ជាតិ
សង្គមជាតិ
អាជ្ញាធរស្នើឱ្យពលរដ្ឋចូលរួមរក្សាអនាម័យបរិស្ថានពេលមកលេងអង្គរវត្តកំឡុងថ្ងៃឈប់សម្រាក
×![]()
សៀមរាប៖ ខេត្តសៀមរាប ជាគោលដៅមួយសម្រាប់ប្រជាពលរដ្ឋមកទស្សនាកំឡុងពេលថ្ងៃឈប់សម្រាកពេញមួយសប្ដាហ៍ ដែលរាជរដ្ឋាភិបាលសម្រេចសងជំនួសថ្ងៃសម្រាកបុណ្យចូលឆ្នាំកាលពីខែមេសា។ កំឡុងពេលនេះ រដ្ឋបាលខេត្តសៀមរាប បានរៀបចំពិធីកម្សាន្ត ដែលមានទាំងកម្មវិធីកម្សាន្ត និងកម្មវិធីសាសនាផង។ អង្គរវត្ត ជាគោលដៅទស្សនាដែលមិនអាចរំលងបានសម្រាប់ទេសចរពេលមកលេងខេត្តសៀមរាប។ ថ្នាក់ដឹកនាំនៃអាជ្ញាធរជាតិអប្សរា បានអំពាវនាវដល់ប្រជាពលរដ្ឋទាំងអស់ ត្រូវចូលរួមថែរក្សាអនាម័យបរិស្ថានដើម្បីរួមចំណែកថែរក្សាតម្លៃបេតិកភណ្ឌរបស់អង្គរ។
អ្នកនាំពាក្យអាជ្ញាធរជាតិអប្សរា លោក ឡុង កុសល ស្នើឱ្យប្រជាពលរដ្ឋខ្មែរគ្រប់រូប ដែលមានដំណើរកម្សាន្តមកខេត្តសៀមរាបនាកំឡុងថ្ងៃឈប់សម្រាកពេញមួយសប្ដាហ៍នេះ ត្រូវចូលរួមថែរក្សាអនាម័យ ដោយមិនត្រូវបោះសំរាមផ្ដេសផ្ដាយ និងពាសវាលពាសកាលនោះទេ។ អ្នកនាំពាក្យរូបនេះ មានសុទិដ្ឋិនិយមថា ភ្ញៀវទេសចរទាំងអស់ នឹងចេះស្រឡាញ់អង្គរ ហើយយល់ពីតម្លៃដ៏អស្ចារ្យរបស់អង្គរ ដែលជាមរតកបេតិកភណ្ឌ និងជាដួងព្រលឹងរបស់ជាតិ។
ក្នុងបទសម្ភាសជាមួយក្រុមអ្នកសារព័ត៌មាន នៅរសៀលថ្ងៃទី១៤ សីហា លោក ឡុង កុសល ក៏ស្នើឱ្យប្រជាពលរដ្ឋទាំងអស់ ថែរក្សាសណ្ដាប់ធ្នាប់ឱ្យល្អប្រសើរផងដែរ ដោយក្នុងនោះត្រូវចតយានយន្តតាមចំណតដែលអាជ្ញាធរជាតិអប្សរាបានរៀបចំ ដើម្បីរួមចំណែកធ្វើឱ្យរមណីយដ្ឋានអង្គរមានសោភ័ណភាព និងបរិស្ថានល្អ៕
Tag:
អង្គរវត្ត
សម្រាកសៀមរាប
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
