ជាតិ
សង្គមជាតិ
លោក ឡុង កុសល៖ សំណង់ខុសច្បាប់នឹងប្រឈមការរុះរើទាំងស្រុង បើសិនពលរដ្ឋឆ្លៀតសង់កំឡុងពេលសម្រាកនេះ
លោក ឡុង កុសល អ្នកនាំពាក្យអាជ្ញាធរជាតិអប្សរា
×![]()
សៀមរាប៖ អាជ្ញាធរជាតិអប្សរា បានព្រមានពីការរុះរើដោយពុំមានលក្ខខណ្ឌអ្វីទាំងអស់ រាល់សំណង់ខុសច្បាប់ទាំងឡាយណា ដែលលួចសាងសង់កំឡុងពេលថ្ងៃឈប់សម្រាកចាប់ពីថ្ងៃទី១៧ ដល់ថ្ងៃ២១ សីហា។ បន្ថែមពីនេះ មន្ត្រីនៃអាជ្ញាធរជាតិអប្សរា ក៏ព្រមានពីវិធានការផ្លូវច្បាប់លើជនខិលខូចដែលលួចប្រើឈ្មោះស្ថាប័ននេះ ឆបោកពលរដ្ឋឱ្យធ្វើសំណង់ដោយពុំមានការស្នើសុំមកស្ថាប័នជំនាញ។
«សូមមេត្ដា កុំធ្វើការសាងសង់សំណង់ខុសច្បាប់ណាមួយក្នុងរមណីយដ្ឋានអង្គរនៅពេលនេះ (ថ្ងៃសម្រាក) ព្រោះយើងមិនចង់ឱ្យមានការកើនឡើងនូវសំណង់ខុសច្បាប់ដែលបង្កផលលំបាកដល់រមណីយដ្ឋានអង្គរទេ រាល់សំណង់ខុសច្បាប់ទាំងអស់ នឹងត្រូវធ្វើការរុះរើចេញវិញ ដែលនាំឱ្យខូចខាតដល់ផលប្រយោជន៍របស់បងប្អូនប្រជាពលរដ្ឋខ្លួនឯងទៅវិញ»។ នេះជាសារព្រមានដល់ប្រជាពលរដ្ឋដែលកំពុងរស់នៅក្នុងតំបន់អង្គរ ពីអ្នកនាំពាក្យអាជ្ញាធរជាតិអប្សរា លោក ឡុង កុសល។ បន្ថែមពីនេះ លោក ឡុង កុសល ស្នើឱ្យពលរដ្ឋទាំងអស់ កុំស្ដាប់ពាក្យឆបោករបស់បុគ្គលមួយចំនួន ដែលអះអាង ធានារត់ការដើម្បីបានាសាងសង់ ដែលនេះផ្ទុយពីគោលការណ៍របស់អាជ្ញាធរជាតិអប្សរា។
ប្រធាននាយកដ្ឋានសណ្ដាប់ធ្នាប់ និងកិច្ចសហប្រតិបត្តិការ រូបនេះពន្យល់ថា ប្រជាពលរដ្ឋដែលចង់រុះរើផ្ទះចាស់ សង់ផ្ទះថ្មី និងមានសំណើរជួសជុលផ្ទះជាដើម ត្រូវដាក់ពាក្យស្នើសុំទាំងនោះមកកាន់អាជ្ញាធរជាតិអប្សរា ក៏ដូចជាតាមអាជ្ញាធរមូលដ្ឋាន ហើយការធ្វើផ្ទុយពីនេះ ចាត់ទុកជាសំណង់ខុសច្បាប់ និងប្រឈមមុខនឹងការរុះរើដោយគ្មានលក្ខខណ្ឌ។ លើសពីនេះ មន្ត្រីរូបនេះក៏ស្នើសុំកិច្ចសហការជាមួយប្រជាពលរដ្ឋ ក្នុងការរាយការណ៍ករណីដឹងពីបុគ្គលិកឬសកម្មភាពខាងលើ ត្រូវប្រញាប់រាយការណ៍មកស្ថាប័នខ្លួន ដើម្បីមានវិធានការផ្លូវច្បាប់ ក៏ដូចជាបង្ការការខូចខាតផលប្រយោជន៍របស់ប្រជាពលរដ្ឋផ្ទាល់។
គួរបញ្ជាក់ថា ជាទូទៅនៅរាល់ពិធីបុណ្យទានម្ដងៗ តែងមានករណីលួចសង់សំណង់ខុសច្បាប់ ហើយការសាងសង់នេះមានលក្ខណៈលឿនបំផុត អាចមួយយប់បានកូនផ្ទះមួយខ្នង ដែលនេះត្រូវបានអាជ្ញាធរជាតិអប្សរាកត់សម្គាល់ថា សុទ្ធសឹងមានការត្រៀមលក្ខណៈជាមុន។ យ៉ាងណា សំណង់ទាំងនោះតែងមានវិធានការឱ្យព្រមព្រៀងរុះរើ និងករណីខ្លះប្រឈមផ្លូវច្បាប់ក៏មាន៕
Tag:
សំណង់ខុសច្បាប់
អង្គរ
© រក្សាសិទ្ធិដោយ thmeythmey.com
