កីឡាជាតិ
ជាតិ
លោក យ៉ែម វណ្ណៈ អ្នកវាយតម្លៃអាជ្ញាកណ្តាលបាល់ទាត់ ទទួលមរណភាពក្នុងវ័យ៣៩ឆ្នាំ
× លោក យ៉ែម វណ្ណៈ អ្នកវាយតម្លៃអាជ្ញាកណ្តាលបាល់ទាត់ និងជាគ្រូអប់រំកាយនិងកីឡានៅវិទ្យាល័យច្បារអំពៅបានទទួលមរណភាពក្នុងវ័យ៣៩ឆ្នាំនៅថ្ងៃទី១៥ ខែសីហា ឆ្នាំ២០២០។ សពរបស់លោកកំពុងតម្កល់ធ្វើបុណ្យនៅស្រុកកំណើតក្នុងខេត្តកំពង់ធំ។
បើតាមលោក កែវ សារ៉េត អគ្គលេខាធិការនៃសហព័ន្ធកីឡាបាល់ទាត់កម្ពុជា លោក យ៉ែម វណ្ណៈ ត្រូវបានក្រុមគ្រួសារបញ្ជូនមកសម្រាកព្យាបាលនៅមន្ទីរពេទ្យកាល់ម៉ែតនៅថ្ងៃព្រឹកទី១៥ ខែសីហា ឆ្នាំ២០២០ ក្រោយជំងឺលើសជាតិស្ករក្នុងឈាម និងទឹកដក់ក្នុងសួតធ្វើទុក្ខខ្លាំង។ ដោយសារមិនអាចទ្រាំទ្រនឹងជំងឺទាំងនេះ លោក ក៏បានទទួលមរណភាពនៅយប់ថ្ងៃទី១៥ សីហា តែម្តង។
អគ្គលេខាធិការរូបនេះបន្ថែមថា ក្រៅពីអាជីពជាមន្ត្រីវាយតម្លៃអាជ្ញាកណ្តាលបាល់ទាត់ អតីតកីឡាករជម្រើសជាតិកម្ពុជាខាងលើ ក៏ជាអ្នកបណ្តុះបណ្តាលអាជ្ញាកណ្តាលបាល់ទាត់មួយរូបរបស់សហព័ន្ធកីឡាបាល់ទាត់កម្ពុជាផងដែរ។
លោក ស៊ុំ វណ្ណា គ្រូបង្វឹកក្រុមភ្នំពេញក្រោន និងជាមិត្តភក្តិជិតស្និទ្ធម្នាក់របស់លោក យ៉ែម វណ្ណៈ បានរៀបរាប់ពីប្រវត្តិថា ដំបូងឡើយលោក យ៉ែម វណ្ណៈ ជាអតីតកីឡាករជម្រើសប្រចាំខេត្តកំពង់ធំ។ ក្រោយមក លោក ក៏បានហៅលោក យ៉ែម វណ្ណៈ មកចូលរួមជាមួយក្លិបអគ្គភស្តុភារក្រសួងការពារជាតិ(កងយោធពលខេមរភូមិន្ទ)ជាមួយលោកក្នុងអំឡុងឆ្នាំ២០០០។
គ្រូបង្វឹករូបនេះបានបន្តទៀតថា ក្នុងអំឡុងពេលរួមរស់ជាមួយក្លិបនេះ លោក យ៉ែម វណ្ណៈ ត្រូវបានសហព័ន្ធកោះហៅឲ្យចូលរួមជាមួយក្រុមជម្រើសជាតិជាច្រើនលើក។ ប៉ុន្តែលោកមិនចាំឆ្នាំនោះទេ។ ក្រោយលោក និងលោក យ៉ែម វណ្ណៈ បានពិភាក្សាគ្នា និងចូលរៀននៅសាលាកីឡា បន្ទាប់លោក យ៉ែម វណ្ណៈ ក៏បានប្រឡងជាប់ជាគ្រូអប់រំកាយនិងកីឡារហូតមកបច្ចុប្បន្ន៕
Tag:
បាល់ទាត់
យ៉ែម វណ្ណៈ
© រក្សាសិទ្ធិដោយ thmeythmey.com