កីឡាអន្តរជាតិ
អន្តរជាតិ
Europa៖ Sevilla ឡើងទៅជួប Man Utd ឯ Shaktar ប៉ះ Inter Milan វគ្គ១/២ផ្តាច់ព្រ័ត្រ
× Sevilla បានឡើងទៅជួប Manchester United នៅវគ្គពាក់កណ្តាលផ្តាច់ព្រ័ត្រពានរង្វាន់ Europa League ក្រោយទម្លាក់ Wolverhampton Wanderers នៅវគ្គ៨ក្រុមក្នុងលទ្ធផល ១-០។ Shakhtar Donetsk ដែលឈ្នះ FC Basel ៤-១ ក៏ត្រូវបន្តទៅប៉ះ Inter Milan នៅវគ្គ១/២ ផ្តាច់ព្រ័ត្រផងដែរ។
Lucas Ocampos បានក្លាយជាវីរបុរសសម្រាប់ក្រុម Sevilla តាមរយៈការរកគ្រាប់ស៊ុតបញ្ចូលទីគ្រាប់បាល់ជ័យជម្នះនៅនាទី៨៨ សម្រាប់ជំនួបវគ្គ៨ក្រុមជាមួយក្រុមអង់គ្លេស Wolves ក្នុងទឹកដីកណ្តាល នាកីឡដ្ឋាន Schauinsland-Reisen-Arena ប្រទេសអាល្លឺម៉ង់ នៅរាត្រីថ្ងៃទី១១ ខែសីហា។
ដោយសារការប្រកួតក្របខណ្ឌទី២អឺរ៉ុបរដូវកាល២០១៩/២០នេះ ជួបបញ្ហាជំងឺរាតត្បាត COVID-19 ទើបតម្រូវឲ្យមានការប្រកួតតែមួយជើងប៉ុណ្ណោះចាប់ពីវគ្គ៨ក្រុមដល់វគ្គផ្តាច់ព្រ័ត្រ ដូច្នេះជ័យជម្នះ ១-០ នេះគ្រប់គ្រាន់ដើម្បីជួយក្រុម Sevilla បន្តទៅវគ្គពាក់កណ្តាលផ្តាច់ព្រ័ត្រតែម្តង ដោយត្រូវប៉ះ Man Utd ដែលឡើងទៅចាំមុនរួចទៅហើយ។ Sevilla របស់អេស្ប៉ាញ ជាក្រុមដែលជោគជ័យជាងគេនៅអឺរ៉ុបដែលឈ្នះពាន Europa League នេះច្រើនជាងគេចំនួន៥លើក។
ដោយឡែក Shakhtar Donetsk ក៏បានកៅអីឈានទៅវគ្គពាក់កណ្តាលផ្តាច់ព្រ័ត្រផងដែរ ក្រោយទទួលបានជ័យជម្នះដល់ទៅ ៤-១ លើក្រុម Basel នាជំនួបវគ្គ៨ក្រុម។ ៤គ្រាប់របស់ក្រុមពីលីគកំពូលអ៊ុយក្រែនសម្រេចបានដោយ Junior Junior MoraesMoraes, TaisonTaison, Alan Alan PatrickPatrick និង DodoDodo រីឯ១គ្រាប់របស់ Basel ក្រុមពីស្វ៊ីសធ្វើបានដោយ Ricky van Wolfswinkel។
Shakhtar ត្រូវឡើងទៅជួប Inter Milan នៅវគ្គ១/២ ផ្តាច់ព្រ័ត្រ នៅរាត្រីថ្ងៃទី១៧ ខែសីហា វេលាម៉ោង ២:០០ នាទីអាធ្រាត្រ [ម៉ោងនៅកម្ពុជា] ពោលនៅក្រោយមួយថ្ងៃនាការជួបគ្នារវាង Man Utd និង Sevilla។ ទាំងពីគូនេះ ត្រូវប៉ះគ្នានៅទឹកដីកណ្តាលក្នុងប្រទេសអាល្លឺម៉ង់ដូចគ្នា៕
© រក្សាសិទ្ធិដោយ thmeythmey.com