ជាតិ
រដ្ឋបាលជលផល ជំរុញកសិករបង្កើនការចិញ្ចឹមវារីវប្បកម្ម ដើម្បីនាំចេញទៅទីផ្សារបរទេស លោក អេង ជាសាន ប្រធានរដ្ឋបាលជលផល
× កន្លងមក កម្ពុជាបាននាំចេញផលជលផល ៤ប្រភេទប្រមាណ ១ម៉ឺនតោន ទៅប្រទេស ថៃ វៀតណាម សាំងហ្គាពួរ ហុងកុង និងចិន ដូចជា ត្រីដំរី បង្កង ខ្យងខ្ចៅ និងអន្ទង់។ រដ្ឋបាលជលផលនឹងជំរុញបង្កើនការផលិតដើម្បីបំពេញតម្រូវការក្នុងស្រុក និងបង្កើនការនាំចេញឲ្យបានច្រើនជាងនេះ។ នេះបើតាមលោក អេង ជាសាន ប្រធានរដ្ឋបាលជលផលបានលើកឡើងនៅក្នុងសន្និសីទសារព័ត៌មានស្ដីពី «វិធានជំរុញផលិតផលកសិកម្ម ទៅកាន់ទីផ្សារពិភពលោក» នៅថ្ងៃទី ៦ ខែសីហា ឆ្នាំ២០២០។
ប្រធានរដ្ឋបាលជលផលរូបនេះបានបន្តថា៖ «កន្លងមកកម្ពុជាធ្លាប់នាំចេញនូវផលជលផលមួយចំនួនកាលពីឆ្នាំ២០១៩ ១ម៉ឺនតោន នឹងជំរុញការផលិតដើម្បីបំពេញតម្រូវការក្នុងស្រុក និងបង្កើនការនាំចេញឲ្យបានច្រើនជាងនេះ ប៉ុន្តែកម្ពុជាក៏បាននាំចូលមកវិញនូវផលមួយចំនួនពីប្រទេសខាងក្រៅដូចជាក្ដាមសមុទ្រ និងគ្រឿងសមុទ្រប្រមាណ ២ ម៉ឺនតោនក្នុង ១ឆ្នាំ»។ លោកថាបច្ចុប្បន្ននៅកម្ពុជាមានគ្រួសារប្រមាណ ៥ ម៉ឺនគ្រួសារកំពុងប្រកបរបរចិញ្ចឹមត្រី ក្នុងមាន ៤៥ ភាគរយចិញ្ចឹមជាលក្ខណៈគ្រួសារ។
លោក អេង ជាសាន បន្តថា ដើម្បីសម្រេចនូវគោលខាងលើត្រូវគិតលើកត្តា ចំណី ពូជ បច្ចេកទេសចិញ្ចឹម និងធនធាន។ ជាមួយគ្នានេះរដ្ឋបាលជលផល ជំរុញការផលិតក្នុងវិស័យវារីវប្បកម្ម ដោយស្នើឲ្យមានការចូលរួមពីប្រជាពលរដ្ឋ ពិសេសក្នុងវិស័យវារីវប្បកម្មខ្នាតធំ។
កន្លងមក រាជរដ្ឋាភិបាលកម្ពុជា ជំរុញឲ្យកសិករបង្កើនការចិញ្ចឹមផ្នែកវារីវប្បកម្ម ដើម្បីបំពេញតម្រូវការក្នុងស្រុកអំឡុងវិបត្តិកូវីដ-១៩ និងឈានដល់ការនាំចេញផងដែរ។ ដោយឡែកដើម្បីជំរុញការចិញ្ចឹមត្រីប្រធានរដ្ឋបាលជលផល បានលើកទឹកចិត្តឲ្យកសិករចិញ្ចឹមត្រីក្នងស្រែ ដើម្បីកាត់បន្ថយក្នុងការថែទាំ និងទទួលបានអត្ថប្រយោជន៍ច្រើន។
បើតាមរបាយការណ៍បូកសរុបការងារកសិកម្ម រុក្ខាប្រមាញ់និងនេសាទប្រចាំឆ្នាំ២០១៩-២០២០ លើវិស័យជលផលឆ្នាំ២០១៩ ផលនេសាទ និងវារីវប្បកម្មសរុបមានចំនួន ៩០៨ ៥០៨តោន ក្នុងនោះផលនេសាទទឹកសាបមាន ៤៧៨ ៨៥០ តោន ផលនេសាទសមុទ្រមាន ១២២ ៥៥០តោន និងផលវារីវប្បកម្មមាន ៣០៧ ៤០៨តោន៕
© រក្សាសិទ្ធិដោយ thmeythmey.com