UCL៖ AT-Madrid មានសមាជិកពីរនាក់ឆ្លង COVID-19 មុនប៉ះ Leipzig វគ្គ១/៤

កីឡាអន្តរជាតិ

អន្តរជាតិ

UCL៖ AT-Madrid មានសមាជិកពីរនាក់ឆ្លង COVID-19 មុនប៉ះ Leipzig វគ្គ១/៤

10, Aug 2020 , 11:04 am

រូបភាព

ដោយ: ទេព ពិទូរ្យ

សមាជិកក្រុម Atletico Madrid ពីររូបបានធ្វើតេស្តចេញលទ្ធផលវិជ្ជាមាន COVID-19 មុនពេលពួកគេត្រូវធ្វើដំណើរទៅព័រទុយហ្គាល់ដើម្បីប្រកួតជាមួយ RasenBallsport Leipzig ក្នុងពានរង្វាន់ UEFA Champions League វគ្គ ៨ ក្រុមចុងក្រោយ។ ក្របខណ្ឌ La Liga នៃប្រទេសអេស្ប៉ាញប្រកាសដូច្នេះនៅថ្ងៃ៩ សីហា។

អ្នកទាំងពីរដែលរកឃើញថា ឆ្លងជំងឺរលាកសួតធ្ងន់ធ្ងរបង្ករដោយកូរ៉ូណាវីរុសប្រភេទថ្មីនេះ កំពុងដាក់ឲ្យនៅដាច់ដោយឡែកនៅផ្ទះរៀងៗខ្លួន និងទទួលការព្យាបាលពីក្រុមគ្រូពេទ្យ។ យ៉ាងណាក៏ដោយ ក្លិបនៃលីគកីឡាបាល់ទាត់កំពូលអេស្ប៉ាញមួយនេះ មិនបានបង្ហាញពីអត្តសញ្ញាណសមាជិករបស់ពួកគេ ឬបញ្ជាក់ថា ជាកីឡាករ ឬក៏បុគ្គលិកនោះទេ។

ក្នុងសេចក្តីប្រកាស AT-Madrid បានសរសេរថា៖« កាលពីថ្ងៃទី ៨ ខែសីហាសមាជិកទាំងអស់នៃក្រុមទី១ ដែលត្រូវធ្វើដំណើរទៅក្រុង Lisbon ត្រូវបានបញ្ជូនទៅធ្វើតេស្ត ដោយគោរពតាមគោលការរបស់ UEFA ក្នុងការចូលរួមការប្រកួតវគ្គ ៨ ក្រុមចុងក្រោយក្របខណ្ឌ Champions League។ នៅថ្ងៃបន្ទាប់ យើងបានរកឃើញអ្នកឆ្លង COVID-19 ចំនួនពីនាក់ ក្នុងចំនោមអ្នកធ្វើតេស្តទាំងអស់ ហើយឥឡូវពួកគេត្រូវដាក់ចត្តាឡីស័កនៅក្នុងផ្ទះរៀងៗខ្លួន»។

Atletico Madrid បញ្ជាក់ទៀតថា សមាជិកក្រុមទាំងអស់នឹងត្រូវបានធ្វើតេស្តម្តងទៀតមុនពេលអាចធ្វើដំណើរទៅជួប RB Leipzig ក្រុមនៃក្របខណ្ឌអាល្លឺម៉ង់ នៅរាត្រីថ្ងៃទី១៣ ខែសីហា ម៉ោង ២:០០ [ម៉ោងនៅកម្ពុជា] នាកីឡដ្ឋាន Estadio Jose Alvalade ក្នុងក្រុង Lisbon ប្រទេសព័រទុហ្គាល់ ដែល UEFA ជ្រើសរើសជាទឹកដីកណ្តាលសម្រាប់ពានកំពូលអឺរ៉ុបចាប់ពីវគ្គ៨ក្រុមរដូវកាលនេះ។

ក្រុមដែលត្រូវប៉ះគ្នានៅវគ្គ ១/៤ ផ្តាច់ព្រ័ត្រផ្សេងទៀត មាន Atalanta ប៉ះ Paris Saint-Germain, Barceloan តទល់ជាមួយ Bayern Munich និង Manchester City ជួប Lyon។

គិតមកត្រឹមពេលនេះ អេស្ប៉ាញមានចំនួនអ្នកឆ្លងជាង៣៦ម៉ឺនករណី ក្នុងនោះស្លាប់ជាង២៨០០០នាក់ ខណៈពិភពលោកទាំងមូលមានចំនួនអ្នកឆ្លងជាង២០លាននាក់ សះស្បើយជិត១៣លាននាក់ និងស្លាប់ជាង៧សែននាក់៕