COVID-19
អន្តរជាតិ
Covid-19៖ គណៈរដ្ឋមន្ត្រី លោកប្រធានាធិបតី ចូកូវី ដូដូ ពិតជាគេចមិនផុតពីការរុះរើ?
ប្រធានាធិបតីឥណ្ឌូណេស៊ី ចូកូ វីដូដូ ។ រូបភាព Antara
×![]()
ទោះបីជាបណ្តាប្រទេសក្នុងតំបន់មួយចំនួនមានការថមថយនៃការឆ្លងវីរុស Covid-19 ក៏ដោយ ឥណ្ឌូណេស៊ី ដែលមានប្រជាជនច្រើនជាងគេក្នុងតំបន់អាស៊ីអាគ្នេយ៍ នៅតែមានករណីឆ្លងក្នុងអត្រាមួយដែលគួរឲ្យព្រួយបារម្ភ។ ស្ថានភាពនេះ មិនត្រឹមតែគំរាមកំហែងដល់ការរស់នៅរបស់ប្រជាជនឥណ្ឌូណេស៊ីប៉ុណ្ណោះនោះទេ ក៏ប៉ុន្តែវា កំពុងតែបន្តដាក់សម្ពាធដល់គណៈរដ្ឋមន្ត្រីរបស់លោកប្រធានាធិបតី ចូកូ វីដូដូ ដែលកំពុងតែដឹកនាំរដ្ឋាភិបាលក្នុងអាណត្តិទីពីររបស់លោកផងដែរ។
គ្រាន់តែរយៈពេលមិនដល់ពីរខែផង លោកប្រធានាធិបតី ចូកូ វីដូដូ បានបង្ហាញការខកចិត្តពីរលើករួចទៅហើយលើការអនុវត្តការងាររបស់មន្ត្រីក្រោមឱវាទរបស់លោក ពាក់ព័ន្ធនឹងវិធានការឆ្លើយតបនឹងការរីករាលដាលនៃ វីរុស Covid-19។ លោក ចូកូវី ហាក់ដូចជាកាន់តែមិនពេញចិត្តនឹងការបំពេញភារកិច្ចរបស់មន្ត្រីក្រោមឱវាទ ក្នុងស្ថានភាពប្រទេស កាន់តែរងការគំរាមកំហែងពីវីរុស Covid-19 ដែលមិនទាន់មានវ៉ាក់សាំងដែលច្បាស់លាស់សម្រាប់ការពារ និងព្យាបាលនោះ។
តាមការចុះផ្សាយរបស់សារព័ត៌មានឥណ្ឌូណេស៊ី Jakarta Post នៅថ្ងៃ៣ សីហា សប្តាហ៍មុន លោកប្រធានាធិបតី ចូកូវី បានបង្ហាញពីការខកចិត្តខ្លាំងជាថ្មីលើការឆកល្វែងក្នុងការគ្រោងថវិកាដ៏តូចតាចរបស់ក្រសួង និងស្ថាប័នរបស់រដ្ឋាភិបាលដើម្បីឆ្លើយតបនឹងវីរុស Covid-19។ លោកប្រធានាធិបតី បានវាយតម្លៃថា ក្រសួងពាក់ព័ន្ធរបស់លោក ហាក់នៅតែមិនទាន់យល់ពីស្ថានភាពបន្ទាន់ និងចាំបាច់របស់ប្រទេសនៅឡើយនោះទេ។
តាមប្រភពព័ត៌មានដដែល លោកប្រធានាធិបតីឥណ្ឌូណេស៊ីរូបនេះ បានសង្កត់ធ្ងន់ថា រដ្ឋមន្ត្រីនីមួយៗ គួររៀបចំផែនការថវិការបស់ខ្លួនឲ្យបានល្អិតល្អន់ ទើបវិធានការគ្រប់គ្រងវិបត្តិ អាចសម្រេចបានឆាប់រហ័ស។ ការធ្វើការរបស់គណៈរដ្ឋមន្ត្រីរបស់លោករបៀបនេះ សម្រាប់លោកប្រធានាធិបតី មិនអាចឲ្យលោក មិនគិតបានឡើយ។
លោកប្រធានាធិបតី បានលើកឡើងថា គណៈរដ្ឋមន្ត្រីរបស់លោក បានជំរុញលើការងារចូលរួមវិភាគទានក្នុងចំណោមថ្នាក់ដឹកនាំ និងក្រុមគ្រួសារថ្នាក់ដឹកនាំ ដើម្បីចូលរួមផ្សព្វផ្សាយពីសារៈសំខាន់ក្នុងការអនុវត្តតាមវិធានសុខាភិបាល។ លោក ប្រធានាធិបតី មិនបន្ទោសពីការជំរុញនេះនោះទេ ក៏ប៉ុន្តែ លោក ក្រើនរម្លឹកដល់សេនាធិការរបស់ខ្លួន គួរតែគិតគូរលើវិធានការចាំបាច់ និងបន្ទាន់ច្រើនជាងការងារនេះ ដ្បិតបច្ចុប្បន្នករណីឆ្លងរបស់ប្រទេសកើនឡើងជាង១០ម៉ឹននាក់ ខណៈអ្នកស្លាប់មានដល់ជាង៥ពាន់នាក់ ទៅហើយនោះ។
គួរកត់សម្គាល់នោះ មុនពេលនៃការចេញសារខកចិត្តដោយសារតែបញ្ហានេះ លោកប្រធានាធិបតី ក៏បានចេញសេចក្តីថ្លែងការណ៍ព្រមានរុះរើគណៈរដ្ឋមន្ត្រីរបស់លោក រួចម្តងទៅហើយនៅខែមិថុនាកន្លងទៅ។ នៅពេលនោះ លោក បានគំរាមថា នឹងផ្លាស់ប្តូររដ្ឋមន្ត្រីមួយចំនួន ដែលបរាជ័យក្នុងការរៀបចំ និងវិធានការទាន់ពេលដើម្បីដោះស្រាយវិបត្តិ Covid-19 ទាំងផ្នែកសង្គមកិច្ច និងផ្នែកសេដ្ឋកិច្ច។ នេះ នៅមិនទាន់រាប់បញ្ចូលការព្រមាន មុនពេលស្ថានភាពវិបត្តិធ្ងន់ធ្ងរផង។
ក្នុងអាណត្តិទីមួយ នៃការដឹកនាំរដ្ឋាភិបាលរបស់ លោក ចូកូ វីដូដូ ដែលចាប់ផ្តើមពីឆ្នាំ២០១៤មក លោកប្រធានាធិបតី ក៏ធ្លាប់រុះរើគណៈរដ្ឋមន្ត្រីរបស់លោកច្រើនដងដូចគ្នា។ ពោលគឺការរុះរើគណៈរដ្ឋមន្ត្រី គឺជាយុទ្ធសាស្ត្រមួយរបស់លោកក្នុងការកែទម្រង់មន្ត្រីរដ្ឋាភិបាល ហើយ ការរុះរើនោះក្នុងគោលដៅធំបំផុត គឺដើម្បីធានាពីប្រសិទ្ធភាពការងាររបស់រដ្ឋាភិបាល ក្នុងកិច្ចការផ្តល់សេវាសាធារណៈជូនប្រជាជននោះឯង៕
Tag:
ឥណ្ឌូណេស៊ី
Covid19
© រក្សាសិទ្ធិដោយ thmeythmey.com
