កីឡាអន្តរជាតិ
អន្តរជាតិ
ព្រឹត្តិការណ៍វាយកូនគោលមួយនៅបារាំង រកបានជំនួយសម្រាប់កុមារខ្មែរ
× ទឹកប្រាក់២៤៦០អឺរ៉ូ (ជិត៣០០០ដុល្លារអាមេរិក) ត្រូវប្រគល់ជូនដល់អង្គការដើម្បីភាពញញឹមនៃកុមារ (PSE) ដើម្បីជួយដល់កុមារកម្ពុជា។ ជំនួយសប្បុរសធម៌នេះ កើតចេញពីព្រឹត្តិការណ៍ប្រកួតកីឡាវាយកូនគោល កាលពីថ្ងៃទី២ ខែសីហា ដែលរៀបចំដោយបណ្តាញអង្គការ PSE ប្រចាំតំបន់ Loire-Atlantique, Maine-et-Loire និង Vendee នៅប្រទេសប្រទេសបារាំង។
យោងតាមការផ្សាយរបស់សារព័ត៌មាន Ouest-France លោកស្រី Emmanuel D’Argoeuves ប្រធាន PSE Loire-Océan បានលើកឡើងថា៖ «យើងធ្វើសកម្មភាពគ្រប់បែបយ៉ាងដើម្បីស្វែងរកជំនួយ ដើម្បីឲ្យកុមារកម្ពុជាអាចទៅសាលារៀន មានអាហារហូបចុក និងជំនួយផ្នែកសុខភាព»។
លោកស្រីបានបន្ថែមថា ជំនួយមួយចំនួនក៏អាចជួយដល់ការបណ្តុះបណ្តាលវិជ្ជាជីវៈលើជំនាញជាច្រើនទាំងក្មេងប្រុស និងក្មេងស្រី ហើយបញ្ហាប្រឈមបន្ថែមដែលត្រូវយកចិត្តទុកដាក់នោះ គឺការកើនឡើងចំនួនកុមារពិការ។
ព្រឹត្តិការណ៍ប្រកួតនោះមានអ្នកចូលរួមចំនួន១៦៤នាក់ ក្នុងនោះមាន៨នាក់ជាកុមារអាយុក្រោម១៤ឆ្នាំ។ រង្វាន់អនុស្សាវរីយ៍ជាច្រើនត្រូវបានផ្តល់ឲ្យអ្នកចូលរួម ខណៈទឹកប្រាក់ចំនួន២៤៦០អឺរ៉ូ ដែលទទួលបានពីការចុះឈ្មោះ ត្រូវបានលោក Raphael Tricot ប្រធានសមាគមកីឡាវាយកូនគោល Pornic សម្រេចផ្តល់ទៅអង្គការ PSE៕
© រក្សាសិទ្ធិដោយ thmeythmey.com