ជាតិ
តំបន់ទេសចរណ៍ក្នុងខេត្តក្រចេះ ដែលអ្នកអាចទៅកម្សាន្តបាន នៅរដូវវស្សា
× ក្រុងក្រចេះ ដែលសម្បូរដោយអគារសម័យបារាំង និងមានអារាមបុរាណផងនោះ នៅតែអាចទទួលបានភ្ញៀវទេសចរទៅទស្សនា បាននៅរដូវវស្សានេះ។ ក្រៅពីនេះ សហគមន៍អេកូទេសចរណ៍កោះទ្រុងដែលនៅទល់មុខក្រុងក្រចេះ សហគមន៍ក្រឡាន, ភ្នំសំបុក និងអន្លង់ផ្សោតកាំពី ដែលនៅមិនឆ្ងាយប៉ុន្មានពីទីរួមខេត្ត ក៏មានសក្តាពលទេសចរណ៍ដែរនាខែវស្សា។ រីឯ វិហារសរសរ១០០ ដែលស្ថិតនៅក្នុងស្រុកសំបូរ ក៏រង់ចាំស្វាគមន៍ទេសចរទៅកម្សាន្តផងដែរ។
ក្រចេះជាខេត្តមួយស្ថិតក្នុងដែនដីភាគឦសាន តាមបណ្តោយទន្លេមេគង្គ មានសក្តានុពលទេសចរណ៍រហូតដល់១៩កន្លែង។ ប៉ុន្តែនៅរដូវវស្សានេះ មានតំបន់ទេសចរណ៍មួយចំនួនប៉ុណ្ណោះ ដែលអាចទទួលភ្ញៀវទេសចរបាន។ លោក ចាន់ សុគន្ធី ប្រធានមន្ទីរទេសចរណ៍ខេត្តក្រចេះបានប្រាប់សារព័ត៌មាន ThmeyThmey25 ថាតំបន់ទេសចរណ៍ដែលទេសចរ អាចទៅកម្សាន្តបាន មានដូចជា ក្រុងក្រចេះ,សហគមន៍អេកូទេសចរណ៍កោះទ្រុង,សហគមន៍ក្រឡាន, ភ្នំសំបុក,អន្លង់ផ្សោតកាំពី និងវិហារសរសរ១០០។
បើតាម លោក ចាន់ សុគន្ធី រដូវវស្សា ធ្វើឲ្យតំបន់ទេសចរណ៍ ដែលនៅតាមតំបន់ឆ្នេរខ្សាច់ខេត្តក្រចេះ មិនអាចទទួលភ្ញៀវទេសចរបានទេ។ «តំបន់ទេសចរណ៍ដទៃ ភ្ញៀវទេសចរមិនអាចទៅកម្សាន្តបានទេដោយសារតំបន់ទេសចរណ៍ទាំងនោះ ពឹងផ្អែកលើសក្តានុពលឆ្នេរខ្សាច់ ដូចជាឆ្នេរខ្សាច់កោះទ្រុង។ បច្ចុប្បន្ន ទឹកឡើងលិចខ្សាច់អស់ទៅ វាអត់មានអ្វីទទួលភ្ញៀវទេសចរបាន»។ នេះបើតាមការបន្ថែមរបស់ប្រធានមន្ទីរទេសចរណ៍ខេត្តក្រចេះ។
លោក ចាន់ សុគន្ធី រំពឹងថា ទទួលបានភ្ញៀវទេសចរច្រើន ក្នុងពេលឈប់សម្រាកជំនួសចូលឆ្នាំខាងមុខ។ ខេត្តក្រចេះទទួលភ្ញៀវទេសចរមិនតិចជាង ១០០០នាក់ទេ ក្នុងឱកាសបុណ្យទានធំៗកន្លងមក។ ទន្ទឹមនឹងនេះ មន្ទីរទេសចរណ៍ខេត្តក្រចេះ ក៏កំពុងធ្វើការទៅលើវិធានការសុវត្ថិភាព តាមការណែនាំរបស់ក្រសួងទេសចរណ៍ ដើម្បីធានាបាននូវសុវត្ថិភាពភ្ញៀវទេសចរ ក៏ដូចជាចូលរួមជាមួយរដ្ឋាភិបាល ក្នុងការទប់ស្កាត់ការឆ្លងរាលដាលនៃជំងឺកូវីដ-១៩។ នេះជាការបញ្ជាក់របស់លោក ចាន់ សុគន្ទី។
សូមជម្រាបថា ខេត្តក្រចេះមានតំបន់ទេសចរណ៍សរុប១៩កន្លែង រួមមានរមណីយដ្ឋានធម្មជាតិ១៣កន្លែង រមណីយដ្ឋានវប្បធម៌ប្រវត្តិសាស្ត្រ ៥កន្លែង និងរមណីយដ្ឋានវប្បធម៌ធម្មជាតិ ១កន្លែង៕
រូបភាពពីប្រធានមន្ទីរទេសចរណ៍ខេត្តក្រចេះ
© រក្សាសិទ្ធិដោយ thmeythmey.com