អ៊ីស្រាអែល និងអេមីរ៉ាតអារ៉ាប់រួម នៅថ្ងៃទី១៣ ខែសីហា បានឈានដល់កិច្ចព្រមព្រៀងជាប្រវត្តិសាស្ត្រដើម្បីបង្កើតទំនាក់ទំនងការទូតទ្វេភាគី ក្រោយមានការត្រួសត្រាយផ្លូវពីអាមេរិក។ អេមីរ៉ាតអារ៉ាប់រួម នឹងក្លាយជាប្រទេសអារ៉ាប់ទីបីមានចំណងការទូតជាមួយអ៊ីស្រាអែល ដែលមិនត្រូវគ្នាជាមួយពិភពអារ៉ាប់សោះ។ ប្រទេសជាច្រើនសាទរកិច្ចព្រមព្រៀងនេះ ដែលរំពឹងថា នឹងជួយនាំសន្តិភាពទៅកាន់មជ្ឈិមបូព៌ា។ ប៉ុន្តែប៉ាឡេស្ទីននិយាយទាំងខកចិត្តថា នេះជាការចាក់ខ្លួនពីក្រោយខ្នង។
ជាចំណុចរបត់មួយក្នុងភូមិសាស្ត្រនយោបាយមជ្ឈិមបូព៌ា អ៊ីស្រាអែល និងអេមីរ៉ាតអារ៉ាប់រួម បានប្រកាសពីកិច្ចព្រមព្រៀងសន្តិភាពមួយ។ កន្លងទៅ ដូចប្រទេសអារ៉ាប់ភាគច្រើន អេមីរ៉ាតអារ៉ាប់រួម មិនមានទំនាក់ទំនងអ្វីសោះជាមួយអ៊ីស្រាអែល ដែលត្រូវបានចាត់ទុកជាសត្រូវ មិនថាទំនាក់ទំនងការទូត ឬទំនាក់ទំនងសេដ្ឋកិច្ចអ្វីឡើយ។ មានតែអេហ្ស៊ីប និងហ្ស៊កដានីប៉ុណ្ណោះ ដែលមានកិច្ចព្រមព្រៀងសន្តិភាពជាមួយអ៊ីស្រាអែល។
អាមេរិក ជាអ្នកតម្រែតម្រង់សម្របសម្រួលប្រទេសទាំងពីរនេះ។ ប្រធានាធិបតីអាមេរិក ដូណាល់ ត្រាំ ក៏ជាអ្នកប្រកាសកិច្ចព្រមព្រៀងប្រវត្តិសាស្ត្រ ដែលបើកផ្លូវឲ្យអ៊ីស្រាអែល និងអេមីរ៉ាតអារ៉ាប់រួម ភ្ជាប់ទំនាក់ទំនងការទូតទ្វេភាគី។ លោក ត្រាំ បង្ហើបថា កិច្ចព្រមព្រៀងបែបនេះ នឹងមានជាបន្តបន្ទាប់ទៀត តែលោកមិនទាន់អាចនិយាយបានឡើយ។
ក្នុងសេចក្ដីថ្លែងការណ៍រួមថ្ងៃទី១៣ ខែសីហា លោក ត្រាំ នាយករដ្ឋមន្ត្រីអ៊ីស្រាអែល បេនចាមីន ណេតាន់យ៉ាហ៊ូ និងរជ្ជទាយាទអេមីរ៉ាតអារ៉ាប់រួម ព្រះអង្គម្ចាស់ មូហាម៉េដ ប៊ីន ហ្សាយ៉េដ អាល់-ណាយ៉ាន់ និយាយថា ប្រទេសទាំងបីយល់ព្រមភ្ជាប់ទំនាក់ទំនងអ៊ីស្រាអែល និងអេមីរ៉ាតអារ៉ាប់រួម។
ក្រោមកិច្ចព្រមព្រៀងដែលនឹងត្រូវចុះហត្ថលេខានៅពេលខាងមុខ ប្រទេសទាំងពីរ នឹងផ្លាស់ប្ដូរអគ្គរដ្ឋទូតទៅមក ហើយបង្កើតស្ថានទូតនៅប្រទេសនីមួយៗផង។ អ្វីគួរឲ្យចាប់អារម្មណ៍នោះ អ៊ីស្រាអែល សុខចិត្តផ្អាកគម្រោងបញ្ចូលទឹកដីប៉ាឡេស្ទីនសិនផងដែរ ដែលជាការអនុវត្តតាមទស្សនវិស័យសន្តិភាពរបស់លោក ត្រាំ ហើយអេមីរ៉ាតអារ៉ាប់រួមក៏បានគាំទ្រការផ្អាកនេះដែរ។
ប្រយោជន៍អាមេរិក និងអ៊ីស្រាអែល
អាមេរិក និងអ៊ីស្រាអែល ទទួលប្រយោជន៍ច្រើនជាងគេពីកិច្ចព្រមព្រៀងនេះ។ សម្រាប់អ៊ីស្រាអែល គឺអស់សត្រូវមួយទៀតហើយ។ បច្ចុប្បន្ន អ៊ីស្រាអែលមានកិច្ចព្រមព្រៀងសន្តិភាពជាមួយអេហ្ស៊ីបដែលចុះក្នុង១៩៧៩ និងហ្ស៊កដានីនៅឆ្នាំ១៩៩៤។ ម្យ៉ាងទៀត អ៊ីស្រាអែល ក៏មានមិត្តមួយទៀតដែលមានសត្រូវរួមគ្នា គឺអ៊ីរ៉ង់ផងដែរ។ ក្នុងសេចក្ដីថ្លែងការណ៍រួម អ៊ីស្រាអែល និងអេមីរ៉ាតអារ៉ាប់រួម បានឯកភាពគ្នាគូសវាសផ្លូវថ្មីដើម្បីប្រើប្រាស់សក្ដានុពលតំបន់។
កិច្ចព្រមព្រៀងនេះ ក៏ជាជ័យជម្នះការទូតដ៏ធំមួយសម្រាប់អាមេរិក ពិសេសលោក ត្រាំ ផ្ទាល់។ ខណៈកំពុងឈរក្រោយលោក បៃឌិន ក្នុងស្ទង់មតិសម្រាប់ការបោះឆ្នោតខែវិច្ឆិកា កិច្ចព្រមព្រៀងនេះ នឹងជួយបង្កើនការគាំទ្រសម្រាប់ការប៉ុនប៉ងកាន់តំណែងអាណត្តិទីពីរផងដែរ។ មិនខុសពីអ៊ីស្រាអែលឡើយ អាមេរិក ក៏អាចប្រមូលកម្លាំងរដ្ឋឈូងសមុទ្រដែលមិនត្រូវគ្នាជាមួយអ៊ីរ់ង់ ឲ្យឈរនៅខាងខ្លួនទៀតផង។
សុទិដ្ឋិនិយម និងការចាក់មួយកាំបិតក្រោយខ្នង
ប្រទេសជាច្រើនទាំងក្នុងតំបន់ និងលើពិភពលោកសាទរកិច្ចព្រមព្រៀងនេះ។ ប្រធានាធិបតីអេហ្ស៊ីប អាប់ឌែល ហ្វាតា អាល់-ស៊ីស៊ី បង្ហោះសារអបអរលើ Twitter ដោយផ្ដោតលើចំណុចដែលអ៊ីស្រាអែលផ្អាកគម្រោងភ្ជាប់ទឹកដីប៉ាឡេស្ទីន។ រដ្ឋាភិបាលបារ៉ែន ស្វាគមន៍កិច្ចព្រមព្រៀងនេះ ដោយចាត់ទុកជាជំហានទៅកាន់សន្តិភាពនៅមជ្ឈិមបូព៌ា។ បេក្ខជនប្រធានាធិបតីអាមេរិក ចូ បៃឌិន ក៏សាទរផងដែរ ព្រោះជាការភ្ជាប់ការបែកបាក់កន្លងទៅ។
រដ្ឋមន្ត្រីការបរទេសអង់គ្លេស ដូមីនិក រ៉ាប់ លើកឡើងក្នុងសេចក្ដីថ្លែងការណ៍មួយថា នេះជាការជំហានប្រវត្តិសាស្ត្រក្នុងការភ្ជាប់ទំនាក់ទំនងរវាងមិត្តភក្តិដ៏ល្អរបស់អង់គ្លេស។ ដោយឡែក ប្រមុខការទូតហ្ស៊កដានី អៃម៉ាន អាល់-សាហ្វាឌី វិញ បាននិយាយដោយប្រយ័ត្នថាកិច្ចព្រមព្រៀងនេះជះឥទ្ធិពលដល់សន្តិសន្តិភាពតំបន់ឬយ៉ាងណា គឺអាស្រ័យលើសកម្មភាពអ៊ីស្រាអែលប៉ុណ្ណោះ។ លោកប្រាប់អ៊ីស្រាអែលឲ្យបញ្ចប់សកម្មភាពខុសច្បាប់របស់ខ្លួន និងគោរពសិទ្ធិប៉ាឡេស្ទីន
ប៉ាឡេស្ទីនឯណោះ កំពុងខកចិត្តខ្លាំងដោយប្រដូចទៅនឹងការចាក់ខ្លួនពីក្រោយខ្នង។ អាជ្ញាធរប៉ាឡេស្ទីនដែលជាអង្គការតំណាងប៉ាឡេស្ទីន នៅថ្ងៃទី១៣ ខែសីហា បានប្រកាសជំទាស់ និងថ្កោលទោសកិច្ចព្រមព្រៀងនេះ ហើយស្នើកោះប្រជុំបន្ទាន់សម្ព័ន្ធអារ៉ាប់ និងបានកោះហៅតំណាងរបស់ខ្លួនពីអេមីរ៉ាតអារ៉ាប់រួមវិញ។ ប្រធានាធិបតីប៉ាឡេស្ទីន ម៉ាមូដ អាប់បាស ក៏បានកោះប្រជុំមន្ត្រីជាន់ខ្ពស់របស់លោក មុននឹងប្រកាសជំហរផ្លូវការទៅនឹងកិច្ចព្រមព្រៀងរវាងអ៊ីស្រាអែល និងអេមីរ៉ាតអារ៉ាប់រួម។
ចំណែកក្រុមហាម៉ាស់ដែលគ្រប់គ្រងតំបន់ហ្កាហ្សា បានបដិសេធកិច្ចព្រមព្រៀងនេះ។ អ្នកនាំពាក្យហាម៉ាស់ ប្រាប់ទីភ្នាក់ងារព័ត៌មាន AFP ថា កិច្ចព្រមព្រៀងជាមួយអេមីរ៉ាតអារ៉ាប់រួម ជារង្វាន់សម្រាប់ការគ្រប់ និងឧក្រិដ្ឋកម្មរបស់អ៊ីស្រាអែល៕