ជាតិ
២៥ខេត្ត/រាជធានី
×![]()
គម្រោងទេសចរណ៍លើទឹកស្ថិតក្នុងខេត្តសៀមរាប មានការជិះទូកលេងកម្សាន្ត និងញ៉ាំម្ហូបឆ្ងាញ់ៗ អាចនឹងបញ្ចប់នៅចុងសប្ដាហ៍នេះ ដើម្បីឲ្យទាន់ថ្ងៃឈប់សម្រាកនាថ្ងៃខាងមុខ។ នេះបើតាមលោក ង៉ូវ សេងកាក់ ប្រធានមន្ទីទេសចរណ៍ខេត្តសៀមរាបប្រាប់សារព័ត៌មានThmeyThmey25 តាមទូរសព្ទនៅថ្ងៃទី ១០ ខែសីហា ឆ្នាំ២០២០។
គម្រោងទេសចរណ៍បណ្ដែតទឹកខាងលើជាការរៀបចំដោយរដ្ឋបាលខេត្តសៀមរាប សហការជាមួយសហភាពសហព័ន្ធយុវជនកម្ពុជា (ស.ស.យ.ក) រៀបចំឡើងក្នុងគោលបំណងទាក់ទាញទេសចរក្នុងស្រុក និងបរទេស ដើម្បីបង្ហាញពីអត្តសញ្ញាណខ្មែរដូចជាម្ហូបអាហារ ការរស់នៅ របស់ពលរដ្ឋកម្ពុជាជាដើម។ គម្រោងនេះបច្ចុប្បន្នសម្រេចបានប្រមាណ ៨០ភាគរយ និងអាចបញ្ចប់នៅត្រឹមចុងសប្ដាហ៍នេះ។ នេះជាការលើកឡើងរបស់លោកប្រធានមន្ទីទេសចរណ៍ខេត្តសៀមរាប។
លោក សេងកាក់ បានបញ្ជាក់ថា៖ «នេះមិនមែនជាផ្សារបណ្ដែតទឹកដូចអ្នកលេងក្នុងបណ្ដាញសង្គមយល់នោះទេ គឺជាកម្សាន្តលើទឹកដោយមានទូកខ្មែរជាច្រើនចាំបម្រើអ្នកទេសចរ និងមានការរៀបចំម្ហូបអាហារនៅលើទូកកម្សាន្តនោះ»។ លោកបញ្ជាក់ថាអ្នកទេសចរអាចកំណត់ពេលវេលាក្នុងការជិះទូកកម្សាន្តនេះ ទៅតាមចិត្តរបស់អ្នកទេសចរ ប៉ុន្តែតម្រូវឲ្យអ្នកទេសចរទិញសំបុត្រជាមុនសិន។ ដោយឡែកពាក់ព័ន្ធតម្លៃសំបុត្រ លោកមិនទាន់អាចបញ្ជាក់បាននោះទេ គ្រាន់តែលោកបញ្ជាក់ពីការរៀបចំជាទេសចរណ៍លើទឹកនេះ មានរបៀបជាខ្មែរ។
បើតាមរដ្ឋបាលខេត្តសៀមរាប ក្រៅពីគម្រោងកម្សាន្តបណ្ដែតទឹករដ្ឋបាលខេត្តសៀមរាបបានរៀបចំឲ្យមានកម្មវិធីកម្សាន្តជាច្រើននៅថ្ងៃឈប់សម្រាកចាប់ពីថ្ងៃទី ១៧ សីហា ដល់ថ្ងៃទី ២១ សីហា ឆ្នាំ២០២០ ដូចជា៖ កម្មវិធីសាសនា,ពិព័រណ៍ផលិតផលកសិកម្ម,កម្មវិធីប្រកួតម្ហូបអាហារ,កម្មវិធីជិះកង់,កម្មវិធីកីឡាវាយកូនហ្គោល,កម្មវិធីដើរព្រៃ, និងផ្ទាំងទស្សនីយភាពសិល្បៈជាដើម។
ក្នុងនោះដែរ លោកប្រធានមន្ទីទេសចរណ៍ខេត្តសៀមរាបក៏អំពាវនាវដល់បងប្អូនប្រជាពលរដ្ឋអនុវត្ត និងពង្រឹងពីវិធានការ ការពារតាមគោលការណ៍របស់រាជរដ្ឋាភិបាល និងក្រសួងសុខាភិបាល ពាក់ម៉ាស ឧស្សាហ៍លាងសម្អាតដៃ និងរក្សាគម្លាត ដើម្បីកាត់បន្ថយហានិភ័យនៃការរាលត្បាតជំងឺកូវីដ១៩។
បើតាមរបាយការណ៍របស់ក្រសួងទេសចរណ៍ក្នុងខែកក្កដាកន្លងទៅ ខេត្តសៀមរាបមានភ្ញៀវទេសចរណ៍សរុបចំនួន ៥ ២៧១នាក់ ក្នុងនោះភ្ញៀវជាតិចំនួន ៣ ៣៤០នាក់ និងភ្ញៀវអន្តរជាតិចំនួន ១ ៩៣១នាក់៕
© រក្សាសិទ្ធិដោយ thmeythmey.com
