COVID-19
អន្តរជាតិ
COVID-19៖ ករណីស្លាប់នៅវៀតណាម កើនដល់១៣នាក់ ឯករណីឆ្លងសរុបមាន ៨៤១នាក់ ពេទ្យវៀតណាម កំពុងជជែកគ្នា។ រូបភាព៖ VnExpress
× វៀតណាម នៅព្រឹកថ្ងៃទី១០ ខែសីហា បានរាយការណ៍ថា មានអ្នកជំងឺ COVID-19 ស្លាប់ចំនួន ២នាក់បន្ថែមទៀត។ អ្នកស្លាប់ដោយសារCOVID-19 នៅវៀតណាម បានកើនឡើងចំនួន ១៣ករណី ខណៈករណីឆ្លងកើនដល់ ៨៤១ករណី។
តាមសេចក្តីប្រកាសរបស់ក្រសួងសុខាភិបាល វៀតណាមមានអ្នកស្លាប់ចំនួន ២នាក់ ដែលជាស្ត្រីទាំងអស់។ អ្នកស្លាប់ទី១២ គឺជាស្ត្រីវ័យ ៣៣ឆ្នាំ ដែលរស់នៅក្នុងទីក្រុងដាណាង។ ស្ត្រីរូបនេះ គឺមានជំងឺតម្រង់នោម ជំងឺបេះដូង និងលើសឈាមជាដើម។ ស្ត្រីវ័យ៣៣ឆ្នាំរូបនេះ បានស្លាប់នៅព្រឹកថ្ងៃទី១០ ខែសីហា។
ចំណែកអ្នកស្លាប់ទី១៣ គឺជាស្ត្រីវ័យ៤៧ឆ្នាំ ក៏រស់នៅក្នុងទីក្រុងដាណាងដែរ និងមានជំងឺតម្រង់នោមដំណាក់កាលចុងក្រោយ និងលើសឈាម។ ស្ត្រីរូបនេះ បានស្លាប់នៅព្រឹកថ្ងៃទី១០ ខែសីហា។ អ្នកស្លាប់ដោយសារCOVID-19 ទាំងអស់ មានចំនួន១៣នាក់ ដែលភាគច្រើនមានជំងឺ លើសឈាម តម្រង់នោម ជំងឺបេះដូង និងមហារីកជាដើម។
ករណីសរុបរបស់វៀតណាម បានកើនដល់ ៨៤១ករណី និងមានអ្នកជាសះស្បើយចំនួន ៣៩៩នាក់។
បើតាមការចុះផ្សាយរបស់សារព័ត៌មានក្នុងស្រុក អ្នកដំណើរចំនួន ៦២៤នាក់ទៀត បានជាប់នៅទីក្រុងដាណាង ក្រោយរដ្ឋាភិបាលប្រកាសបិទការធ្វើដំណើរចេញចូលទីក្រុងទេសចរណ៍មួយនេះ។ ពេលនេះ អាជ្ញាធរកំពុងធ្វើតេស្តអ្នកទាំងនោះ ដើម្បីរកCOVID-19 មុននឹងអនុញ្ញាតឲ្យត្រលប់មកផ្ទះវិញ។
ដោយឡែក បុរសជនជាតិវៀតណាមចំនួន ២នាក់ ត្រូវបានអាជ្ញាធរពិន័យក្នុងទឹកប្រាក់ ៨៦ដុល្លារ បន្ទាប់ពីមិនគោរពវិធានចត្តាឡីស័កនៅផ្ទះ បន្ទាប់ពីទើបត្រលប់មកពីដាណាង៕
© រក្សាសិទ្ធិដោយ thmeythmey.com