COVID-19
អន្តរជាតិ
ប្រជាជននូវែលសេឡង់ ទិញសម្ភារប្រើប្រាស់ចាំបាច់ទុក ក្រោយការប្រកាសការរឹតត្បិតជាថ្មី។ រូបភាពAFP
×![]()
ដោយ: តន ចាន់រិទ្ធារ៉ា
នូវែលសេឡង់ កំពុងញាប់ដៃជើងក្នុងការរកប្រភពចម្លងជំងឺ COVID-19 នៅទីក្រុង Auckland ដែលមកទល់ពេលនេះមានករណីឆ្លងថ្មីសរុប១៧ហើយ។ ប្រជាជនក្នុងទីក្រុង Auckland នាំគ្នាសម្រុកទៅផ្សារទំនើបដើម្បីទិញសម្ភារប្រើប្រាស់ចាំបាច់ទុក ខណៈរដ្ឋាភិបាលប្រកាសរឹតបន្តឹងជាថ្មីក្នុងទីក្រុងមួយនេះ។ នាយករដ្ឋមន្ត្រី ចាស៊ីនដា អាឌើន ព្រមាននៅថ្ងៃទី១៣ ថា ករណីឆ្លងថ្មីទំនងនឹងត្រូវបានរកឃើញបន្ថែមទៀត។
១០២ថ្ងៃក្រោយគ្មានករណីឆ្លង COVID-19 ក្នុងសហគមន៍ នូវែលសេឡង់ក៏មានការឆ្លងជាចង្កោមថ្មីក្នុងប្រទេស។ នៅថ្ងៃទី១៣ ខែសីហា ក្រសួងសុខាភិបាលនូវែលសេឡង់ ប្រកាសពីការរកឃើញករណីឆ្លង១៣នាក់ថ្មីនៅទីក្រុង Auckland បន្ទាប់ពីរកឃើញមួយគ្រួសារបួននាក់ ជាករណីឆ្លង COVID-19 ថ្មីរបស់នូវែលសេឡង់កាលពីពីរថ្ងៃមុន។ ប្រទេសនេះក៏មានករណីឆ្លងនាំចូលពីបរទេសមួយផងដែរ ដែលធ្វើឲ្យករណីឆ្លងបច្ចុប្បន្នមាន៣៦ ខណៈករណីឆ្លងសរុបទូទាំងប្រទេសមាន១៥៨៩នាក់។
នាសន្និសីទសារព័ត៌មានថ្ងៃទី១៣ ខែសីហា នាយករដ្ឋមន្ត្រីនូវែលសេឡង់ ចាស៊ីនដា អាឌើន និយាយថា នូវែលសេឡង់កំពុងស្ថិតក្នុងស្ថានភាពយ៉ាប់យ៉ឺន តែវានឹងត្រូវបានដោះស្រាយយ៉ាងប្រញាប់ តាមវិធីសាស្ត្រសមស្រប។ អ្នកស្រី ក៏កត់សម្គាល់ដែរថា ស្ថានភាពនឹងអាក្រក់ មុនប្រែទៅជាល្អនៅពេលក្រោយ ហើយករណីឆ្លងថ្មីទំនងជាត្រូវប្រកាសនៅថ្ងៃខាងមុខទៀត។ នេះបើតាមការផ្សាយរបស់ទីភ្នាក់ងារព័ត៌មាន Reuters ។
ពេលនេះ អាជ្ញាធរនូវែលសេឡង់ កំពុងតាមរកប្រភពចម្លងថ្មីនេះ។ ក្នុងចំណោមករណីឆ្លងថ្មី មានករណីបីធ្វើការនៅកន្លែងស្តុក ដែលជាទីតាំងសមាជិកម្នាក់ក្នុងចំណោមគ្រួសារបួននាក់ឆ្លង COVID-19 មុនគេ ធ្វើការដែរ។ អគ្គនាយកសុខាភិបាលនូវែលសេឡង់ Ashley Bloomfield និយាយថា អាជ្ញាធរខិតកាន់តែជិតក្នុងការរកអ្នកជំងឺដំបូងគេបង្អស់។ លោក Bloomfield ធ្លាប់និយាយថា វីរុសទំនងចូលនូវែលសេឡង់តាមការទំនិញកកដែលដឹកជញ្ជូនពីក្រៅប្រទេស។
ជាមួយករណីឆ្លងថ្មី ទីក្រុង Auckland ដែលជាទីក្រុងធំជាងគេនៅនូវែលសេឡង់ ត្រូវស្ថិតក្រោមការរឹតត្បិតកម្រិតបី ហើយផ្នែកឯទៀតរបស់ប្រទេសនេះ ស្ថិតក្រោមវិធានការកម្រិតពីរ។ ប្រជាជនទីក្រុងនេះ នាំគ្នាទិញសម្ភារចាំបាច់ផ្សេងទុក ព្រោះប្រជាជនមិនត្រូវបានអនុញ្ញាតឲ្យដើរហើរក្រៅផ្ទះឡើយ បើគ្មានការចាំបាច់អំឡុងពេលការរឹតបន្តឹងនេះ។ ប្រជាជនខ្លះទៀត តម្រង់ជួរទទួលការធ្វើតេស្តរកជំងឺ COVID-19 ផងដែរ៕
Tag:
នូវែលសេឡង់
COVID-19
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
