ជាតិ
លោក តាន់ គីមសួរ ឡើងភ្នំឱរ៉ាល់ដល់ទៅ១៨លើក
× ភ្នំពេញ៖ ភ្នំឱរ៉ាល់ជាភ្នំដែលមានកម្ពស់ខ្ពស់ជាងគេក្នុងប្រទេសកម្ពុជា។ ខណៈដែលពលរដ្ឋខ្មែរជាច្រើន នៅមិនទាន់បានឡើងភ្នំនេះនៅឡើយ លោក តាន់ គីមសួរ បានឡើងភ្នំឱរ៉ាល់នេះ បាន១៨លើកហើយ។ ក្នុងដំណើរពីមួយលើកទៅមួយលើក លោក គីមសួរ ដែលជាអ្នកស្រឡាញ់បរិស្ថាន និងមានឈ្មោះល្បីល្បាញក្នុងបណ្តាញសង្គមហ្វេសប៊ុក បានសង្កេតឃើញថា ការកាប់ព្រៃឈើរបស់ពលរដ្ឋបានថយចុះ ប៉ុន្តែសំរាមចេះតែកើនទៅវិញ។
ដើម្បីជ្រាបច្បាស់ សូមអញ្ជើញលោកអ្នកនាង ទស្សនាបទសម្ភាសរវាង លោក ប៉ាន់ បូនី នៃសារព័ត៌មាន Thmeythmey25 និងលោក តាន់ គីមសួរ ដូចតទៅ៖
កាលពីថ្ងៃទី ២ខែសីហា ឆ្នាំ២០២០ លោក តាន់ គីមសួរ បានធ្វើដំណើរឡើងភ្នំឱរ៉ាល់ជាលើកទី១៨ របស់ខ្លួនជាមួយមិត្តភក្តិមួយក្រុម។ ជាដំណើរឡើងចុះភ្នំ ដែលចំណាយពេលតែមួយយប់មួយថ្ងៃប៉ុណ្ណោះ ខណៈជាទូទៅគេត្រូវចំណាយពេល២យប់ ៣ថ្ងៃ ដើម្បីឡើង ចុះភ្នំកម្ពស់ ១ ៨១៣ម៉ែត្រនេះ។
នៅក្នុងបទសម្ភាសជាមួយសារព័ត៌មាន ThmeyThmey25 លោក តាន់ គីមសួរ ថា មូលហេតុដែលរូបលោកឡើងភ្នំឱរ៉ាល់ច្រើនដងនេះ គឺក្នុងគោលបំណងចូលរួមបញ្ឈប់ការកាប់ព្រៃឈើរបស់ប្រជាពលរដ្ឋក្នុងតំបន់នោះ។ លោក ចង់ឲ្យពលរដ្ឋក្នុងតំបន់នោះ ដូរវិធីរកប្រាក់ចំណូលរបស់ខ្លួន ដោយឈប់កាប់ឈើ មកជានាំភ្ញៀវទេសចរឡើងភ្នំវិញ។ លោក តាន់ គីមសួរ ប្រាប់ Thmeythmey25 ដូច្នេះថា៖«ការឡើងភ្នំនេះ១៨ដង ខ្ញុំឃើញមានការផ្លាស់ប្តូរដូចជា ការកាប់បំផ្លាញព្រៃឈើមិនមានលើសលុបដូចមុន ដោយសារតែអ្នកកាប់ព្រៃឈើមួយចំនួនបានផ្លាស់ប្តូមុខរបរមកនាំភ្ញៀវឡើងភ្នំវិញ»។
នេះជារឿងគួរឲ្យត្រេកអរសម្រាប់អ្នកទេសចររូបនេះ ជាមួយនឹងការសំណូមពរឱ្យទេសចរនាំគ្នាមកលេងតំបន់ឱរ៉ាល់ឲ្យបានច្រើន ព្រោះតំបន់នេះសម្បូរដោយដើមឈើធំៗ និងដើម្បីជួយផ្ដល់ចំណូលជូនសហគមន៍។ លោកថា បើសិនជាគ្មានទេសចរ នោះប្រជាសហគមន៍នឹងត្រលប់ទៅកាប់ព្រៃឈើវិញ ព្រោះពួកគាត់គ្មានចំណូល។
ដ្បិតពេលមានទេសចរកាន់តែច្រើនគឺជារឿងក៏គួរឲ្យរីករាយ ប៉ុន្តែអ្វីដែលគួរឲ្យសោកស្តាយសម្រាប់លោក គីមសួរ នោះ គឺលោកបានឃើញសំរាមចេះតែកើនទៅវិញ ខណៈមានអ្នកទេសចរ កាន់តែច្រើនបានឡើងភ្នំឱរ៉ាល់នោះ។ លោកបន្តទាំងហួសចិត្តដូច្នេះ៖«ខ្ញុំមិនយល់ថាយ៉ាងមិចដែរ ព្រោះភ្ញៀវទេសចរដែលឡើងមកភ្នំឱរ៉ាល់ មានន័យថាគាត់ស្រលាញ់ធម្មជាតិ ប៉ុន្តែគាត់បែរជាទៅបំផ្លាញធម្មជាតិទៅវិញ»៕
© រក្សាសិទ្ធិដោយ thmeythmey.com