជាន់ខ្ពស់ ដើម្បីពិភាក្សាបញ្ហាបន្ទាន់។ ចំណែកនាយករដ្ឋមន្ត្រីលីបង់ លោក Hassan Diab បានសន្យារកអ្នកពាក់ព័ន្ធនឹងបញ្ហានេះ មកទទួលខុសត្រូវ ដោយមិនមានការលើកលែងឡើយ។ ដោយឡែករដ្ឋមន្ត្រីសុខាភិបាលវិញ ក៏បានអំពាវនាវស្វែងរកជំនួយមនុស្សធម៌ផងដែរ។
ប្រមុខរដ្ឋ ប្រមុខរដ្ឋាភិបាល និងមន្ត្រីជាន់ខ្ពស់ប្រទេសមួយចំនួន បានផ្ញើសាររំលែកទុក្ខមកជាបន្តបន្ទាប់ ក្នុងនោះមានដូចជា លោកវ្ល៉ាឌីមៀ ពូទីន ប្រធានាធិបតីរុស្សី, នាយករដ្ឋមន្ត្រីអង់គ្លេស លោក បូរីស ចនសុន, រដ្ឋមន្ត្រីការបរទេសបារាំង លោក Jean-Yves Le Drian និងនាយករដ្ឋមន្ត្រីកាណាដា លោក ចាស្ទ្រីន ទ្រូដូ ជាដើម។ បន្ថែមពីលើការរំលែកទុក្ខ ប្រទេសជាច្រើន ក៏ប្រកាសផ្ដល់ជំនួយបន្ទាន់ផងដែរ៕
Tag:
លីបង់
© រក្សាសិទ្ធិដោយ thmeythmey.com
