ភ្នំពេញ៖ កម្ពុជានឹងបាត់បង់ចំណូលពីវិស័យទេសចរណ៍ប្រមាណ ៣,០០០លានដុល្លារ នៅក្នុងឆ្នាំ២០២០។ នេះបើតាមលោក ថោង ខុន រដ្ឋមន្ត្រីក្រសួងទេសចរណ៍ ក្នុងកិច្ចប្រជុំរវាងក្រសួងទេសចរណ៍ និងគណៈកម្មការទី៧នៃរដ្ឋសភា នៅព្រឹកថ្ងៃទី១៣សីហា។
លោក ថោង ខុន បានបញ្ជាក់ថា ការបាត់បង់ចំណូលពីវិស័យទេសចរណ៍នេះ គឺដោយសារតែដំណើរកម្សាន្តរបស់ភ្ញៀវទេសចរធ្លាក់ចុះដ៏ច្រើនលើសលុប ពិសេសភ្ញៀវទេសចរអន្តរជាតិ។ បើតាមរដ្ឋមន្ត្រីទេសចរណ៍ នៅឆ្នាំ២០២០នេះ ភ្ញៀវទេសចរអន្តរជាតិអាចធា្លក់ចុះដល់រង្វង់៨០ភាគរយ និងភ្ញៀវទេសចរក្នុងស្រុកធ្លាក់ចុះ ក្នុងវង្វង់៥០ភាគរយ។
របាយការណ៍ក្រសួងទេសចរណ៍ បានបង្ហាញថា ក្នុងរយៈពេល៦ខែដើមឆ្នាំ២០២០ កម្ពុជាមានភ្ញៀវទេសចរអន្តរជាតិ ត្រឹម១,១៨លាននាក់ ប៉ុណ្ណោះ។ ចំនួននេះគឺបានធ្លាក់ចុះ៦៤,៦ភាគរយ បើធៀបមនឹងរយៈពេលដូចគ្នា កាលពីឆ្នាំ២០១៩។ ការធា្លក់ចុះនៃចំនួនភ្ញៀវទេសចរនេះដោយសារតែវិបត្តិនៃជំងឺកូវីដ-១៩ បានធ្វើឱ្យអាជីវកម្មក្នុងវិស័យទេសចរណ៍បិទទ្វារអស់ជាង ៣ពាន់ទីតាំង និងមនុស្សដែលធ្វើការងារផ្ទាល់ក្នុងវិស័យនេះ បាត់បង់ការងារចំនួន៥ម៉ឺននាក់ ដោយគិតត្រឹមតែដើមខែសីហានេះ ប៉ុណ្ណោះ។
លោក ថោង ខុន រដ្ឋមន្ត្រីក្រសួងទេសចរណ៍ ក្នុងកិច្ចប្រជុំរវាងក្រសួងទេសចរណ៍ និងគណៈកម្មការទី៧នៃរដ្ឋសភា នៅវិមានរដ្ឋសភា នាព្រឹកថ្ងៃទី១៣សីហា។
ថ្លែងក្នុងកិច្ចប្រជុំត្រួតពិនិត្យការអនុវត្ត បទដ្ឋានគតិយុត្តដាក់ឱ្យអនុវត្តវិធានសុវត្ថិភាពទេសចរណ៍ជំហានទី១ សម្រាប់ដំណាក់កាលវិបត្តិជំងឺកូវីដ-១៩និងផែនការអនុវត្តបន្ត នៅសាលារាជធានីភ្នំពេញ កាលពីថ្ងៃទី២៩មិថុនា ឆ្នាំ២០២០ រដ្ឋមន្ត្រីក្រសួងទេសចរណ៍ បានអះអាងថាឥទ្ធិពលរាតត្បាតនៃឆ្លងកូវីដ-១៩ ក្នុងសកលលោកនេះ នឹងធ្វើឱ្យវិស័យទេសចរណ៍កម្ពុជាដើរថយក្រោមក្នុងរយៈពេល៥ឆ្នាំ។
លោកបន្តថា សម្រាប់ឆ្នាំ២០២០នេះ កម្ពុជាអាចទទួលភ្ញៀវអន្តរជាតិបានប្រហែល ២លាននាក់ប៉ុណ្ណោះ ខណៈមុនមានវិបត្តិកូវីដ-១៩ កម្ពុជារំពឹងថា នឹងទទួលបានភ្ញៀវទេសចរ រហូតទៅដល់ជាង៧លាននាក់។ បើតាមលោក ថោង ខុន ចំនួនភ្ញៀវទេសចរដែលបាត់បង់ដោយសារជំងឺកូវីដ-១៩នេះ នឹងងើបឡើងវិញ ២,៥លាននាក់ នៅក្នុងឆ្នាំ២០២១ ប្រសិនបើជំងឺកូវីដ-១៩ លែងមាន ឬពិភពលោកអាចទប់ស្កាត់ជំងឺនេះបាននៅខែធ្នូ ឆ្នាំ២០២០ ឬដើមឆ្នាំ២០២១។
លោក ថោងខុន មានប្រសាសន៍ដូច្នេះ៖«ផែនការដែលយើងគិតថាទទួលបានភ្ញៀវទេសចរ៧លាននាក់ក្នុងឆ្នាំ២០២០នោះ លុះត្រាដល់ឆ្នាំ២០២៥ បានយើងទទួលបានចំនួន៧លាននាក់នោះ»។
មុនមានវិបត្តិកូវីដ-១៩ជាសកលលោកនេះ កម្ពុជាបានភ្ញៀវទេសចរអន្តរជាតិចំនួន៦,៦១លាននាក់ និងទទួលចំណូលពីវិស័យទេសចរណ៍រហូតជិត៥,០០០លានដុល្លារ ដែលបានចាក់បញ្ចូលក្នុងចរន្តសេដ្ឋកិច្ចជាតិ ក្នុងឆ្នាំ២០១៩កន្លងមក។ ចំណូលនេះបានចូលរួមចំណែកប្រមាណ១៣ភាគរយនៃផលិតផលក្នុងស្រុកសរុប(GDP)។
សម្រាប់ឆ្នាំ២០២០នេះផងដែរ លោក ថោង ខុន ធ្លាប់រំពឺងថា កម្ពុជានឹងទទួលចំណូលបានជាង៥ពាន់លានដុលា្លរ ពីភ្ញៀវទេសចរជាង៧លាននាក់ និងប្រមាណ១០ពាន់លានដុល្លារសម្រាប់ឆ្នាំ២០៣០ ពីភ្ញៀវទេសចរអន្តរជាតិ១៥លាននាក់៕
លោក ហ៊ុន ម៉ានី ប្រធានគណៈកម្មការទី៧នៃរដ្ឋសភា