COVID-19
អន្តរជាតិ
ចិន បន្ធូរការរឹតត្បិតការធ្វើដំណើរជាមួយប្រជាជនអឺរ៉ុប
× រដ្ឋាភិបាលចិន បានផ្ដើមបន្ធូរបន្ថយការរឹតត្បិតលើការចូលមកដល់ពីប្រជាជន ដែលធ្វើដំណើរមកពីប្រទេសក្នុងតំបន់អឺរ៉ុបចំនួន៣៦ ប៉ុន្មានខែក្រោយមនុស្សរាប់ពាន់នាក់បានជាប់គាំងនៅពេលប្រទេសនេះបិទព្រំដែនខ្លួន និងផ្អាកការហោះហើរដើម្បីទប់ស្កាត់ COVID-19 ។
ជនបរទេសស្ទើរតែទាំងអស់ ត្រូវបានហាមឃាត់ពីការចូលប្រទេសចិន នៅពេលរដ្ឋាភិបាលក្រុងប៉េកាំង បានដាក់វិធានការទប់ស្កាត់ COVID-19 ក្នុងខែមីនា ហើយនេះរាប់ទាំងពលរដ្ឋចិន ធ្វើការនៅបរទេសផងដែរ។
ក៏ប៉ុន្តែក្នុងសប្តាហ៍នេះ រដ្ឋាភិបាល ចិន បានប្រកាសថា ខ្លួននឹងផ្ដើមបន្ធូរបន្ថយលក្ខខណ្ឌខ្លះសម្រាប់ប្រជាជនអឺរ៉ុបដែលមានបំណងចូលមកកាន់ប្រទេសចិនវិញ។ យោងតាមសេចក្តីជូនដំណឹងរបស់ស្ថានទូតចិនក្នុងទីក្រុងបែរឡាំង នៅថ្ងៃទី ១២ ខែសីហា ច្បាប់ថ្មី នឹងអនុញ្ញាតឲ្យអ្នកកាន់លិខិតឆ្លងដែនអឺរ៉ុបមកពីប្រទេសចំនួន ៣៦ រួមមាន បារាំង អាល្លឺម៉ង់ និងចក្រភពអង់គ្លេស ដែលមានលិខិតបញ្ជាក់និវេសនដ្ឋានមានសុពលភាព អាចដាក់ពាក្យសុំទិដ្ឋាការចិន ដោយគ្មានលិខិតអញ្ជើញ។
ម្យ៉ាងទៀត អ្នកដែលចង់ត្រលប់ទៅប្រទេសចិនវិញ ត្រូវតែដាក់ពាក្យស្នើសុំទិដ្ឋាការពួកគេជាថ្មី ព្រោះថា ទិដ្ឋាការដែលចេញមុនពេលជំងឺរាតត្បាតនេះ ត្រូវទុកជាមោឃៈ។ កន្លងទៅ ចិនបានអនុញ្ញាតឲ្យបុគ្គលិកបរទេសដែលមានជំនាញតិចតួចប៉ុណ្ណោះត្រលប់មកកាន់ប្រទេសខ្លួនវិញ ដោយពួកគេទទួលបានលិខិតអញ្ជើញផ្លូវការពិសេស ។
កាលពីដើមសប្តាហ៍នេះ ក្រសួងការបរទេសចិន បានបញ្ជាក់ក្នុងសេចក្តីថ្លែងការណ៍ថា អ្នកកាន់លិខិតឆ្លងដែនអឺរ៉ុបដែលមានសិទ្ធិ នឹងត្រូវអនុញ្ញាតឲ្យដាក់ពាក្យសុំទិដ្ឋាការចិនបាន ដោយអត់គិតថ្លៃទេ។ យ៉ាងណាមិញ រាល់អ្នកដែលមកកាន់ប្រទេសចិនពីបរទេស នៅតែជាប់វិធានការធ្វើចត្តាឡីស័ក១៤ថ្ងៃ ហើយនឹងត្រូវស្វែងសំបុត្រយន្តហោះដោយខ្លួនឯង៕
Tag:
ចិន
អឺរ៉ុប
COVID-19
© រក្សាសិទ្ធិដោយ thmeythmey.com