សង្គមអន្តរជាតិ
អន្តរជាតិ
លោក Jeff Bezos ស្ថាបនិកAmazon។ រូបភាព៖ Bloomberg
×![]()
ដោយ: ធៀន ភារិន្ទ
COVID-19 បានបំផ្លាញទ្រព្យសម្បត្តិជាច្រើនពាន់លានដុល្លារ និងមនុស្សជាច្រើនត្រូវបាត់បង់ការងារធ្វើ។ ស្របពេលជាមួយគ្នានេះ សេដ្ឋកិច្ចរបស់ប្រទេសជាច្រើន កំពុងតែរងគ្រោះដោយសារការបិទតំបន់ ឬទីក្រុង ឬប្រទេសទាំងមូល។ ផ្ទុយទៅវិញ ខណៈមនុស្សជាច្រើនកំពុងតែរងគ្រោះ មហាសេដ្ឋីជាច្រើននាក់ បែរជាកើនទ្រព្យសម្បត្តិជាច្រើនពាន់លានដុល្លារ។ នេះបើតាមទិន្នន័យរបស់ទស្សនាវដ្តីអាមេរិក Forbes ។ 
ខាងក្រោមនេះ គឺជាមហាសេដ្ឋី ដែលមានជាងគេបង្អស់ចំនួន ១០រូប ក្នុងសម័យ COVID- 19។
1. Jeff Bezos
លោក Jeff Bezos គឺជាស្ថាបនិក និងជាប្រធានប្រតិបត្តិរបស់ក្រុមហ៊ុនលក់អនឡាញ Amazon។ បើទោះបីពិភពលោកស្ថិតក្នុងវិបត្តិCOVID-19 ក៏ដោយ ប៉ុន្តែទ្រព្យសម្បត្តិរបស់មហាសេដ្ឋីរូបនេះ មានតែកើនឡើងទៅវិញ។ គិតត្រឹមថ្ងៃទី៧ ខែមេសា ទ្រព្យសម្បត្តិរបស់មហាសេដ្ឋីវ័យ៥៦ឆ្នាំរូបនេះ មានចំនួន ១១៣ពាន់លានដុល្លារ និងកើនដល់១៨៩ពាន់លានដុល្លារ ត្រឹមថ្ងៃទី៧ ខែសីហា ឆ្នាំ២០២០។
យ៉ាងណាក៏ដោយ ទ្រព្យសម្បត្តិរបស់លោក Bezos អាចនឹងបន្តកើនឡើងបន្ថែមទៀត ដោយសារតែការបញ្ជាទិញកាន់តែច្រើន ក្នុងអំឡុងពេលប្រជាជនគោរពតាមវិធានការរក្សាគម្លាតសុវត្ថិភាព និងការស្នាក់នៅផ្ទះជាដើម។
២. Bill Gates
លោក Bill Gates គឺជាសហស្ថាបនិកក្រុមហ៊ុន Microsoft ដែលក្រុមហ៊ុនលក់កម្មវិធីកុំព្យូទ័រដ៏ធំជាងគេមួយ។ ក្នុងបរិបទ COVID-19 ទ្រព្យសម្បត្តិរបស់ Bill Gates ក៏មានការកើនឡើងច្រើនដែរ។ បើតាមការចុះផ្សាយរបស់ទស្សាវដ្តី Forbes មហាសេដ្ឋីរូបនេះ បានកើនទ្រព្យសម្បត្តិពី៩៨ពាន់លានដុល្លារ ទៅ ១១៣,៦ពាន់លានដុល្លារ បើគិតមកត្រឹមថ្ងៃទី៧ ខែសីហា ឆ្នាំ២០២០។ នៅក្នុងខែឧសភាមូលនិធិ Bill និងMelinda Gates បាននិយាយថា ខ្លួននឹងបរិច្ចាគទឹកប្រាក់ចំនួន ៣០០លានដុល្លារសម្រាប់ការពារបាលអ្នកជំងឺ COVID-19 ការស្វែងរក និងការស្រាវជ្រាវវ៉ាក់សាំង COVID-19។
៣. Bernard Arnault និង គ្រួសារ
លោក Bernard Arnault ជា នាយក និងជាប្រធានប្រតិបត្តិក្រុមហ៊ុន LVMH។ ក្រុមហ៊ុន LVMH គឺជាក្រុមហ៊ុនលក់កាបូប ស្បែកជើង ខ្សែរក្រវ៉ាត់ និងសម្ភារមួយចំនួនទៀត ដែលល្បីល្បាញនៅទូទាំងពិភពលោក។ ទ្រព្យសម្បត្តិរបស់មហាសេដ្ឋី និងគ្រួសាររូបនេះ បានកើនឡើងពីរ ៧៦ពាន់លានដុល្លារ ទៅជាង ១០៧ពាន់លានដុល្លារ គិតត្រឹមថ្ងៃទី៧ ខែសីហា ឆ្នាំ២០២០។
៤. Mark Zuckerberg
លោក Mark Zuckerberg គឺជាសហស្ថាបនិក, ជានាយក និងជាប្រធានប្រតិបត្តិក្រុមហ៊ុន Facebook។ ធ្លាប់ជាមហាសេដ្ឋីលំដាប់ទី៧ របស់ពិភពលោក លោក Zuckerberg បានក្លាយជាមហាសេដ្ឋីលំដាប់ទី៤ បើគិតមកត្រឹមថ្ងៃទី៧ ខែសីហា។ មហាសេដ្ឋីវ័យក្មេងរូបនេះ បានកើនទ្រព្យសម្បត្តិពី ៥៤,៧ពាន់លានដុល្លារ ដល់៩៨ពាន់លានដុល្លារ។
៥. Mukesh Ambani
លោក Mukesh Ambani គឺជាជនជាតិឥណ្ឌា ដែលជាស្ថាបនិក និងជានាយកក្រុមហ៊ុន Reliance Industries ។ ក្រុមហ៊ុនរបស់លោក រកស៊ីលើវិស័យថាមពល រោងចក្រកាត់ដេរ ធនធានធម្មជាតិ និងទូរគមនាគមន៍ជាដើម។ អតីតមហាសេដ្ឋីលំដាប់ទី២១រូបនេះ បានកើនទ្រព្យសម្បត្តិពី៣៦,៨ពាន់លានដុល្លារ ទៅ ៨០,៤ពាន់លានដុល្លារ គិតត្រឹមថ្ងៃទី៧ ខែសីហា ឆ្នាំ២០២០។
៦. Warren Buffett
លោកWarren Buffett គឺជានាយកប្រតិបត្តិក្រុមហ៊ុនBerkshire Hathaway។ លោក Warren Buffett បានកើនទ្រព្យសម្បត្តិពី ៦៧,៥ពាន់លានដុល្លារ មក៧៩,២ ពាន់លានដុល្លារ។
៧. Steve Ballmer
លោក Steve Ballmer គឺជា ម្ចាស់ក្រុមបាល់បោះ Los Angeles Clippers និងជាអ្នកវិនិយោគមួយរូបរបស់អាមេរិក។ លោក Ballmer ក៏ជាអតីតនាយកប្រតិបត្តិរបស់ក្រុមហ៊ុន Microsoft ផងដែរ ចាប់ពីឆ្នាំ២០០០ ដល់២០១៤។ ទ្រព្បសម្បត្តិរបស់លោក បានកើនពី ៥២,៧ពាន់លានដុល្លារ ដល់ ៧២,៤ពាន់លានដុល្លារ។
៨. Larry Ellison
លោក Larry Ellison គឺជា ប្រធានបច្ចេកវិទ្យា (CTO) និងស្ថាបនិកក្រុមហ៊ុនបច្ចេកវិទ្យា និងកម្មវិធី Oracle។ ទ្រព្យសម្បត្តិរបស់លោក បានកើនពី ៥៩ពាន់លានដុល្លារ ដល់ ៧១,៨ពាន់លានដុល្លារ នៅក្នុងអំឡុងCOVID-19 ។
៩. Elon Musk
លោក Elon Musk គឺជាស្ថាបនិក និងជានាយកក្រុមហ៊ុន Tesla និង Space X ។ មួយរយៈចុងក្រោយនេះ ក្រុមហ៊ុន Space X បានទទួលជោគជ័យយ៉ាងខ្លាំង។ នាពេលថ្មីៗនេះ ក្រុមហ៊ុនSpace X បានដឹកជញ្ជូនអវកាសយានិកអាមេរិកចំនួន ២រូបទៅស្ថានីយអវកាស។ លើសពីនេះ Space X បានបាញ់បង្ហោះផ្កាយរណបយោធារបស់កូរ៉េខាងត្បូង បានដោយជោគជ័យថែមទៀត។ ទ្រព្យសម្បត្តិរបស់ Elon Must បានកើនពី ២៤,៦ពាន់លានដុល្លារ ដល់ ៦៩,៣ពាន់លានដុល្លារ។
១០. Larry Page
លោក Larry Page គឺជាសហស្ថាបនិក និងជាសមាជិកក្រុមប្រឹក្សាក្រុមហ៊ុន Alphabet ដែលមាន Google ជាក្រុមហ៊ុនបុត្រសម្ព័ន្ធ។ ទ្រព្យសម្បត្តិរបស់លោក បានកើនពី ៥០ពាន់លានដុល្លារ មក ៦៧ពាន់លានដុល្លារ បើគិតថ្ងៃទី៧ ខែសីហា ឆ្នាំ២០២០៕
Tag:
COVID-19
© រក្សាសិទ្ធិដោយ thmeythmey.com
