ជាតិ
យុវជន ឈុន ហ៊ួ នៅស្រុកគងពិសី ដាក់គោលដៅនាំចេញសាច់កង្កែបទៅក្រៅប្រទេស
× មានស្រុកកំណើតនៅភូមិក្របីត្រាំ ឃុំជង្រុក ស្រុកគងពិសី ខេត្តកំពង់ស្ពឺ យុវជន ឈុន ហ៊ួ ចាប់ផ្ដើមចិញ្ចឹមកង្កែបយកសាច់នៅឆ្នាំ២០១៨។ បច្ចុប្បន្ន យុវកសិកររូបនេះ មានកង្កែបពូជ ២ពាន់ក្បាល និងកូនកង្កែបដែលអាចលក់បានប្រមាណ ២ម៉ឺនក្បាល ដោយអាចរកចំណូលបានប្រមាណ ៥០០ដុល្លារក្នុងមួយខែ។ នេះបើតាមលោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់និងនេសាទ នាឱកាសចុះពិនិត្យការដ្ឋានចិញ្ចឹមកង្កែបរបស់យុវជនខាងលើនៅថ្ងៃទី ៩ ខែសីហា ឆ្នាំ២០២០។
ចាប់ផ្ដើមដំបូងដោយខ្វះខាតផ្នែកហិរញ្ញវត្ថុ ឈុន ហ៊ួ បានចាប់ផ្ដើមទុន ៣ម៉ឺនដុល្លារជាមួយមិត្តភិក្តម្នាក់ឈ្មោះ ឈុន កែវ ដើម្បីប្រកបរបរនេះ ប៉ុន្តែលោកក៏ជួបបញ្ហាជាបន្តបន្ទាប់ទាំងបញ្ហាហិរញ្ញវត្ថុ និងបច្ចេកទេស។ ទោះបីជួបបញ្ហាដូចនេះក្ដី យុវជនរូបនេះ មិនបានបោះបង់ការចិញ្ចឹមកង្កែបនោះទេ។ «ឆន្ទៈ និងគោលដៅច្បាស់លាស់» ជំរុញឲ្យយុវជន ឈុន ហ៊ួ អាចសម្រេចជោគជ័យមកដល់សព្វថ្ងៃ ដោយរកចំណូលបាន ៥០០ដុល្លារក្នុងមួយខែ។ នេះបើតាមយុវជន ឈុន ហ៊ួ ថ្លែងប្រាប់សារព័ត៌មានThmeyThmey25 នៅថ្ងៃទី ១០ ខែសីហា ឆ្នាំ២០២០។
បើតាមទំព័រហ្វ៊េសប៊ុករបស់លោក វេង សាខុន ដោយសង្កេតឃើញទីផ្សារកង្កែបមានការកើនឡើង យុវជន ឈុន ហ៊ួ មានបំណងពង្រីកការចិញ្ចឹមរបស់ខ្លួនឲ្យកើនឡើងទ្វេដង ដើម្បីផ្គត់ផ្គង់តាមតម្រូវការទីផ្សារ។
យុវជនវ័យ ២៨ឆ្នាំរូបនេះ មានផែនការអនាគតចង់ផលិតកូនឲ្យបាន ១៥ម៉ឺនកូនក្នុងមួយខែ និងបង្កើនផលិតកង្កែបសាច់ និងចង់ប្រែក្លាយខ្លួនពីកសិករ ទៅជាកសិពាណិជ្ជករ និងនាំចេញកង្កែបសាច់ចេញទៅកាន់ទីផ្សារក្រៅប្រទេស ជាពិសេសចិន។ លើសពីនេះ កសិករ ឈុន ហ៊ួ មានបំណងចងក្រងយុវជនចិញ្ចឹមកង្កែប ដើម្បីផលិតកូន និងផលិតកង្កែបសាច់ផ្គត់ផ្គង់ឲ្យទីផ្សារ និងនាំចេញ។
បច្ចុប្បន្នកសិដ្ឋានចិញ្ចឹមកង្កែបរបស់យុវជន ឈុន ហ៊ួ មានទីតាំងស្ថិតនៅភូមិក្របីត្រាំ ឃុំជង្រុក ស្រុកគងពិសី ខេត្តកំពង់ស្ពឺ មានមេកង្កែបពូជចំនួន ៧០០ក្បាល និងបា ១ ៣០០ក្បាល។ បើសិនកសិដ្ឋានមានលទ្ធភាពក្នុងមួយថ្ងៃអាចលក់កូនកង្កែបពី ១,៥លានរៀលទៅ ២លានរៀល និងកង្កែបសាច់់ក្នុងមួយថ្ងៃអាចលក់បាន ៣០០គីឡូផ្គត់ផ្គង់ទីផ្សារក្នុងតំបន់ ដែលក្នុងគីឡូលក់បាន ៨ ០០០រៀល ។
ទីផ្សារកង្កែបលោក ឈុន ហ៊ួ កំពុងមានការកើនឡើងស្ទើរគ្រប់បណ្តាខេត្តមកបញ្ជាទិញតាមបណ្ដាញសង្គម និងប្រព័ន្ធផ្សព្វផ្សាយនានា ហើយប្រសិនបើមានលទ្ធភាពផលិតកូន អាចលក់បានរហូតដល់ ៥ លានក្បាលក្នុងមួយខែ៕
Tag:
ចិញ្ចឹមកង្កែប
វារីវប្បកម្ម
© រក្សាសិទ្ធិដោយ thmeythmey.com