COVID-19
អន្តរជាតិ
លោក ស៊ី ស្នើឲ្យបញ្ចប់ការខ្ជះខ្ជាយអាហារ ហើយបង្កើនការសន្សំសំចៃ ខណៈ COVID-19 វាយលុក
ប្រធានាធិបតីចិន ស៊ី ជិនភីង ។ រូបភាព Xinhua
×![]()
ប្រធានាធិបតីចិន ស៊ី ជិនពីង បានអំពាវនាវឲ្យបញ្ចប់ការខ្ជះខ្ជាយអាហារ ហើយបង្កើនការសន្សំសំចៃ ខណៈចិនកំពុងរងផលប៉ះពាល់ដោយសារជំងឺ COVID-19 ។ លោក ស៊ី ដែលជាលេខាបក្សកុម្មុនីស្តចិន និងប្រធានគណៈកម្មការយោធាផងដែរនោះ ក៏ណែនាំឲ្យមានការដាក់បញ្ចូលលក្ខខណ្ឌសន្សំសំចៃអាហារ ចូលទៅក្នុងសេចក្តីណែនាំរបស់លោក។ នេះបើការផ្សាយរបស់ទីភ្នាក់ងារព័ត៌មានចិន Xinhua នៅថ្ងៃទី១១ ខែសីហា។
ការខ្ជះខ្ជាយអាហារគឺជារឿងដ៏រន្ធត់ និងព្រួយបារម្ភ។ នេះជាសម្ដីរបស់ លោក ស៊ី ជិនភីង ដែលផ្សាយដោយទីភ្នាក់ងារព័ត៌មានរដ្ឋចិន Xinhua ។ ប្រធានាធិបតីដោយកត់សម្គាល់ថា សុវត្ថិភាពស្បៀង ជារឿងមិនអាចភ្លេចបានឡើយ ជាពិសេសក្នុងពេលមានជំងឺឆ្លងCOVID-19 និងបើទោះបីជាចិនប្រមូលផលបានយ៉ាងច្រើនប៉ុន្មានឆ្នាំជាប់គ្នាក៏ដោយ។
ដើម្បីចាត់ជាវិធានការក្នុងការបញ្ឈប់ការខ្ជះខ្ជាយអាហារ លោក ស៊ី បានសង្កត់ធ្ងន់ទៅលើការពង្រឹងច្បាប់ និងការឃ្លាំមើល។ ត្រង់នេះ ប្រមុខរដ្ឋចិនបន្ថែមថា៖ «វាជាការចាំបាច់ ក្នុងការធ្វើឲ្យសាធារណៈមតិដឹងពីបញ្ហានេះ បង្កើតទម្លាប់សន្សំសំចៃ និងបង្កើតបរិយាកាសក្នុងសង្គមមួយ ដែលការខ្ជះខ្ជាយជារឿងដែលគួរឲ្យអាម៉ាស់ និងការសន្សំសំចៃជារឿងដែលគួរឲ្យសរសើរ។»
ការលើកឡើងរបស់ប្រធានាធិបតីចិន ទៅលើបញ្ហាខ្ជះខ្ជាយនេះមិនមែនជាលើកទីមួយឡើយ។ ជាច្រើនលើក ច្រើនសារ លោកតែងតែភ្ជាប់ពីសារៈសំខាន់នៃសន្តិសុខស្បៀង និងតែងលើកឲ្យមានការសន្សំសំចៃ និងប្រឆាំងនិងការខ្ជះខ្ជាយ។
កាលពីឆ្នាំ២០១៣ លោកបានចេញការណែនាំជាច្រើនឲ្យស្ថាប័នរដ្ឋចាប់អនុវត្តយ៉ាងតឹងរឹងទាក់ទងទៅនឹងការកាត់បន្ថយការខ្ជះខ្ជាយ ក៏ដូចជាការដាក់ចេញនូវវិធាន និងពិន័យយ៉ាងតឹងរ៉ឹងចំពោះការចំណាយដែលប្រើប្រាស់មូលនិធិសាធារណៈ។ លោកក៏ធ្លាប់ណែនាំឲ្យកាត់បន្ថយការខ្ជះខ្ជាយក្នុងសាលារៀន និងជំរុញសិស្សឲ្យដឹង និងអនុវត្តការសន្សំសំចៃផងដែរ៕
Tag:
ចិន
ស៊ី ជិនភីង
© រក្សាសិទ្ធិដោយ thmeythmey.com
