សម្ដេច ហ៊ុន សែន ប្ដូរចិត្តលែងសុំឱ្យUN ពន្យារពេលបញ្ចូនកងទ័ពមួកខៀវមកកម្ពុជាវិញ

ជាតិ

នយោបាយជាតិ

សម្ដេច ហ៊ុន សែន ប្ដូរចិត្តលែងសុំឱ្យUN ពន្យារពេលបញ្ចូនកងទ័ពមួកខៀវមកកម្ពុជាវិញ

17, Aug 2020 , 11:47 am

រូបភាព

ដោយ: ធឿន បញ្ញាឬទិ្ធ

ភ្នំពេញ៖ សម្ដេចនាយករដ្ឋមន្ត្រី ហ៊ុន សែន ប្ដូរចិត្តលែងសុំឱ្យអង្គការសហប្រជាជាតិ ពន្យារពេលបញ្ចូនកងទ័ពមួកខៀវមកកម្ពុជាវិញហើយ។ ការប្ដូរចិត្តរបស់សម្ដេចនេះ ធ្វើឡើងមួយថ្ងៃក្រោយពីប្រកាសស្នើទៅអង្គការសហប្រជាជាតិ នៅក្នុងពិធីសម្ពោធសួន«ទឹកហ្គាឌិនស៊ិធី» ស្ថិតនៅខណ្ឌជ្រោយចង្វារ រាជធានីភ្នំពេញ កាលពីថ្ងៃទី១៦ សីហា។

«ខ្ញុំបានសម្រេចឡើងវិញ គឺមិនសុំពន្យាពេលការវិលត្រឡប់របស់កងទ័ពមួកខៀវកម្ពុជានិងការបញ្ជូនកងទ័ពមួកខៀវទៅជំនួសនោះទេ»។ នេះជាការបញ្ជាក់របស់សម្ដេច ហ៊ុន សែន ដែលទើបទទួលបាននូវពេលវេលាជាក់លាក់នៃការវិលត្រឡប់និងការផ្លាស់ប្តូរកងទ័ពមួកខៀវកម្ពុជាដែលរៀបចំដោយអង្គការសហប្រជាជាតិ។

កងទ័ពមួកខៀវដែលត្រូវផុតអាណត្តិ ហើយត្រឡប់មកកម្ពុជាវិញនោះ រួមមាន កងកម្លាំងមកពីប្រទេសម៉ាលី ខែកញ្ញា២០២០ ,មកពីស៊ូដង់ខាងត្បូង ខែតុលា២០២០, មកពីអាហ្វ្រិកកណ្តាល ខែវិច្ឆិកា២០២០ និងលីបង់ ខែមករា២០២១។ នេះបើតាមការរៀបចំពេលវេលារបស់អង្គការសហប្រជាជាតិ ដែលបានផ្តល់ឱ្យកម្ពុជា ដើម្បីងាយស្រួលរៀបចំការធ្វើចត្តាឡីស័ក និងទប់ស្កាត់ការនាំចូលកូវីដ១៩មកក្នុងប្រទេស។

សម្ដេច ហ៊ុន សែន បានសរសេរលើហ្វេសប៊ុកដូច្នេះថា៖«សូមនាយទាហាន នាយទាហានរងនិងពលទាហានដែលកំពុងស្ថិតនៅប្រទេសទាំង៤ខាងលើរៀបចំខ្លួន ដើម្បីវិលត្រឡប់ និងសូមនាយទាហាននាយទាហានរងនិងពលទាហានដែលនឹងត្រូវទៅជំនួសរៀបចំខ្លួនចេញដំណើរ តាមការចាត់ចែងរបស់ក្រសួងការពារជាតិនិងអង្គការសហប្រជាជាតិ»។

បើទោះបីកម្ពុជា ជាប្រទេសក្រីក្រនិងកំពុងប្រឈមជាមួយកូវីដ១៩ក្តី ក៏រាជរដ្ឋាភិបាលកម្ពុជានិងកងទ័ពរបស់ខ្លួន មិនបោះបង់ចោលភារកិច្ចក្នុងការចូលរួមថែរក្សាសន្តិភាពនៅតាមប្រទេសនានាក្រោមឆត្ររបស់អង្គការសហប្រជាជាតិនោះឡើយ។ នេះបើតាមការអះអាងរបស់សម្ដេច ហ៊ុន សែន៕