អន្តរជាតិ
បោះឆ្នោតប្រធានាធិបតីអាមេរិក៖ ប៉េកាំង ប្រាប់វ៉ាស៊ីនតោនឲ្យឈប់អូសខ្លួនចូលរឿងផ្ទៃក្នុងទៀត អ្នកនាំពាក្យក្រសួងការបរទេសចិន ចាវ លីជៀន ក្នុងសន្និសីទព័ត៌មានថ្ងៃទី១០ ខែសីហា។ រូបភាព៖ ក្រសួងការបរទេសចិន
× ទីក្រុងប៉េកាំង នៅថ្ងៃទី១០ ខែសីហា បានប្រកាសជាថ្មីឲ្យទីក្រុងវ៉ាស៊ីនតោនឈប់អូសខ្លួនចូលក្នុងការបោះឆ្នោតប្រធានាធិបតីអាមេរិកខែវិច្ឆិកាខាងមុខ ព្រោះនេះនយោបាយផ្ទៃក្នុងរបស់អាមេរិកខ្លួនឯងប៉ុណ្ណោះ។ អ្នកនាំពាក្យក្រសួងការបរទេសចិន ចាវ លីជៀន (Zhao Lijian) បញ្ជាក់បែបនេះ ក្រោយមន្ត្រីប្រឆាំងចារកម្មអាមេរិកព្រមានការជ្រៀតជ្រែករបស់ចិនមកក្នុងការបោះឆ្នោត ហើយចិនចង់ឲ្យលោក ដូណាល់ ត្រាំ ចាញ់តែម្ដង។
លោក William Evanina នាយកមជ្ឈមណ្ឌលប្រឆាំងចារកម្ម និងសន្តិសុខ ជាអ្នកចុចឈ្មោះចិន បូកទាំងរុស្ស៊ី និងអ៊ីរ៉ង់ក្នុងសេចក្ដីថ្លែងការណ៍របស់ខ្លួនដែលបានលើកឡើងពីការគំរាមរបស់ប្រទេសទាំងបីចូលការបោះឆ្នោតខែវិច្ឆិកា។ ការចោទនេះ មិនមែនជារឿងថ្មីឡើយ តែអាមេរិកមិនសូវបានបង្ហាញព័ស្តុតាងជាក់លាក់ពីចិនឡើយ។ ចិន ក៏តែងបដិសេធការចោទប្រកាន់បែបនេះ ដោយចាត់ទុកការបោះឆ្នោតអាមេរិក ជាកិច្ចការផ្ទៃក្នុងរបស់អាមេរិកខ្លួនឯង។
ក្នុងសន្និសីទសារព័ត៌មាននៅថ្ងៃទី១០ ខែសីហា លោក ចាវ លីជៀន អ្នកនាំពាក្យក្រសួងការបរទេសចិន និយាយថា ចិនមិនដែលបានកកូរកកាយការបោះឆ្នោតអាមេរិក ហើយក៏គ្មានប្រយោជន៍អ្វីដើម្បីធ្វើបែបនេះនៅថ្ងៃអនាគតដែរ។ លោក ចាវ ក៏ប្រកាសជាថ្មីឲ្យអាមេរិកឈប់ប្រើល្បិតអូសចិនឲ្យចូលក្នុងនយោបាយផ្ទៃក្នុងរបស់ខ្លួន ហើយក៏ឈប់ប្រើពាក្យអនាគតដើម្បីគាំទ្រអំណះអំណាងរបស់ខ្លួន ដោយគ្មានព័ស្តុតាងអ្វីនោះ។
«ខ្ញុំត្រូវតែបញ្ជាក់ថា អ្នកនយោបាយអាមេរិកខ្លះតែងតែវាយតម្លៃអ្នកផ្សេងដោយស្តង់ដារបស់ខ្លួន ហើយតែងប្រើសម្មតិកម្ម ឬពាក្យអនាគតកាលដូចជា អាច ឬព្យាយាម ដើម្បីបង្ខូចចិនដោយគ្មានព័ស្តុតាង។» លោក ចាវ ឆ្លើយបែបនេះនៅពេលត្រួវបានសួរពីសេចក្ដីថ្លែងការណ៍របស់លោក Evanina ។ មន្ត្រីចិនដដែលបន្តថា មន្ត្រីអាមេរិកគួរធ្វើអ្វីដោយការទទួលខុសត្រូវ ហើយគិតគូរមុខមាត់ប្រទេសជាតិរបស់ខ្លួនផងដែរ។
អ្នកនាំពាក្យក្រសួងការបរទេសចិន ក៏ឆ្លៀតវាយបកទៅអាមេរិករឿងជ្រៀតជ្រែកកិច្ចការផ្ទៃក្នុងនេះ ដោយហៅការលើកឡើងបែបនេះជាមិនសមហេតុសមផល។ បើតាមលោក ចាវ អាមេរិកទៅវិញទេ ដែលកកូរកកាយផ្ទៃក្នុងចិនមិនចេះឈប់ឈរនោះ។
មន្ត្រីក្រសួងការបរទេសរូបនេះ ក៏បានប្រកាសជាចំហដែរថា គោលនយោបាយរបស់ប៉េកាំងទៅកាន់វ៉ាស៊ីនតោនមិនផ្លាស់ប្ដូរឡើយ។ នោះ គឺការប្ដេជ្ញាចិត្តមិនឲ្យមានជម្លោះ និងការប្រឈមមុខ ការគោរពគ្មានទៅវិញទៅមក ក៏ដូចជាកិច្ចសហប្រតិបត្តិការឈ្នះ-ឈ្នះផងដែរ។ ព្រមគ្នានេះ ចិនក៏ការពារផលប្រយោជន៍របស់ខ្លួនមិនឲ្យបាត់បង់ដែរ៕
© រក្សាសិទ្ធិដោយ thmeythmey.com