អន្តរជាតិ
ពិភពលោក សន្យាផ្ដល់លុយជិត៣០០លានដុល្លារឲ្យលីបង់ស្ដារប្រទេស ប្រធានាធិបតីបារាំង អេម៉ានុយអែល ម៉ាក្រុង និយាយក្នុងសន្និសីទអន្តរជាតិដើម្បីកៀរគរជំនួយឲ្យលីបង់។ រូបភាព AFP
× មេដឹកនាំពិភពលោក ដែលចូលក្នុងសន្និសីទអន្តរជាតិស្ដីពីលីបង់នៅថ្ងៃទី៩ ខែសីហា បានសន្យាផ្ដល់ប្រាក់ចំនួន២៥០លានដុល្លារដើម្បីស្ដារប្រទេសឡើងវិញក្រោយហេតុការណ៍ផ្ទុះឃ្លាំងសារធាតុគីមីកក្រើករដ្ឋធានីបេរូត។ នេះបើតាមការបញ្ជាក់របស់បារាំងដែលជាអ្នករៀបចំជំនួបអន្តរជាតិនេះ។ ជំនួយបន្ទាន់ នឹងត្រូវផ្ដល់ឲ្យប្រជាជនដែលរងគ្រោះដោយផ្ទាល់ ដោយមិនឆ្លងកាត់រដ្ឋាភិបាលលីបង់ដែលប្រជាជនចោទថា ពុករលួយគ្មានសមត្ថភាព។
មេដឹកនាំប្រទេសចំនួន១៥ និងតំណាងមកពីប្រទេសជាច្រើនទៀត បានចូលរួមក្នុងសន្និសីទអន្តរជាតិដែលធ្វើតាមប្រព័ន្ធអនឡាញនៅថ្ងៃទី៩ ខែសីហា ក្នុងគោលដៅបង្ហាញសាមគ្គីភាពជាមួយពលរដ្ឋលីបង់ដែលញាំញីដោយវិបត្តិ និងចុងក្រោយនេះ គឺការផ្ទុះឃ្លាំងផ្ទុកអាម៉ូញ៉ូមនីត្រាតកាលពីដើមសប្ដាហ៍មុន។ ប្រធានាធិបតីអាមេរិក ដូណាល់ ត្រាំ ក៏មានវត្តមានក្នុងជំនួបដែលដឹកនាំដោយប្រធានាធិបតីបារាំង អេម៉ានុយអែល ម៉ាក្រុង និងអង្គការសហប្រជាជាតិ។
បើតាមទីភ្នាក់ងារព័ត៌មាន AFP ការិយាល័យលោក ម៉ាក្រុង ប្រកាសថា ជំនួយបន្ទាន់ដែលត្រូវបានកៀរគរភ្លាមៗមានចំនួន២៥២,៧លានអឺរ៉ូប ដែលស្មើនឹង២៩៨លានដុល្លារ។ ក្នុងនោះ បារាំងនឹងចេញចំនួន៣០លានអឺរ៉ូ។ រដ្ឋមន្ត្រីការបរទេសអាល្លឺម៉ង់ ហៃកូ ម៉ាស និយាយថា ទឹកប្រាក់ច្រើនជាង២០០លានដុល្លារ ត្រូវបានប្រមូលហើយ ហើយអាល្លឺម៉ង់ក៏បានចេញ២០លានអឺរ៉ូដែរ។
ក្នុងសេចក្ដីថ្លែងការណ៍រួមក្រោយជំនួប មេដឹកនាំ និងតំណាងប្រទេសដែលចូលរួម បានរំលេចពីក្ដីបារម្ភរបស់ពួកគេពាក់ព័ន្ធអំពើពុករលួយរបស់រដ្ឋាភិបាលលីបង់ និងបានប្រកាន់ជំហរផ្ដល់ជំនួយបន្ទាន់ឲ្យពលរដ្ឋដោយផ្ទាល់។ សេចក្ដីថ្លែងការណ៍បញ្ជាក់ថា៖ «អ្នកចូលរួមទាំងអស់យល់ស្របថា ជំនួយរបស់ពួកគេ ត្រូវតែទាន់ពេល មានប្រសិទ្ធភាព និងស្របតាមតម្រូវការរបស់ប្រជាជនលីបង់ ហើយត្រូវបានសម្របសម្រួលដោយអង្គការហប្រជាជាតិ ព្រមទាំងចែកដោយផ្ទាល់ដល់ប្រជាជន ជាមួយតម្លាភាព និងប្រសិទ្ធភាពខ្ពស់បំផុត។»
នាយកស្ដីទីទីភ្នាក់ងារ USAID របស់អាមេរិក John Barsa បាននិយាយដែរថា ជំនួយរបស់អាមេរិក ដែលក្នុងនោះមានទឹកប្រាក់១៥លានដុល្លារបានប្រកាសរួចហើយ នឹងមិនឆ្លងរដ្ឋាភិបាលទីក្រុងបេរូតដាច់ខាត។
ដោយឡែកអង្គការសហប្រជាជាតិ ក៏ប្រកាសដែរថា ទឹកប្រាក់ចំនួន១១៧លានដុល្លារ កំពុងត្រូវចាំបាច់សម្រាប់ការឆ្លើយតបបន្ទាន់រយៈពេលបីខែដោយោផ្ដោតលើការផ្ដល់សេវាកម្មសុខាភិបាល ការសាងសង់ជម្រកបន្ទាន់ ការចែកអាហារ និងកម្មវិធីផ្សេងៗដើម្បីទប់ស្កាត់ការរាលដាលជំងឺ COVID-19 ផងដែរ។ ប្រធានាធិបតីលីបង់ Michel Aoun បានអរគុណប្រទេសទាំងអស់ដែលផ្ដល់ជំនួយសម្រាប់ប្រទេសរបស់លោក៕
© រក្សាសិទ្ធិដោយ thmeythmey.com