ភ្នំពេញ៖ សហជីពនៃសណ្ឋាគារ LE MERIDIEN ANGKOR បានដើរចេញពីតុចរចា ក្រោយពីមន្ទីរការងារនិងបណ្ដុះបណ្ដាលវិជ្ជាជីវៈខេត្តសៀមរាប សម្រេចដាក់វិវាទបុគ្គលិក៣រូប ដែលត្រូវភាគីសណ្ឋាគារបញ្ឈប់ការងារ ឲ្យទៅជាវិវាទបុគ្គល ដែលផ្ទុយពីការតវ៉ារបស់កម្មករ។
បុគ្គលិក LE MERIDIEN ANGKOR ប្រមាណ៤០នាក់ បានទាមទារឲ្យមន្ទីរការងារ និងបណ្ដុះបណ្ដាលវិជ្ជាជីវៈខេត្តសៀមរាប និងអ្នកគ្រប់គ្រងសណ្ឋាគារ ដាក់វិវាទតំណាងកម្មករស្រី្ត៣រូប ដែលត្រូវបានបញ្ឈប់ពីការងារចូលជាវិវាទរួម។ លើសពីនេះ គឺទាមទារឲ្យកាត់បន្ថយប្រាក់ឈ្នួលត្រឹម២០ភាគរយវិញ ក្រោយភាគីសណ្ឋាគារ ប្រកាសកាត់៣៥ភាគរយនៃប្រាក់ខែគោល កាលពីខែកក្កដាកន្លងមក។
លោក ទូច កុសល ប្រធានសហព័ន្ធសហជីពកម្មករនិយោជិតវិស័យទេសចរណ៍កម្ពុជា បានបញ្ជាក់ថា កម្មករ LE MERIDIEN ANGKOR បានទាមទារ៣ចំណុច ទៅភាគីសណ្ឋាគារ ប៉ុន្តែការចរចារដែលមានមន្ទីរការងារជាអ្នកសម្របសម្រួល កាលពីថ្ងៃទី៣ សីហានោះ ត្រូវបានបរាជ័យនៅត្រឹមការចរចារចំណុចទី១ ដែលស្នើដាក់វិវាទតំណាងកម្មករ៣រូប ចូលជាវិវាទរួម។
ថ្លែងប្រាប់សារព័ត៌មានថ្មីៗតាមទូរស័ព្ទ លោក ទូច កុសល បានបញ្ជាក់ថា៖ «តំណាងសហជីពបានងើបដើរចេញ នៅពេលមន្ទីរការងារសម្រេចដាក់វិវាទនេះជាវិវាទបុគ្គល ពួកយើងមិនទទួលស្គាល់ឡើយ»។
កាលពីថ្ងៃទី៣ សីហា មន្ទីរការងារនិងបណ្ដុះបណ្ដាលវិជ្ជាជីវៈខេត្តសៀមរាប បានសម្រេចដាក់វិវាទបុគ្គលិក៣រូប ដែលត្រូវភាគីសណ្ឋាគារបញ្ឈប់ការងារ ឲ្យទៅជាវិវាទបុគ្គល ដែលផ្ទុយពីការតវ៉ារបស់កម្មករ។
ត្រង់ចំណុចនេះ លោក ទូច កុសល អះអាងថា ការសម្រេចរបស់មន្ទីរនេះ គឺមិនត្រឹមត្រូវឡើយ ដោយសារតំណាងកម្មករទាមទារកន្លងមក គឺដើម្បីប្រយោជន៍បុគ្គលិករួម ។«ដូច្នេះវិវាទនេះត្រូវចាត់ទុកជាវិវាទរួម ដើម្បីឲ្យក្រុមប្រឹក្សាអាជ្ញាកណ្ដាលជាអ្នកដោះស្រាយ។ ចំណែកពីរចំណុចទៀត មន្ទីរបានចាត់ចូលជាវិវាទរួម ប៉ុន្តែមិនបានចរចារឡើយ ព្រោះក្រុមសហជីពនិយោជិតនិងជិយោជក ជជែកគ្នាមិនត្រូវតាំងពីចំណុចដំបូង»។ នេះជាការបញ្ជាក់របស់លោក ទូច កុសល។
ប្រធានការិយាល័យដោះស្រាយវិវាទនៅមន្ទីរការងារខេត្តសៀមរាប លោក ផេង ឆេងលី បានបញ្ជាក់ថា ការសម្រេចដាក់វិវាទតំណាងបុគ្គលិកស្រី្ត៣រូបជាវិវាទបុគ្គល ដោយសារអ្នកទាំងនោះបានចែកចាយព័ត៌មានលើបណ្ដាញសង្គម ធ្វើឲ្យប៉ះពាល់ឈ្មោះសណ្ឋាគារ ដែលមិនអាចចាត់ចូលជាវិវាទរួមឡើយ។
លោក ថ្លែងយ៉ាងដូច្នេះថា៖ «ការសម្រេចនេះ គឺធ្វើឡើងតាមច្បាប់ ដោយសារតំណាងបុគ្គលិកទាំង៣ដែលបញ្ឈប់ពីការងារបានចែកចាយព័ត៌មានពីសណ្ឋាគារ ធ្វើខូចឈ្មោះសណ្ឋាគារ ទើបគេបញ្ឈប់ពួកគាត់ ហើយការបញ្ឈប់និងការធ្វើឲ្យខូចឈ្មោះនេះ គឺមិនមែនដើម្បីប្រយោជន៍រួមនោះទេ អ៊ីចឹងបានយើងចាត់ទុកជាវិវាទបុគ្គល»។
ជាមួយគ្នាដែរ លោក ឆេងលី បានអះអាងវិញថា ភាគីសហជីពធ្វើមិនត្រឹមត្រូវឡើយ ក្នុងកិច្ចប្រជុំកាលពីថ្ងៃទី៣ សីហា ព្រោះវិវាទនេះ ជាវិវាទរបស់សហជីពមូលដ្ឋាន ប៉ុន្តែបែរជាឲ្យអ្នកនៅសហព័ន្ធសហជីពចូលរួមដោះស្រាយទៅវិញ។
លោក ទូច កុសល បានឆ្លើយតបថា ការដែលសហព័ន្ធសហជីពលោកចូលដោះស្រាយវិវាទនេះ គឺភាគីសហជីពនិងបុគ្គលិក បានព្រមព្រៀគ្នាផ្ទេរសិទ្ធិដោះស្រាយឲ្យសហព័ន្ធសហជីពលោក។ រីឯការ ធ្វើឲ្យខូចឈ្មោះសណ្ឋាគារ ដែលប្រធានការិយាល័យដោះស្រាយវិវាទលើកឡើង លោក ទូច កុសល ស្នើឲ្យមន្ទីរពិនិត្យមើលបញ្ហារឿងរ៉ាវជាក់ស្ដែង ដើម្បីយកមកដោះស្រាយ។
យ៉ាងណាក៏ដោយ មេសហជីពរូប អះអាងថា ក្រុមបុគ្គលិកនឹងធ្វើការទាមទារបន្តទៀត លើ៣ចំណុចដែលបានទាមទារកន្លងមក ដោយមិនទទួលយកការសម្រេចរបស់មន្ទីរការងារ កាលពីថ្ងៃទី៣ ខែសីហាឡើយ។
ចាប់តាំងពីថ្ងៃជូនដំណឹងនៃការកាត់ប្រាក់ខែគោល៣៥ភាគរយ ក្រោមហេតុផលមិនសូវសម្បូរភ្ញៀវនៅអំឡុងពេលកូវីដ-១៩ កាលពីខែកក្កដា ដល់ថ្ងៃទី៣ សីហានេះ គឺបុគ្គលិកសណ្ឋាគារ LE MERIDIEN ANGKOR បានប្រមូលផ្ដុំគ្នា៣លើកហើយ ដើម្បីតវ៉ាឲ្យភាគីសណ្ឋាគារកាត់ត្រឹម២០ភាគរយ។ នេះបើតាមការបញ្ជាក់របស់លោក ទូច កុសល៕