របាយការណ៍ថ្មីមួយ ដែលរៀបចំឡើងដោយកម្មវិធីអភិវឌ្ឍន៍សហប្រជាជាតិ (UNDP) និងអង្គភាពទំនាក់ទំនងគោលនយោបាយ របស់សាកលវិទ្យាល័យ Cambridge បានរកឃើញថា កម្រិតនៃការអនុវត្តឧស្សាហកម្ម ៤.០ នៅក្នុងប្រទេសកម្ពុជានៅមានទាប ខណៈឧបសគ្គមួយចំនួន នឹងត្រូវការដោះស្រាយទាំងក្នុងទិដ្ឋភាពហេដ្ឋារចនាសម្ព័ន្ធ និងជំនាញ ដើម្បីអនុញ្ញាតឲ្យកម្ពុជាអនុវត្តវាបាន។ យ៉ាងណា អ្នកជំនាញកម្ពុជាយល់ថា ផ្លូវនៅវែងឆ្ងាយណាស់ក្នុងការអនុវត្ត ឧស្សាហកម្ម ៤.០ ។
របាយការណ៍ដែលចុះផ្សាយនៅថ្ងៃ១១ ខែសីហា បង្ហាញថា បច្ចេកវិទ្យាឌីជីថលក្នុងក្រុមហ៊ុនភាគច្រើន (ជាង៩០ភាគរយ) គឺស្ថិតនៅកម្រិតមូលដ្ឋាន ខណៈក្រុមហ៊ុនតិចតួចប៉ុណ្ណោះ (១-៣ភាគរយ) បានអនុវត្តបច្ចេកវិទ្យាឌីជីថលនៅកម្រិតជឿនលឿន។
ថ្លែងអំឡុងពិធីដាក់ដំណើរការរបាយការណ៍ចំណងជើងថា «ការសម្របខ្លួន និងការអនុវត្តឧស្សាហកម្ម ៤.០ ក្នុងប្រទេសកម្ពុជា» (
Adaptation and Adoption of Industry 4.0 in Cambodia) លោក Nick Beresford តំណាងអចិន្ត្រៃយ៍របស់ UNDP ប្រចាំកម្ពុជា លើកឡើងដូច្នេះថា៖«មានសហគ្រាសតិចតួចណាស់នៅកម្ពុជា ដែលបានយល់ដឹងពីបច្ចេកវិទ្យាឧស្សាហកម្ម ៤.០ ដែលជាបច្ចេកវិទ្យាថ្មី និងមានសហគ្រាសរឹតតែតិចទៀត ដែលយកបច្ចេកវិទ្យាទាំងនេះមកប្រើប្រាស់»។
លោកបន្តថា៖«ជាលទ្ធផល សេដ្ឋកិច្ចរបស់ប្រទេសនេះ ខកខានក្នុងការបង្កើនផលិតភាពរបស់ខ្លួនឲ្យបានខ្ពស់ ហើយកម្មករនយោជិត ក៏ខកខានក្នុងការទទួលការងារដែលមានជំនាញកម្រិតខ្ពស់ និងទទួលបានបៀវត្សកាន់តែប្រសើរជាងមុនផងដែរ»។
ជារួមទៅ ការអនុវត្តឧស្សាហកម្ម ៤.0 គឺត្រូវបានចាត់ទុកជាដំណើរការមួយ ដែលរនាំងជាមូលដ្ឋាន នឹងត្រូវការដោះស្រាយទាំងក្នុងទិដ្ឋភាពហេដ្ឋារចនាសម្ព័ន្ធ និងជំនាញ។
តួយ៉ាង របាយការណ៍កម្រាស់៦៩ទំព័រនេះ បង្ហាញថា ក្នុងកម្រិតក្រុមហ៊ុន រនាំងនៃការអនុវត្តឧស្សាហកម្ម ៤.០ ក្នុងប្រទេសកម្ពុជា គឺរួមមាន កង្វះខាតការយល់ដឹងពីបច្ចេកវិទ្យាឌីជីថល និងផលប្រយោជន៍របស់វា, យល់ឃើញថាបច្ចេកវិទ្យាទាំងនោះមានតម្លៃខ្ពស់, ការងាកចេញពីការប្រើបច្ចេកវិទ្យាថ្មី, គម្លាតជំនាញ, ការទទួលបានជំនួយផ្នែកបច្ចេកវិទ្យា និងហ្វឹកហាត់នៅមានកម្រិត និងខ្វះខាតផ្នែកហិរញ្ញវត្ថុ ជាដើម។
ប្រទេសកម្ពុជា ជាប់ចំណាត់ថ្នាក់ចុងក្រោយគេក្នុងចំណោមបណ្ដាប្រទេសសមាជិកអាស៊ានផ្សេងទៀតក្នុងការត្រៀមខ្លួនរួចរាល់ដើម្បីអនុវត្តបច្ចេកវិទ្យាឌីជីថល។ នេះបើតាមរបាយការណ៍សន្ទស្សន៍នវានុវត្តន៍ពិភពលោក ឆ្នាំ២០១៩ ដែលរៀបចំឡើងដោយសាកលវិទ្យាល័យ Cornell ខណៈកម្ពុជា ជាប់ចំណាត់ថ្នាក់លេខ ៩៨ ក្នុងចំណោមប្រទេសទាំង១២៧ ។
និយាយដល់ពិន្ទុវិញ របាយការណ៍ដដែល រកឃើញថា ផ្នែកហេដ្ឋារចនាសម្ព័ន្ធទាំងការដឹកនាំជញ្ជូន អេឡិចត្រូនិក និងរូបវន្ត ទទួលពិន្ទុទាបជាង៣០, ផ្នែកការងារ ជំនាញ់ និងអប់រំ ទទួលពិន្ទុទាប ចន្លោះពី១,៩ ដល់៤៥ , ផ្នែកគ្រោងឆ្អឹងស្ថាប័ន ទទួលពិន្ទុចន្លោះពី២ ដល់ ៨៧ និងចុងក្រោយ ផ្នែកសមត្ថភាពនិងការទទួលបានចំណេះដឹង ទទួលពិន្ទុចន្លោះពី ២ ទៅ ៥ ។
ចំណាត់ថ្នាក់នៃបណ្ដាប្រទេសក្នុងតំបន់អាស៊ានដោយគិតពីនវានុវត្តន៍ និងការត្រៀមខ្លួនរួចរាល់សម្រាង់ការអនុវត្ត ឌីជីថល
ថ្លែងប្រាប់សារព័ត៌មានថ្មីៗ នៅថ្ងៃទី១១ ខែសីហា លោកបណ្ឌិត ម៉ី កល្យាណ ទីប្រឹក្សាជាន់ខ្ពស់នៃឧត្ដមក្រុមប្រឹក្សាសេដ្ឋកិច្ចជាតិ ដែលជាវាគ្មិនមួយរូបក្នុងកម្មវិធីខាងលើ លើកឡើងថា កម្ពុជានៅផ្លូវវែងឆ្ងាយក្នុងការអនុវត្តឧស្សាហកម្ម ៤.០ ដ្បិតវាចាប់តាំងពីបច្ចេកវិទ្យាខ្ពស់ៗ។
យ៉ាងណា លោកបណ្ឌិតសេដ្ឋកិច្ចជើងចាស់រូបនេះ ចង់ឲ្យមានការអនុវត្តបច្ចេកវិទ្យាជឿនលឿននេះ ក្នុងវិស័យកសិកម្ម និងក្នុងសហគ្រាសធុនតូចនិងមធ្យម។ ម្យ៉ាងទៀត លោកនិយាយបែបលេងសើចថា៖«កុំសង្ឃឹមថា [ឧស្សាហកម្ម៤.០] ជាទេវតា អាហ្នឹងជារបស់ទិព្វ […] ឌីជីថល ក៏ឌីជីថល ទៅ ក៏ប៉ុន្តែកុំភ្លេចបច្ចេកទេសជាគ្រឹះ»។
សូមបញ្ជាក់ថា ឧស្សាហកម្ម ៤.0 ឬស្គាល់ម្ស៉ាងទៀតថា បដិវត្តន៍ឧស្សាហកម្មដំណាក់កាលទី៤ គឺជា សមាហរណកម្មរវាងបណ្ដាញអ៊ីនធឺណែតនៃសម្ភារ (IoT៖ ការតភ្ជាប់សម្ភារដោយប្រើប្រព័ន្ធអ៊ីនធឺណិត ដើម្បីអាចបញ្ចូល និងទទួលទិន្នន័យ) និងបណ្ដាញបច្ចេកវិទ្យារូបវន្តផ្សេងៗទៀត ដូចជា បច្ចេកវិទ្យាវិភាគទិន្នន័យ ផលិតកម្មតាមការបន្ថែមស្រទាប់ (ឬការបោះពុម្ភ 3D printing) បច្ចេកវិទ្យាប្រើរ៉ូបូត Blockchain (ប្រតិបត្តិការតាមប្រព័ន្ធអ៊ីនធឺណិត ដែលចងភ្ជាប់គ្នាជាខ្សែមិនអាចកែមួយៗបាន) ការប្រើកុំព្យូទ័រមានសមត្ថភាពខ្ពស់ (high performance computing) បញ្ញាសិប្បនិម្មិត និងបច្ចេកវិទ្យាជំនួសខួរក្បាលមនុស្ស សម្ភារទំនើបៗ និងការពិតជំនួយដោយកុំព្យូទ័រ (Augmented reality) ជាដើម ៕
ភាពខ្សោយផ្នែកការត្រៀមខ្លួនក្នុងការអនុវត្តឌីជីថល របស់ប្រទេសកម្ពុជា