ជាតិ
២៥ខេត្ត/រាជធានី
«ផ្សារចុងសប្ដាហ៍នៃគម្រោង AIMS» ជំរុញកសិផលក្នុងតំបន់ ជួយបង្កើនចំណូលដល់កសិករ
×![]()
គម្រោង«ផ្សារចុងសប្ដាហ៍» បង្កើតឡើង ដើម្បីជួយផ្សព្វផ្សាយផលិតផលកសិកម្មរបស់កសិករ សហគមន៍កសិកម្ម អ្នកប្រមូលទិញ និងសហគ្រាសនានា ដែលគាំទ្រដោយគម្រោងជំរុញទីផ្សារសម្រាប់កសិកម្មខ្នាតតូច។ «ផ្សារចុងសប្ដាហ៍» នឹងបង្កើតឱកាសដល់ក្រុមកសិករផលិត ចាប់ដៃគូជាមួយអ្នកប្រមូលទិញធំៗ ក្នុងតំបន់ និងក្រៅតំបន់ ដើម្បីបង្កើនផលិតភាព និងផលិតកម្ម។ នេះបើតាមលោក សៀង កុមិរ៉ា ប្រធានគម្រោងផ្នែកខ្សែច្រវាក់តម្លៃរបស់គម្រោង AIMS បានប្រាប់សារព័ត៌មានThmeyThmey25 តាមទូរសព្ទ។
ត្រឹមរយៈពេល៣ខែប៉ុណ្ណោះ គម្រោងផ្សារចុងសប្ដាហ៍របស់គម្រោងជំរុញទីផ្សារសម្រាប់កសិកម្មខ្នាតតូច (AIMS) បានអនុវត្តចំនួន ១២ខេត្ត ក្នុងចំណោមខេត្តគោលដៅទាំង ១៨ រួមមានខេត្តកំពត តាកែវ កំពង់ស្ពឺ កណ្ដាល បាត់ដំបង បន្ទាយមានជ័យ សៀមរាប កំពង់ចាម ស្ទឹងត្រែង កំពង់ធំ ត្បូងឃ្មុំ រតនគិរី។ គម្រោងខាងលើនេះ បានចែកចេញជា ៣ មណ្ឌលភូមិភាគ។ 
បើតាមលោក សៀង កុមិរ៉ា ភូមិភាគនិរតីមានខេត្តកំពត តាកែវ កំពង់ស្ពឺ កណ្ដាល និងកែប។ ចំណែក ភូមិភាគបូព៌ា-ឦសាន មានខេត្តកំពង់ចាម កំពង់ធំ ស្ទឹងត្រែង ត្បូងឃ្មុំ រតនគិរី ព្រៃវែង មណ្ឌលគិរី ក្រចេះ ព្រះវិហារ។ ដោយឡែក ភូមិភាគពាយ័ព្យ មានខេត្តបាត់ដំបង បន្ទាយមានជ័យ សៀមរាប ប៉ៃលិន។ លោក សៀង កុមិរ៉ា ប្រធានគម្រោងផ្នែកខ្សែច្រវាក់តម្លៃ លើកឡើងថា ខេត្តតាកែវជាខេត្តដឹកនាំភូមិភាគ ដោយសារខេត្តនេះមានសក្ដានុពលលើការចិញ្ចឹមសត្វ និងដាំបន្លែ។
ផលិតផលដែលកសិករដាក់លក់ក្នុងផ្សារចុងសប្ដាហ៍មានដូចជា បន្លែ មាន់ស្រែ ស្រូវ-អង្ករក្រអូប។ ដោយឡែក ផលិតផលក្រៅពីកសិកម្មក៏អាចដាក់លក់ក្នុងផ្សារចុងសប្ដាហ៍បានដែរ ក្នុងនោះមានផលិតផលកែច្នៃដូចជា គ្រាប់ស្វាយចន្ទី និងផលិតផលសិប្បកម្មធ្វើដោយដៃស្ថិតក្នុងតំបន់ ដោយមានការស្នើសុំជាមុន។ នេះជាការបញ្ជាក់របស់លោក សៀង កុមិរ៉ា ប្រធានគម្រោងផ្នែកខ្សែច្រវាក់តម្លៃរបស់គម្រោង AIMS។
បច្ចុប្បន្នគម្រោងផ្សារចុងសប្ដាហ៍ កំពុងមានការគាំទ្រខ្លាំង ដោយក្នុងមួយថ្ងៃអាចមានមនុស្ស ៣០០នាក់ ទៅ ៦០០នាក់ ក្នុងតំបន់គោលដៅនីមួយៗ ដែលមកគាំទ្រនូវផលិតផលកសិកម្ម និងផលិតផលក្នុងតំបន់។ ដើម្បីក្លាយជាសមាជិកនៃគម្រោង AIMS កសិករត្រូវចុះបញ្ជីក្នុងគម្រោង AIMS និងត្រូវជាសមាជិករបស់ក្រសួងពាណិជ្ជកម្ម ជាបណ្ដុំកសិករដែលបង្កើតដោយក្រសួងកសិកម្ម និងអង្គការផ្សេងៗ។ បើគិតមកដល់ពេលនេះមានបណ្ដុំអាជីវកម្មប្រមាណ ៤០០បណ្ដុំក្នុងចំណោមខេត្តគោលដៅ៕
Tag:
កសិកម្ម
គម្រោង AIMS
© រក្សាសិទ្ធិដោយ thmeythmey.com
