អន្តរជាតិ
នយោបាយអន្តរជាតិ
នូវែលសេឡង់ ពន្យារពេលបោះឆ្នោតដល់ថ្ងៃទី ១៧ តុលា ដោយបារម្ភពី COVID-19 លោកស្រីJacinda Adern នាយករដ្ឋមន្ត្រីនូវែលហ្សេឡង់។ រូបភាព៖AFP
× នាយករដ្ឋមន្ត្រីនូវែលសេឡង់ លោកស្រីJacinda Arden នៅថ្ងៃទី១៧ សីហានេះបានប្រកាសថានឹងលើកការបោះឆ្នោត រយៈពេល៤សប្តាហ៍ គឺរហូតដល់ថ្ងៃទី១៧ តុលា។ មុនការប្រកាសរបស់លោកស្រី Jacinda Arden នូវែលសេឡង់ត្រូវបោះឆ្នោតសាកលនៅថ្ងៃទី១៧ កញ្ញា។
«ទីបំផុតទៅ ថ្ងៃទី១៧ តុលាផ្តល់ពេលវេលាគ្រប់គ្រាន់ ដល់គណបក្សនយោបាយក្នុងការរៀបយុទ្ធនាការឃោសនាបោះឆ្នោត នៅចំពោះមុខស្ថានការណ៍(COVID-19)»។ នេះជាការលើកឡើង របស់លោកស្រី Arden នៅក្នុងសន្នីសិទសារព័ត៌មាន។
ការសម្រេចពន្យារពេលបោះឆ្នោតនេះ ធ្វើឡើងដោយមានការពិភាក្សាជាមួយថ្នាក់ដឹកនាំគណបក្សជាច្រើន និងគណៈកម្មការបោះឆ្នោត។ប៉ុន្តែលោកស្រី អះអាងថាលោកស្រីនឹងមិនលើកពេលបោះឆ្នោតជាថ្មីឡើយ ទោះបីជាស្ថិតក្នុងស្ថានការណ៍ណាក៏ដោយ។ ការសម្រេចចិត្តនេះនាំឲ្យគណបក្សនយោបាយ មានពេល៩សប្តាហ៍ក្នុងការធ្វើយុទ្ធនាការ និងផ្តល់ពេលគណៈកម្មការបោះឆ្មោតនូវពេលវេលាគ្រប់គ្រាន់ក្នុងការរៀបចំបោះឆ្នោត។
ការព្រួយបារម្ភបានកើតឡើងសារជាថ្មី នៅនូវែលហ្សេឡង់ បន្ទាប់ពីប្រទេសនេះរកឃើញករណីCOVID-19 ជាថ្មីក្រោយគ្មានករណីឆ្លងរយៈពេល១០២ថ្ងៃ។ ករណីឆ្លងថ្មីជាពិសេសនៅទីក្រុងAuckland នេះ បានក្លាយជាសម្ពាធទាមទារឲ្យលោកស្រីនាយករដ្ឋមន្ត្រីផ្អាកការបោះឆ្នោត។
ការជោគជ័យក្នុងការទប់ស្កាត់ជំងឺឆ្លងនៅក្នុងប្រទេសនូវែលហ្សេឡង់ នាំឲ្យលោកស្រីArden បានប្រជាប្រិយភាពយ៉ាងខ្លាំង។ គេរំពឹងថា គណបក្សពលកររបស់លោកស្រីនឹងឈ្នះឆ្នោតបង្កើតរដ្ឋាភិបាលបាន ដោយមិនចាំបាច់រកសម្លេងជាមួយគណបក្សតូចៗរួមមានគណបក្ស Greens និង New Zealand First ដូចក្នុងអាណត្តិនេះ។
គណបក្ស Greens និង New Zealand First ដែលស្ថិតក្នុងរដ្ឋាភិបាលសុទ្ធតែគាំទ្រការពន្យារពេលនេះ ខណៈបក្សប្រឆាំង National Party បានទាមទារឲ្យផ្អាកការបោះឆ្នោតរហូតដល់ចុងខែវិច្ឆិការ ឬឆ្នាំក្រោយ៕ការទាមទាររបស់បក្សប្រឆាំងត្រូវបាន សហប្រធានបក្សGreens ចោទថា ចង់ចំណេញនយោបាយ ដោយសង្ឃឹមថាផលប៉ះពាល់ពីជំងឺឆ្លងCOVID-19 លើសេដ្ឋកិច្ចនឹងធ្វើឲ្យប្រជាប្រិយភាពរដ្ឋាភិបាលបច្ចុប្បន្នធ្លាក់ចុះ៕
© រក្សាសិទ្ធិដោយ thmeythmey.com