អន្តរជាតិ
ប្រមុខការបរទេសអាមេរិក សន្យាការពារសកម្មជនហុងកុងដែលកំពុងភៀសខ្លួននៅបរទេស
រដ្ឋមន្ត្រីការបរទេសអាមេរិក ម៉ៃ ប៉ុមប៉េអូ។រូបភាព៖ AFP
×![]()
ប្រមុខការបរទេសអាមេរិក លោក ម៉ៃ ប៉ុមប៉េអូ បានសន្យាថា នឹងការពារសកម្មជនប្រជាធិបតេយ្យហុងកុង ដែលបានរត់គេចខ្លួនចេញពីទីក្រុងនេះ ក្រោយការអនុវត្តច្បាប់សន្តិសុខជាតិ។ លោក ប៉ុមប៉េអូ ប្រកាសដូចនេះ ស្របគ្នានឹងការថ្កោលទោសទីក្រុងប៉េកាំង បន្ទាប់ពីប៉ូលិសហុងកុងបានចេញបញ្ជាឲ្យចាប់ខ្លួនសកម្មជនគាំទ្រប្រជាធិបតេយ្យ៦រូប ដែលកំពុងរស់នៅក្រៅប្រទេស។ 
«បក្សកុម្មុយនីស្តចិន មិនអាចទ្រាំទ្រនឹងគំនិតសេរីរបស់ប្រជាជនខ្លួនឯងបាន និងកំពុងខំប្រឹងកាន់តែខ្លាំងឡើងក្នុងការពង្រីកវិសាលភាពគំនិតរបស់នៅក្រៅព្រំដែនចិន»។ នេះជាការលើកឡើងរបស់លោក ម៉ៃ ប៉ុមប៉េអូ ក្នុងសេចក្តីថ្លែងការណ៍នៅថ្ងៃទី៥ ខែសីហា។ ប្រមុខការបរទេសអាមេរិករូបនេះ បន្ថែមថា អាមេរិក និងបណ្តាប្រទេសសេរីឯទៀត នឹងបន្តការពារពលរដ្ឋរបស់ខ្លួនពីការប៉ុនប៉ងរបស់របបផ្តាច់ការទីក្រុងប៉េកាំង។
ការថ្លែងរបស់មន្ត្រីជាន់ខ្ពស់អាមេរិកបែបនេះ ធ្វើឡើងបន្ទាប់ពីប៉ូលិសហុងកុងកាលពីថ្ងៃទី៣១ ខែកក្កដាបានចេញបញ្ជាឲ្យចាប់ខ្លួនសកម្មជនប្រជាធិបតេយ្យហុងកុង៦ ដែលកំពុងរស់នៅនិរទេសខ្លួនទៅបរទេស ក្រោមការសង្ស័យថាបានបំពានច្បាប់សន្តិសុខហុងកុង។ របាយការណ៍របស់ប៉ូលិសហុងកុង បានបង្ហាញថា សកម្មជនទាំង៦នាក់ព្យាយាមញុះញង់ឲ្យធ្វើអបគមន៍ផ្តាច់ខ្លួន និងគប់គិតជាមួយកម្លាំងបរទេស។ នេះបើតាមទីភ្នាក់ងារសារព័ត៌មាន AFP ។
ការចេញបញ្ជាឲ្យចាប់ខ្លួនសកម្មជននៅក្រៅប្រទេសនេះ ក៏ត្រូវបានកត់សម្គាល់ថា ជាលើកទីមួយហើយដែលប៉ូលិសហុងកុង ប្រើប្រាស់អំណាចដែលមានក្នុងច្បាប់សន្តិសុខ យកទៅអនុវត្តនៅក្រៅប្រទេស។
ក្នុងចំណោមសកម្មជនទាំង៦រូបនោះ មានលោក Samuel Chu ដែលជាប្រធានក្រុមប្រឹក្សាប្រជាធិបតេយ្យហុងកុង មានទីតាំងនៅអាមេរិក និងជាពលរដ្ឋអាមេរិករយៈពេល២៥ឆ្នាំមកហើយ។ ចំណែកឯបុគ្គលសំខាន់មួយរូបទៀត គឺលោក Nathan Law ដែលជាអតីតដែលធ្វើយុទ្ធនាការប្រជាធិបតេយ្យ ដែលបានរត់ភៀសខ្លួនទៅប្រទេសអង់គ្លេស។ លោក Nathan Law បានហៅការចោទប្រកាន់មកលើរូបលោកថា ជាការរឿងប្រឌិត។
កាលពីចុងខែមិថុនា ចិនបានអនុម័តច្បាប់សន្តិសុខ ដែលផ្តន្ទាទោសអ្នកដែលប្រព្រឹត្តអំពើវិទ្ធង្សនា អបគមន៍ ភេរវកម្ម និងឃុបឃិតជាមួយកម្លាំងបរទេស។ ក្រៅតែពីការរិះគន់និងបារម្ភពីផលប៉ះពាល់របស់ច្បាប់នេះ ទៅលើសិទ្ធិ និងសេរីភាពរបស់ពលរដ្ឋហុងកុង ប្រទេសលោកខាងលិចមួយចំនួនមានអង់គ្លេស អូស្ត្រាលី នូវែលសេឡង់ និងអាល្លឺម៉ង់ជាដើមបានព្យួរកិច្ចព្រមព្រៀងបត្យាប័នជាមួយហុងកុង៕
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
4 ថ្ងៃ
