ជាតិ
នយោបាយជាតិ
សម្ដេច ហ៊ុន សែន ព្រមានចាប់ខ្លួនអ្នករិះគន់រឿងព្រំដែនថា«បើអ្នកណាចង់ជាប់គុក យើងនឹងបំពេញតាមបំណងប្រាថ្នា»
×![]()
ភ្នំពេញ៖ អ្នករិះគន់បញ្ហាព្រំដែន នឹងប្រឈមមុខចាប់ខ្លួនបន្តទៀត។ សម្ដេច ហ៊ុន សែន ប្រកាសបែបនេះ ក្នុងពិធីសម្ពោធសួន«ទឹកហ្គាឌិនស៊ិធី» ស្ថិតនៅខណ្ឌជ្រោយចង្វារ រាជធានីភ្នំពេញ នៅថ្ងៃទី១៦ សីហានេះ។
សម្ដេច ហ៊ុន សែន បានអះអាងថា រដ្ឋាភិបាល យកចិត្តទុកដាក់ដោះស្រាយបញ្ហាព្រំដែន ជាមួយប្រទេសជិតខាងហើយ ប៉ុន្តែនៅតែមានអ្នករិះគន់លើបញ្ហានេះ រួមទាំងចោទរដ្ឋាភិបាល«ក្បត់ជាតិ»ទៅវិញ។ ពាក្យរិះគន់រដ្ឋាភិបាលថា «ក្បត់ជាតិ» ដោយថាគប់គិតដោះដូរដីជាមួយប្រទេសជិតខាងនេះ ធ្វើឱ្យលោកនាយករដ្ឋមន្ត្រី មិនសប្បាយចិត្តឡើយ។
ព្រោះតែការមិនសប្បាយចិត្តនេះហើយ ទើបសម្ដេច ហ៊ុន សែន ប្រកាសបន្តចាប់ខ្លួនអ្នករិះគន់រឿងព្រំដែននេះថែមទៀត។ ប្រមុខរដ្ឋាភិបាល ដែលនិយាយខ្លាំងយ៉ាងដាច់ណាត់ ក្នុងពិធីសម្ពោធសួនទឹក នៅព្រឹកនេះ បានប្រកាសដូច្នេះថា៖ «សុំផ្ញើរសារ (ទៅអ្នករិះគន់)ចេញមកប៉ុន្មានចាប់ប៉ុណ្ណឹង»។
កន្លងមកមានការលើកឡើងថា ការរិះគន់លើបញ្ហាព្រំដែននេះ គឺគ្រាន់តែជាការតស៊ូមតិ ដើម្បីផលប្រយោជន័៍ជាតិប៉ុណ្ណោះ។ ប៉ុន្តែសម្ដេច ហ៊ុន សែន មិនយល់ឃើញបែបនេះឡើយ។ «អ្នកខ្លះថា (បញ្ហាព្រំដែន)ជារឿងតស៊ូមតិ (រឿងព្រំដែន)អត់តស៊ូមតិទេ។ វាជារឿងផ្លូវច្បាប់សុទ្ធសាធ ព្រោះវាមិនមែនជាពេលត្រូវការធ្វើប្រជាមតិ»។ នេះជាការបញ្ជាក់របស់សម្ដេច ហ៊ុន សែន ដែលបាននិយាយបែបផ្លែផ្កាទៅអ្នករិះគន់រឿងព្រំដែនថា «បើអ្នកណាចង់ជាប់គុក យើងនឹងបំពេញតាមបំណងប្រាថ្នា»។
នាយករដ្ឋមន្ត្រី ហ៊ុន សែន បានអះអាងថា រាល់ការចាប់ខ្លួនអ្នករិះគន់បញ្ហាព្រំដែនទាំងអស់ គឺក្រោមបទល្មើសជាក់ស្ដែង ដែលត្រូវចាប់ខ្លួនភ្លាមៗនៅហ្នឹងកន្លែង។ ប្រមុខរដ្ឋាភិបាល ដែលរំឭកត្រួសៗពីការចាប់ខ្លួនអតីតមន្ត្រីគណបក្សសង្គ្រោះជាតិ ពាក់ព័ន្ធនឹងការរិះគន់រឿងព្រំដែនកន្លងមក បានលើកយកមកពន្យល់ដូច្នេះថា៖«ការចាប់ខ្លួន ហុង សុខហួរ អតីតសមាជិកព្រឹទ្ធសភា និង អ៊ុំ សំអាន អតីតសមាជិករដ្ឋសភា គឺចាប់ក្នុងបទល្មើសជាក់ស្ដែង។ រឿងអីស្នេហាជាតិតែឯង»។
កាលពីថ្ងៃទី ១៤ សីហា សមត្ថកិច្ច បានចាប់ខ្លួនលោក សួង សុភ័ណ្ឌ ប្រធានគណបក្សខ្មែរឈ្នះ និងជាអតីតសកម្មជន នៃអតីតគណបក្សសង្គ្រោះជាតិ ក្រោមហេតុផលថា ប្រព្រឹត្តបទល្មើសជាក់ស្ដែង ពាក់ព័ន្ធនឹងការបំភ្លៃការពិត លើបញ្ហាព្រំដែន។ ការចាប់លោក សួង សុភ័ណ្ឌ នេះ ធ្វើឡើងក្រោយពីប្រធានបក្សខ្មែរឈ្នះរូបនេះ បានចេញសេចក្តីថ្លែងការណ៍មួយ កាលពីថ្ងៃទី១១ ខែសីហា ឆ្នាំ២០២០ ដោយព្រមានធ្វើបាតុកម្មទាមទារឲ្យដោះលែង លោករ៉ុង ឈុន ដែលត្រូវបានតុលាការឃុំខ្លួនពាក់ព័ន្ធនឹងបទល្មើសព្រំដែននេះដែរ។
លោក រ៉ុង ឈុន ដែលជាតំណាងក្រុមប្រឹក្សាឃ្លាំមើលកម្ពុជា ជាមេសហជីព និង ជាទីប្រឹក្សានៃសមាគមគ្រូបង្រៀនឯករាជ្យកម្ពុជា ត្រូវបានចាប់ខ្លួន នៅយប់ថ្ងៃទី៣១ ខែកក្កដា ឆ្នាំ២០២០នេះ ដោយលោករងការចោទប្រកាន់ថា បានបំផ្លើសខុសការពិតក្នុងរឿងព្រំដែន។
ទាំងលោក រ៉ុង ឈុន និងលោក សួង សោភ័ណ្ឌ កំពុងជាប់ឃុំនៅពន្ធនាគារព្រៃស ក្រោមបទចោទញុះញង់ឱ្យប្រព្រឹត្តអំពើបង្កឱ្យមានភាពវឹកវរធ្ងន់ធ្ងរដល់សន្តិសុខសង្គម តាមមាត្រា៤៩៤ និងតាម៤៩៥ នៃក្រមព្រហ្មទណ្ឌ។ តុលាការ ចាត់ទុកបទល្មើសរបស់លោក ថាជាបទល្មើសជាក់ស្តែង។
ដោយឡែកអ្នកដែលចូលរួមបាតុកម្មតវ៉ាទាមទារឱ្យដោះលែងលោក រ៉ុង ឈុន នោះ ក៏ត្រូវបានសមត្ថកិច្ចរារាំង និងចាប់ខ្លួនជាបន្តបន្ទាប់ដែរ ដែលសរុបមកដល់ពេលនេះ មានចំនួនជិត១០នាក់ហើយ។ សង្គមស៊ិវិល ចាត់ទុកការប្រើអំពើហិង្សាពីកម្លាំងអាជ្ញាធរ ទៅលើក្រុមយុវជននិងប្រជាពលរដ្ឋ ជាពិសេសទៅលើស្ត្រីដែលតវ៉ាទាមទារឱ្យដោះលែងលោក រ៉ុង ឈុន នេះថា ជាការរំលោភសិទ្ធិមូលដ្ឋាន។
មិនតែប៉ុណ្ណោះអង្គការជាតិនិងអង្គការអន្តរជាតិនានា អំពាវនាវជាបន្តបន្ទាប់ឱ្យទម្លាក់បទចោទ និងដោះលែងលោក រ៉ុង ឈុន រួមទាំងអ្នករិះគន់រឿងព្រំដែនដែរ។ ពួកគេ យល់ថា ការចាប់ខ្លួនប្រធានសហជីពរូបនេះ និងអ្នកពាក់ព័ន្ធ គឺជាការគំរាមកំហែងដោយផ្ទាល់ចំពោះប្រជាពលរដ្ឋកម្ពុជា ដែលប្រើប្រាស់សិទ្ធរបស់ខ្លួនក្នុងបញ្ចេញមតិ៕
Tag:
ហ៊ុន សែន
ព្រំដែន
© រក្សាសិទ្ធិដោយ thmeythmey.com
