ភ្នំពេញ៖ អង្គការតម្លាភាពកម្ពុជា(Transparency International Cambodia) និងអង្គការអាក់សិនអេតកម្ពុជា ActionAid ដែលបានទទួលជំនួយហិរញ្ញវត្ថុ ពីសហភាពអឺរ៉ុប(EU) និងភ្នាក់ងារសហប្រតិបត្តិការអន្តរជាតិនៃប្រទេសស៊ុយអែត(SIDA) នឹងប្រារព្ធពិធីចុះហត្ថលេខា លើកិច្ចព្រមព្រៀងផ្ដល់ជំនួយហិរញ្ញវត្ថុ ដល់អង្គការ និងស្ថាប័នដៃគូចំនួន៩ សម្រាប់ការអនុវត្តកម្មវិធីយុទ្ធសាស្ត្ររយៈពេលបីឆ្នាំ ដែលចាប់ផ្តើមពីឆ្នាំ២០២០នេះ ដល់ឆ្នាំ២០២២។ ពិធីនេះ នឹងប្រព្រឹត្តទៅ នៅថ្ងៃពុធ ទី១២ ខែសីហា ឆ្នាំ២០២០ នៅសណ្ឋាគារពូលូវៃ រាជធានីភ្នំពេញ។
សារព័ត៌មានអេឡិចត្រូនិកថ្មីៗ (Themythmey.com) ជាស្ថាប័នដៃគូមួយនៅក្នុងចំណោម អង្គការ និងស្ថាប័នចំនួន៩ នោះ។ តាមរយៈភាពជាដៃគូនេះ សារព័ត៌មានអេឡិចត្រូនិកថ្មីៗ នឹងបណ្តុះបណ្តាលជំនាញសារព័ត៌មាន ដល់យុវជនប្រមាណ ២០០នាក់ នៅខេត្តគោលដៅចំនួន ៥ ដោយចាប់ផ្តើមពីខែកញ្ញា ឆ្នាំ២០២០ ទៅ។ នេះបើតាម ការបញ្ជាក់របស់លោក គី សុខលីម សហស្ថាបនិកនៃសារព័ត៌មានអេឡិចត្រូនិកថ្មីៗ និងជាអ្នកគ្រប់គ្រងគម្រោងនេះ ដោយលោកបានបន្តថា យុវជនគោលដៅ ដែលនឹងត្រូវទទួលបានការបណ្តុះបណ្តាលរួមមានយុវជននៅខេត្តកំពត,កំពង់ធំ,ពោធិ៍សាត, កោះកុង និងខេត្តឧត្តរមានជ័យ។
លោក គី សុខលីម មានប្រសាសន៍បន្តថា៖«ការតស៊ូមតិ ឬសេរីភាពក្នុងការបញ្ចេញមតិ គឺសំខាន់់ណាស់នៅក្នុងសង្គមប្រជាធិបតេយ្យ។ ប៉ុន្តែអ្នកអនុវត្តសិទ្ធិបញ្ចេញមតិក៏គួរស្វែងមូលដ្ឋានគ្រឹះនៃច្បាប់ពាក់ព័ន្ធមួយចំនួនដែរ។ ដោយផ្អែកលើចំណុចនេះ ខ្ញុំគិតថា ការបណ្តុះបណ្តាលអ្នកសារព័ត៌មានប្រជាពលរដ្ឋ គឺជារឿងចាំបាច់បំផុត។ គ្មាននរណាម្នាក់អាចក្លាយជាអ្នកសារព័ត៌មានដោយមិនឆ្លងវគ្គបណ្តុះបណ្តាលឡើយ។ សារព័ត៌មាន គឺជាអាជីពមួយដូចអាជីពដទៃទៀតដែរ»។
យោងតាមសេចក្តីជូនព័ត៌មានរួម រវាងអង្គការតម្លាភាពកម្ពុជា, ActionAid, EU និង SIDA មានអង្គការ និងស្ថាប័នដៃគូចំនួន ៤ របស់អង្គការតម្លាភាពកម្ពុជា និងដៃគូចំនួន៥ របស់អង្គការ ActionAid នឹងត្រូវទទួលបានជំនួយហិរញ្ញវត្ថុ សម្រាប់អនុវត្តអនុវត្តកម្មវិធីយុទ្ធសាស្ត្ររយៈពេលបីឆ្នាំនេះ។
ស្ថាប័នទាំងនោះរួមមាន ៖
១. អង្គការតម្លាភាពកម្ពុជា ជាមួយសម្ព័ន្ធអ្នកសារព័ត៌មានកម្ពុជា(CamboJA)
២. អង្គការតម្លាភាពកម្ពុជា ជាមួយ កាហ្វេនយោបាយ(Politikoffee)
៣. អង្គការតម្លាភាពកម្ពុជា ជាមួយ សម្ព័នសហជីពប្រជាធិបតេយ្យកម្មករកាត់ដេរកម្ពុជា(C.CAWDU)
៤.អង្គការតម្លាភាពកម្ពុជា ជាមួយសម្ព័ន្ធសមាគមសហគ្រាសធុនតូច និងមធ្យមកម្ពុជា(FASMEC)
៥. អង្គការអាក់សិនអេតកម្ពុជា ជាមួយអង្គការអភិវឌ្ឍន៍សំលេងសហគមន៍ (BCV)
៦. អង្គការអាក់សិនអេតកម្ពុជា ជាមួយអង្គការភាពជាដៃគូសង្គមស៊ីវ៉ីលកម្ពុជា(CCSP Cambodia)
៧. អង្គការអាក់សិនអេតកម្ពុជា ជាមួយអង្គការមជ្ឈមណ្ឌលអភិវឌ្ឍន៍កុមារ និង ស្ត្រីនៅកម្ពុជា ( CWDCC)
៨. អង្គការអាក់សិនអេតកម្ពុជា ជាមួយក្រុមប្រឹក្សាយុវជនកម្ពុជា(YCC)
៩. អង្គការអាក់សិនអេតកម្ពុជា ជាមួយសារព័ត៌មានអេឡិចត្រូនិកថ្មីៗ (Thmeythmey.com) ៕