ជាតិ
ស្តារស្ទឹងព្រែកត្នោតឡើងវិញនៅឆ្នាំក្រោយ ដើម្បីជួយរំដោះទឹកជំនន់ពីភ្នំពេញ លោក ចាន់ យុត្ថា អ្នកនាំពាក្យក្រសួងធនធានទឹក
× ដើម្បីកាត់បន្ថយទឹកជំនន់របស់ស្ទឹងព្រែកត្នោត ហូរកាត់រាជធានីភ្នំពេញ ក្រសួងធនធានទឹក និងឧតុនិយម មានគម្រោងស្ដារស្ទឹងព្រែកត្នោតឡើងវិញនៅឆ្នាំ២០២១ ដើម្បីជួយសង្គ្រោះទឹកជំនន់ក្នុងរាជធានីភ្នំពេញ។ នេះបើតាមលោក ចាន់ យុត្ថា អ្នកនាំពាក្យក្រសួងធនធានទឹក និងឧតុនិយម នៅថ្ងៃទី ១១ ខែសីហា ឆ្នាំ២០២០ នាសន្និសីទសារព័ត៌មានស្ដីពី «ស្ថានភាពរបបជលសាស្ត្រក្នុងអាងទន្លេមេគង្គ និងទន្លេសាប នាពេលបច្ចុប្បន្ន» ។
អ្នកនាំពាក្យរូបនេះ បានបន្ថែមថា ជំនន់នៅភ្នំពេញមាន៣ផ្នែក ក្នុងនោះមានដូចជាការធ្លាក់ទឹកភ្លៀងនៅតំបន់រាជធានីភ្នំពេញ, ការគំរាមកំហែងពីទន្លេមេគង្គ, និងជំនន់ស្ទឹងព្រែកត្នោត ហើយសម្រាប់រាជធានីភ្នំពេញតំបន់ផ្សារដើមគរជាកន្លែងងាយលិចជាងគេ។
ជំនន់ទឹកនៅស្ទឹងមានព្រែកត្នោតមានបរិមាណ ១ ២០០ម៉ែត្រគូបក្នុង ១វិនាទី ហើយសមត្ថភាពរំដោះទឹកនៅមានកម្រិតនៅឡើយ។ នេះជាបញ្ហាបន្ទាន់ដើម្បីស្ដារឡើងវិញទាំងស្រុងនូវស្ទឹងព្រែកត្នោត ដើម្បីជួយសង្គ្រោះទឹកជំនន់នៅរាជធានីភ្នំពេញចាប់ពីដើមឆ្នាំ២០២១ ដោយប្រើរយៈពេលប្រមាណ ៣០ខែដើម្បីបញ្ចប់គម្រោង។
សូមបញ្ជាក់ថាគម្រោងស្ដារឡើងវិញនូវស្ទឹងព្រែកត្នោត ក្នុងគោលបំណងកាត់បន្ថយគ្រោះមហន្តរាយទឹកជំនន់ ដែលតែងតែយាយីដល់រាជធានីភ្នំពេញ និងបណ្តាខេត្តដែលទទួលឥទ្ធិពលពីរបបទឹកស្ទឹងព្រែកត្នោត។ ស្ទឹងព្រែកត្នោតមានចម្ងាយ ២០គីឡូម៉ែត្រពីរាជធានីភ្នំពេញ និងមានលទ្ធភាពស្រោចស្រពលើផ្ទៃដីស្រែចំនួន ១០ ១៥០ហិកតានៅរដូវប្រាំង និង ១៧ ៧៣០ហិកតានៅរដូវវស្សា៕
Tag:
ស្ទឹងព្រែកត្នោត
ជំនន់ទឹកភ្លៀង
© រក្សាសិទ្ធិដោយ thmeythmey.com