អន្តរជាតិ
លោក មហាធៀ ចែករំលែកភាពផ្អែមល្ហែមជាមួយភរិយានាខួបអាពាហ៍ពិពាហ៍ទី៦៤ឆ្នាំ លោកបណ្ឌិត មហាធៀ និងអ្នកស្រីបណ្ឌិត Siti Hasmah បានឈរកៀកកើយគ្នាយ៉ាងផ្អែមល្ហែមនៅក្បែរមាត់ទឹក ក្រោមពន្លឺថ្ងៃហៀបនឹងលិច បញ្ចេញពណ៌មាសឆ្អិនឆ្អៅ។ រូបភាពពីហ្វេសប៊ុកលោក មហាធៀ
× អតីតនាយករដ្ឋមន្ត្រីម៉ាឡេស៊ី លោកបណ្ឌិត មហាធៀ មហាម៉ាត់ នៅថ្ងៃទី ៥ ខែសីហា បានបង្ហោះរូបថតរបស់លោកជាមួយភរិយាចំនួន៣សន្លឹកលើបណ្ដាញសង្គមហ្វេសប៊ុក ដើម្បីរំឭកដល់ខួបអាពាហ៍ពិពាហ៍ទី៦៤ឆ្នាំរបស់អ្នកទាំងពីរ។
ក្នុងរូបថតទាំងនេះ លោកបណ្ឌិត មហាធៀ និងអ្នកស្រីបណ្ឌិត Siti Hasmah បានឈរកៀកកើយគ្នាយ៉ាងផ្អែមល្ហែមនៅក្បែរមាត់ទឹក ក្រោមពន្លឺថ្ងៃហៀបនឹងលិច បញ្ចេញពណ៌មាសឆ្អិនឆ្អៅ។ អតីតប្រមុខរដ្ឋាភិបាលវ័យ៩៥ឆ្នាំរូបនេះ បាននិយាយថា លោកមិនសូវជាចូលចិត្តចែករំលែកពេលវេលាឯកជនពីជីវិតលោកប៉ុន្មានទេ តែអះអាងថា វាគឺជាឱកាសដ៏ពិសេសមួយសម្រាប់ជីវិតអាពាហ៍ពិពាហ៍លោក។
សរសេរលើចំណងជើងរូបថត លោក មហាធៀ និយាយថា៖«ខ្ញុំមានភាពអៀនខ្មាសក្នុងការបង្ហាញសេចក្តីស្រលាញ់ជាសាធារណៈ។ ប៉ុន្តែ យើងបានរៀបការ ៦៤ឆ្នាំហើយ»។ លោកបណ្ឌិតបន្តទៀតថា៖«ខ្ញុំគិតថា វាមានតម្លៃគ្រប់គ្រាន់ក្នុងការអបអរសាទរក្តីអនុគ្រោះរបស់យើងចំពោះគ្នាទៅវិញទៅមក ហើយអារម្មណ៍ផ្សេងទៀត»។
លោក មហាធៀ និងអ្នកស្រី Siti Hasmah អាយុ៩៤ឆ្នាំ បានរៀបការក្នុងថ្ងៃទី៥ ខែសីហា ឆ្នាំ១៩៥៦ ពោលគឺ៤ឆ្នាំក្រោយលោកបានបញ្ចប់ការសិក្សាថ្នាក់វេជ្ជសាស្ត្រ នៅមហាវិទ្យាល័យវេជ្ជសាស្ត្រ King Edward VII ក្នុងប្រទេសសិង្ហបុរី ។ អ្នកទាំងពីរមានកូនប្រុសស្រីចំនួន៧នាក់។
ស្វាមីភរិយាស្រលាញ់គ្នាដល់ចាស់កោងខ្នងមួយគូនេះបានស្គាល់គ្នា ខណៈអ្នកទាំងពីរបានរៀនសូត្រនៅមហាវិទ្យាល័យខាងលើ។ មហាវិទ្យាល័យនេះ ចុងក្រោយ បានប្រែក្លាយជាសកលវិទ្យាល័យជាតិសិង្ហបុរី៕
សូមទស្សនាវីដេអូ ដែលបង្ហោះលើហ្វេសប៊ុករបស់ លោក មហាធៀ៖
Tag:
ម៉ាឡេស៊ី
ស្នេហា
មហាធៀ មហាម៉ាត់
© រក្សាសិទ្ធិដោយ thmeythmey.com