COVID-19
អន្តរជាតិ
លោក Alex Azar រដ្ឋមន្ត្រីសុខាភិបាលអាមេរិក (ឆ្វេង) និងលោកស្រី Tsai Ing-wen ប្រធានាធិបតីតៃវ៉ាន់ (ស្ដាំ)។ រូបភាព៖ AFP
×![]()
លោក Alex Azar រដ្ឋមន្ត្រីសុខាភិបាល និងសេវាប្រជាជនអាមេរិក បានចាប់ផ្តើមដំណើរទស្សនកិច្ចរយៈពេល៣ថ្ងៃនៅកោះតៃវ៉ាន់ ដោយជួបជាមួយមេដឹកនាំតៃវ៉ាន់ជាបន្តបន្ទាប់។ ដំណើរទស្សនកិច្ចនៅតៃវ៉ាន់លើកនេះ ជាដំណើរទស្សនកិច្ចកម្រិតខ្ពស់បំផុតរបស់មន្ត្រីអាមេរិកគិតតាំងពីឆ្នាំ១៩៧៩ មក ។ ចិនបានប្រឆាំងដាច់ខាត ទៅនឹងជំនួបនេះ ដោយចាត់ទុកទស្សនកិច្ចនេះជាការគម្រាមកំហែងទៅដល់ សន្តិភាព និងស្ថិរភាព។ 
ក្នុងជំនួបជាមួយលោកស្រីប្រធានាធិបតី Tsai Ing-wen នៅថ្ងៃទី១០ ខែសីហា លោក Azar បានសរសើរតៃវ៉ាន់ចំពោះការគ្រប់គ្រងជំងឺ COVID-19 ។ បើតាមទីភ្នាក់ងារព័ត៌មាន AFP លោក Azar បានលើកឡើងថា៖« ការឆ្លើយតបរបស់តៃវ៉ាន់ទៅនឹងជំងឺ COVID-19 គឺក្នុងចំណោមប្រទេសដែលជោគជ័យបំផុតក្នុងលោក ហើយនេះគឺដោយសារតែការបើកចំហរ តម្លាភាព និងប្រជាធិបតេយ្យរបស់សង្គមនិងវប្បធម៍តៃវ៉ាន់»។
ចំណែកឯលោកស្រី Tsai បានអរគុណអាមេរិកដែលគាំទ្រឲ្យតៃវ៉ាន់បានចូលទៅក្នុងអង្គការសុខភាពពិភពលោក បើទោះបីជាចិនជំទាស់ក៏ដោយ។ ដោយមិននិយាយចំឈ្មោះចិន លោកស្រី Tsai អះអាងថា ហេតុផលនយោបាយ មិនគួរណាមានអទិភាពជាងសិទ្ធទទួលបានការថែទាំសុខភាពឡើយ។
«សារដែលខ្ញុំនាំមកថ្ងៃនេះ គឺការធានានូវការពង្រឹងភាពជាដៃគូរវាងអាមេរិក និងតៃវ៉ាន់ក្នុងវិស័យសន្តិសុខ ពាណិជ្ជកម្ម សុខាភិបាល និងតម្លៃរួមដូចជាប្រជាធិបតេយ្យ សេរីភាពសេដ្ឋកិច្ច និងសិទ្ធិសេរីភាព»។ នេះជាការលើកឡើងរបស់លោក Azar មុនជំនួបជាមួយលោកស្រី Tsai Ing-wen ប្រធានាធិបតីតៃវ៉ាន់ ។
ក្រៅតែពីជំនួបនេះ លោក Azar ក៏នឹងជួបជាមួយនឹងរដ្ឋមន្ត្រីសុខាភិបាល Chen Shih-chung និងរដ្ឋមន្ត្រីការបរទេស Joseph Wuផងដែរ។
លោក Douglas Paal អតីតប្រធានវិទ្យាស្ថានអាម៉េរិកនៅតៃវ៉ាន់ បានលើកឡើងថា បើទោះបីជាអាមេរិកបញ្ជូនរដ្ឋមន្ត្រីទៅចិនក៏ពិតមែន តែរដ្ឋបាលរបស់លោកប្រធានាធិបតី ដូណាល់ ត្រាំ ក៏នៅគិតគូពីបន្ទាត់ក្រហមផងដែរ។ នោះគឺ មកទល់ពេលនេះមិនទាន់មានមន្ត្រីអាមេរិកដែលទទួលបន្ទុកបញ្ហាសន្តិសុខបានមកធ្វើទស្សនកិច្ចនៅតៃវ៉ាន់ឡើយ។ ការបញ្ជូនលោក Azar ទៅតៃវ៉ាន់ គឺជាការគោរពគោលនយោបាយចិនតែមួយ ប៉ុន្តែក៏ឆ្លៀតឆ្កឹះឆ្កៀលចិនក្នុងពេលតែមួយផងដែរ។ ការណ៍ដែលអាមរិកមិនបញ្ជូនទីប្រឹក្សាសន្តិសុខជាតិ ឬអ្នកឯទៀត បង្ហាញថា អាមេរិកព្យាយមចូលទៅជិតបន្ទាត់ក្រហមតាមតែអាចធ្វើទៅបាន ប៉ុន្តែក៏មិនចង់រំលងបន្ទាត់ក្រហមនេះដែរ។
ទស្សនកិច្ចរបស់រដ្ឋមន្ត្រីសុខាភិបាល Azar ទៅកោះតៃវ៉ាន់ ត្រូវបានចាត់ទុកជាទស្សនកិច្ចជាន់ខ្ពស់ ត្បិតអីលោកជាមន្ត្រីជាន់ខ្ពស់អាមេរិកទីមួយទៅតៃវ៉ាន់តាំងពីឆ្នាំ១៩៧៩ មក។ នៅឆ្នាំ២០០០ រដ្ឋមន្ត្រីដឹកជញ្ជូនអាមេរិក ក៏ធ្លាប់ទៅតៃវ៉ាន់ដែរ ប៉ុន្តែបើគិតពីឋានានុក្រមសមាជិករដ្ឋាភិបាលអាមេរិក លោក Azar ជាមន្ត្រីមានតំណែងខ្ពស់ជាង៕
Tag:
ចិន
អាមេរិក
តៃវ៉ាន់
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
