ជាតិ
បទសម្ភាសន៍
លោក ជួន ភិរម្យ ប្រាប់ពីបទពិសោធដើរកម្សាន្តបែបផ្សងព្រេងតាមព្រៃជិត២០ឆ្នាំរបស់ខ្លួន
× ភ្នំពេញ៖ បច្ចុប្បន្ន ដំណើរកម្សាន្តបែបផ្សងព្រេង ដូចជា ដើរព្រៃ បោះតង់ ឡើងភ្នំ មានការពេញនិយមសម្រាប់មនុស្សគ្រប់វ័យ ទោះបីជាការកម្សាន្តបែបនោះមានការពិបាកជាងដំណើរកម្សាន្តធម្មតាក៏ដោយ។ ក្នុងបទសម្ភាសជាមួយសារព័ត៌មាន ThmeyThmey25 លោក ជួន ភិរម្យ ដែលធ្លាប់បានដើរលេងផ្សងព្រេងជិត២០ឆ្នាំ បានចែករំលែកបទពិសោធរបស់ខ្លួនក្នុងការដើរលេងព្រៃ ក៏ដូចជាការត្រៀមខ្លួនមុនពេលធ្វើដំណើរផងដែរ។
មានបទពិសោធដើរព្រៃភ្នំបែបផ្សងព្រេង និងជាអ្នកដឹកនាំក្រុមដើរព្រៃ លោក ជួន ភិរម្យ បានរៀបរាប់ពីបទពិសោធរបស់ខ្លួន មកកាន់សារព័ត៌មាន ThmeyThmey25 យ៉ាងដូច្នេះ៖«បើឥឡូវយើងចង់ទៅផ្សងព្រេងនៅតំបន់មួយ ទីមួយយើងត្រូវដឹងថាតំបន់ហ្នឹងយើងអាចទៅដល់ដោយរបៀបម៉េច អាហ្នឹងយើងត្រូវសិក្សាពីស្ថានភាពផ្លូវ។ បន្ទាប់មកទៀត យើងត្រូវរៀបចំសម្ភារ តើសម្ភារអ្វីខ្លះ ដែលយើងត្រូវយកទៅ»។
បើតាមលោក ជួន ភិរម្យ សម្ភារដែលត្រូវយកទៅ ដូចជាសម្លៀកបំពាក់ បើទៅត្រឹម១ថ្ងៃ ឬ៣ថ្ងៃ មិនចាំបាច់យកទៅច្រើនពេកនោះទេ ហើយត្រូវយកសម្លៀកបំពាក់ដែលស្រាល ងាយស្ងួត ត្រូវនឹងការឡើងភ្នំ ឬដើរព្រៃ។ ក្រៅពី សម្លៀកបំពាក់ ស្បែកជើងក៏ជារឿងសំខាន់ក្នុងការដើរព្រៃដែរ យើងត្រូវជ្រើសរើសស្បែកជើងឡើងភ្នំ ដើម្បីឲ្យងាយស្រួលសម្រាប់ការដើរ។ នៅពេលដើរព្រៃ អាកាសធាតុត្រជាក់ អ្វីដែលត្រៀមដើម្បីកាត់បន្ថយភាពត្រជាក់នោះគឺ ភួយ(Sleeping Bag),តង់ដែលអាចទប់ទឹកភ្លៀងបាន និងស្រាល។
«សម្រាប់ម្ហូបអាហារ យើងមិនអាចយកទៅទាំងដុលដូចយើងនៅផ្ទះបានទេ យើងត្រូវគិតថាមួយពេលយើងញាំប៉ុណ្ណា។ ជាធម្មតាមនុស្សយើងពេលដើរភ្នំគាត់ត្រូវការកាល់ឡូរីប្រហែលជាខ្ទង់២៥០០ ទៅ៥០០ពាន់កាល់ឡូរី អ៊ីចឹង សម្រាប់ម្ហូបអាហារ៣ពេល ប្រហែលជាខ្ទង់កន្លះគីឡូអីហ្នឹង»។ នេះជាការលើកឡើងរបស់ លោក ភិរម្យ ដោយបានបន្តថា ពេលដើរព្រៃបែបនេះ ត្រូវមានអ្នកដឹកនាំក្រុម ដែលមានជំនាញ និងដឹងច្បាស់ ហើយអាចនាំយើងឲ្យទៅដល់គោលដៅដោយមិនមានបញ្ហា។ លើសពីនេះ អ្នកដើរព្រៃត្រូវមានថង់សំរាម ដើម្បីទុកដាក់សំរាមដែលងាយរលាយយកត្រឡប់មកវិញ ដោយកុំបន្សល់ទុកនៅទីនោះ។
អ្នកដើរព្រៃរូបនេះ ណែនាំឲ្យអ្នកចង់ដើរព្រៃ ឬឡើងភ្នំ ត្រូវហាត់ដើរ ឬរត់រយៈពេល៣ទៅ៦ខែជាមុនសិន ព្រោះផ្លូវឡើងភ្នំមានចំណោទខុសពីផ្លូវធម្មតា ហើយនៅពេលឡើងសាច់ដុំត្រូវធ្វើការច្រើន។ លោក ភិរម្យបញ្ជាក់ថា បើសិនជាមិនហាត់ជាមុនក៏មានបញ្ហាដែរ តែវានឹងធ្វើឲ្យឆាប់ហត់ និងអស់កម្លាំងពេលត្រឡប់មកវិញ។
បុរសវ័យ៤០ឆ្នាំរូបនេះ មិនមានតំណម ឬជំនឿអ្វីនៅពេលដើរព្រៃនោះទេ ដោយលោកបានលើកឡើងយ៉ាងដូច្នេះថា៖«ពេលដែលទៅដល់កន្លែងនោះហើយ សំរាមទាំងប៉ុន្មាន ទាំងសំរាមមិនរលាយ ទាំងសំរាមរលាយ ត្រូវប្រមូលទាំងអស់ត្រឡប់មកវិញ នេះជាតំណមរបស់បង»។ ក្នុងនាមជាអ្នកដឹកនាំក្រុមដើរលេងព្រៃ លោក ភិរម្យ សប្បាយចិត្តក្នុងការចែករំលែកបទពិសោធនានាដែលលោកមានទៅកាន់អ្នកចង់ដើរលេងព្រៃ និងចង់ចូលរួមជាមួយរូបលោក។ លោក ភិរម្យ បានលើកឡើងបន្ថែមថា សក្ដានុពលទេសចរណ៍ធម្មជាតិក្នុងប្រទេសកម្ពុជាគឺខ្ពស់ ហើយតំបន់ទេសចរណ៍ទាំងអស់នោះសុទ្ធតែមិនទាន់កែច្នៃ នៅជាលក្ខណៈធម្មជាតិ ដូច្នេះពេលទៅកម្សាន្តគឺដូចនៅក្នុងធម្មជាតិពិតៗ៕
Tag:
ទេសចរណ៍
ផ្សងព្រេង
© រក្សាសិទ្ធិដោយ thmeythmey.com