COVID-19
ជាតិ
សង្គមជាតិ
ក្រសួងសុខាភិបាលក្រើនរំលឹកដល់ពលរដ្ឋនាថ្ងៃឈប់សម្រាក កុំមើលរំលងជំងឺកូវីដ-១៩
ពលរដ្ឋដែលមកកម្សាន្តលេងនៅតាមមុខព្រះបរមរាជវាំងរាលសម័យកូវីដ-១៩
×![]()
ភ្នំពេញ៖ នាថ្ងៃឈប់សម្រាកជំនួសថ្ងៃចូលឆ្នាំខ្មែរ ក្រសួងសុខាភិបាលបានណែនាំឲ្យពលរដ្ឋដែលធ្វើដំណើរទៅស្រុកកំណើត ឬពលរដ្ឋទៅកម្សាន្តលេងនៅតាមតំបន់ទេសចរណ៍នានា កុំភ្លេចខ្លួនថាគ្មានជំងឺកូវីដ-១៩ និងការពារខ្លួនឲ្យសោះ បើទោះបីជំងឺនេះមិនទាន់រាតត្បាតជាសហគមន៍ក៏ដោយ។ 
ដើម្បីការពារកុំឲ្យឆ្លងជំងឺកូវីដ-១៩ នេះក្រសួងសុខាភិបាលបានណែនាំឲ្យពលរដ្ឋប្រកាន់ខ្ជាប់នូវការរស់នៅតាមបែបគន្លងថ្មី ដោយកែប្រែទម្លាប់ និងឥរិយាបថថ្មី ទោះជាស្ថិតនៅក្នុងកន្លែងណា និងពេលវេលាក៏ត្រូវប្រុងប្រយ័ត្ន និងការពារខ្លួន។
ក្រសួងសុខាភិបាលបានណែនាំឲ្យម្ចាស់រថយន្តដែលដឹកពលរដ្ឋទៅស្រុកកំណើត ឬទៅតំបន់រមណីយដ្ឋាន ត្រូវសម្អាតរថយន្តដោយបាញ់ទឹកសម្លាប់មេរោគ ម្ចាស់រថយន្តត្រូវមានទឹកអាល់កុល ហើយអ្នកធ្វើដំណើរក៏ត្រូវពាក់ម៉ាស់ និងឧស្សាហ៍លាងដៃផងដែរ។ ពលរដ្ឋទាំងអស់ត្រូវជៀសវាងការប្រើប្រាស់មធ្យោបាយសាធារណៈដែលផ្ទុកមនុស្សច្រើន ហើយរក្សាគម្លាតពីគ្នាយ៉ាងតិច១ម៉ែត្រកន្លះ។
ចំណែកការស្នាក់នៅតាមសណ្ឋាគារឬផ្ទះសំណាក់ រួមទាំងការទទួលទានអាហារ ពលរដ្ឋត្រូវប្រកាន់ខ្ជាប់ការណែនាំរបស់ក្រសួងសុខាភិបាល ដោយរក្សាអនាម័យនិងលាងសម្អាតដៃជានិច្ច។ ដោយឡែក ម្ចាស់ទីតាំងត្រូវសម្អាតកៅអី តុ បន្ទប់ស្នាក់នៅ បន្ទប់ទឹក និងរៀបកន្លែងឲ្យមានគម្លាតសុវត្ថិភាព ហើយចាំបាច់រៀបចំឲ្យមានកន្លែងលាងសម្អាតដៃមុនពេលចូលក្នុងហាងឬកន្លែងស្នាក់នៅ។ លើសពីនេះ បុគ្គិលត្រូវពាក់ម៉ាស់ជាប្រចាំរាល់ពេលបម្រើអតិថិជន។
ក្រសួងសុខាភិបាល ក៏បានណែនាំឲ្យប្រជាជន កាត់បន្ថយការដំណើរកម្សាន្ត និងបរិភោគអាហារក្រៅផ្ទះផងដែរ រួមទាំងកាត់បន្ថយការជប់លៀងទ្រង់ទ្រាយធំ។ លើសពីនេះ ការជួបជុំគ្រួសារឬដំណើរកម្សាន្ត ត្រូវធ្វើឡើងជាលក្ខណៈគ្រួសារនិងរើសទីតាំងដាច់ដោយឡែកឬមានខ្យល់ចេញចូលល្អ។
ក្រសួងសុខាភិបាលបានអំពាវនាវឲ្យបុគ្គលគ្រប់រូបរក្សាគម្លាតសុវត្ថិភាព រាល់ពេលឈរ អង្គុយ ជជែកគ្នានៅកន្លែងទីកន្លែងសាធារណៈ ផ្សារឬកន្លែងទិញទំនិញ កន្លែងធ្វើការ ភោជនីយដ្ឋាន រួមទាំងកន្លែងកម្សាន្តនានា។ ប្រសិនបើពលរដ្ឋណាមានបញ្ហាសុខភាពមិនគួរធ្វើដំណើរឡើយ ត្រូវប្រញាប់ទៅជួបពេទ្យជំនាញដើម្បីពិនិត្យសុខភាព៕
Tag:
ពលរដ្ឋ
ទេសចរណ៍
COVID-19
© រក្សាសិទ្ធិដោយ thmeythmey.com
