អន្តរជាតិ
ស្រីលង្កា៖ ប្អូនជាប្រធានាធិបតី, បងបន្ទាប់ធ្វើនាយករដ្ឋមន្ត្រី, បងធំ និងក្មួយធ្វើរដ្ឋមន្ត្រី... លោក ហ្គោតាបាយ៉ា រ៉ាចាប៉ាក់សា (ស្ដាំ) ប្រធានាធិបតីស្រីលង្កា លើកដៃគោរពលោក ម៉ាហ៊ិនដា រ៉ាចាប៉ាក់សា ដែលជាបងប្រុស និងជានាយករដ្ឋមន្រ្តី។ រូបភាព AFP
× ប្រធានាធិបតីស្រីលង្កា លោក ហ្គោតាបាយ៉ា រ៉ាចាប៉ាក់សា បានដឹកនាំការស្បថចូលកាន់តំណែងរបស់គណៈរដ្ឋមន្ត្រីថ្មីកាលពីថ្ងៃទី១២ ខែសីហាកន្លងទៅ។ អ្វីគួរឲ្យចាប់អារម្មណ៍នោះ សមាជិកគ្រួសារត្រកូល រ៉ាចាប៉ាក់សា ដែលកាន់តំណែងដឹកនាំប្រទេសជាច្រើនឆ្នាំចំនួនបីនាក់ ក៏មានឈ្មោះក្នុងបញ្ជីសមាសភាពរដ្ឋាភិបាលទាំង២៦រូប ដែលត្រូវបានបង្កើតឡើងក្រោយជ័យជម្នះភ្លូកទឹកភ្លូកដីនាការបោះឆ្នោតនៅដើមខែសីហារបស់បក្សនយោបាយរបស់ត្រកូលមួយនេះ និងសម្ព័ន្ធមិត្ត។
ក្នុងចំណោមសមាជិកគណៈរដ្ឋមន្ត្រីថ្មីស្រីលង្កា នាយករដ្ឋមន្ត្រី គឺលោក ម៉ាហ៊ីនដា រ៉ាចាប៉ាក់សា ដែលជាបងប្រុសប្រធានាធិបតីសព្វថ្ងៃ ហ្គោតាបាយ៉ា រ៉ាចាប៉ាក់សា ។ លោក ម៉ាហ៊ីនដា ក៏ធ្លាប់ជាប្រធានាធិបតីស្រីលង្កាពីឆ្នាំ២០០៥ ដល់ឆ្នាំ២០១៥ ហើយលោកជាអ្នកដឹកនាំការបញ្ចប់សង្គ្រាមស៊ីវិលជាមួយក្រុមឧទ្ទាមខ្លាតាមិល ដែលរងការរិះគន់ខ្លាំងលើការបំពានសិទ្ធិមនុស្ស។ បន្ថែមពីលើតំណែងនាយករដ្ឋមន្ត្រី លោក ម៉ាហ៊ីនដា ក៏ជារដ្ឋមន្ត្រីហិរញ្ញវត្ថុ អភិវឌ្ឍន៍ទីក្រុង និងសាសនា។
បងប្រុសច្បងត្រកូល រ៉ាចាប៉ាក់សា គឺលោក ចាម៉ាល រ៉ាចាប៉ាក់សា ត្រូវបានតែងតាំងជារដ្ឋមន្ត្រីធារាសាស្ត្រ។ ចំណែលោក ណាម៉ាល់ រ៉ាចាប៉ាក់សា កូនប្រុសលោក ម៉ាហ៊ិនដា ហើយត្រូវជាក្មួយប្រុសលោក ហ្គោតាបាយ៉ា ដែរនោះ ជារដ្ឋមន្ត្រីកីឡា និងយុវជន។ ណាម៉ាល ត្រូវបានមើលឃើញថា កំពុងទទួលការបណ្ដុះបណ្ដាលដើម្បីបន្តវេនឪពុករបស់ខ្លួន។
លោក ហ្គោតាបាយ៉ា ប្រគល់លិខិតតែងតាំងឲ្យលោក ណាម៉ាល រ៉ាចាប៉ាក់សា។ រូបភាព AFP
ដោយឡែក លោក Ali Sabry មេធាវីលោកប្រធានាធិបតី ត្រូវបានតែងតាំងជារដ្ឋមន្ត្រីយុត្តិធម៌។ នេះតាមការផ្សាយរបស់ទូរទស្សន៍ Al Jazeera ។
នៅសភាវិញ គ្រួសារ រ៉ាចាប៉ាក់សា មានដល់ទៅ៥នាក់ដូចជាលោក ម៉ាហ៊ីនដា, លោក ចាម៉ាល, លោក ណាម៉ាល, លោក សាហ៊ីនដ្រា កូនប្រុសលោក ចាម៉ាល និងលោក នីពូណា រ៉ាណាវ៉ាកា ដែលជាក្មួយប្រុស។ សភាស្រីលង្កា គ្រប់គ្រងដោយបក្ស Sri Lanka Podujana Peramuna ដែលមានកៅអីចំនួន១៤៥លើ២២៥ ៕
© រក្សាសិទ្ធិដោយ thmeythmey.com