អតីតសមាជិកព្រឹទ្ធសភារដ្ឋ Delaware ចូ បៃឌិន ត្រូវបានបោះឆ្នោតជ្រើសរើសជាអនុប្រធានាធិបតីអាមេរិកទី ៤៧ ជាមួយប្រធានាធិបតី បារ៉ាក់ អូបាម៉ា ក្នុងឆ្នាំ២០០៨ និងជាប់ម្ដងទៀត ក្នុងឆ្នាំ២០១២។ បច្ចុប្បន្ន បុរសវ័យ៧៧ឆ្នាំរូបនេះ កំពុងឈានទៅកាន់តំណែងជាប្រធានាធិបតីអាមេរិកទី៤៦ ក្រោយលទ្ធផលបោះឆ្នោតកន្លងមក បង្ហាញថា លោកទទួលបានជ័យជម្នះលើលោក ដូណាល់ ត្រាំ។ ពិធីស្បថចូលកាន់តំណែងក្នុងសេតវិមាន នឹងប្រព្រឹត្តទៅនៅថ្ងៃទី២០ ខែមករា ឆ្នាំ២០២១។
មុននឹងឈានដល់តួនាទីនយោបាយកំពូលមួយក្នុងសហរដ្ឋអាមេរិក លោក បៃឌិន កើតក្នុងឆ្នាំ១៩៤២ ក្នុងត្រកូលកម្មករ ដោយឪពុកលោក Joseph Biden Sr. ធ្វើការជាកម្មករសម្អាតឡ និងជាអ្នកលក់រថយន្តមួយទឹក ហើយម្ដាយលោកជាស្ត្រីមេផ្ទះ។
អំឡុងឆ្នាំ១៩៦០ យុវជន បៃឌិន បានចូលសិក្សាថ្នាក់ឧត្ដមសិក្សានៅសាកលវិទ្យាល័យ Delaware ។ ទីនោះ លោកបានរៀនមុខជំនាញ វិទ្យាសាស្ត្រនយោបាយ និងប្រវត្តិសាស្ត្រ ហើយលេងបាល់ទាត់។ លោកចាប់អារម្មណ៍ខ្លាំងរឿងនយោបាយ។ ក្រោយបញ្ចប់ការសិក្សានៅ Delaware យុវជន បៃឌិន បន្តការសិក្សាផ្នែកច្បាប់នៅសាកលវិទ្យាល័យច្បាប់ Syracuse ក្នុងឆ្នាំ១៩៦៥។
ក្រោយបញ្ចប់ការសិក្សានៅសាលាច្បាប់ ក្នុងឆ្នាំ១៩៦៨ លោក បៃឌិន បានចាប់ផ្ដើមអាជីពជាមេធាវីនៅក្រុមហ៊ុនច្បាប់មួយ ក្នុងរដ្ឋ Delaware ហើយលោកក៏ជាសមាជិកដ៏សកម្មនៃបក្សប្រជាធិបតេយ្យប្រចាំរដ្ឋនោះផងដែរ។ ២ឆ្នាំក្រោយមក លោក ត្រូវបានបោះឆ្នោតធ្វើជាសមាជិកក្រុមប្រឹក្សាផ្នែកច្បាប់មួយ ហើយលោកក៏បានសម្រេចបង្កើតក្រុមហ៊ុនច្បាប់ខ្លួនឯង។
លោក បៃឌិន ក្លាយជាសមាជិកព្រឹទ្ធសភាទី៥ ក្នុងប្រវត្តិសាស្រ្តអាមេរិក
ក្នុងឆ្នាំ ១៩៧២ ថ្នាក់ដឹកនាំបក្សប្រជាធិបតេយ្យប្រចាំរដ្ឋ Delaware បានលើកទឹកចិត្តឲ្យ យុវជនវ័យ ២៩ឆ្នាំ បៃឌិន ចូលប្រកួតប្រជែងនឹងលោក J. Caleb Boggs សមាជិកបក្សសាធារណរដ្ឋដ៏ល្បីឈ្មោះកាលនោះ សម្រាប់កៅអីព្រឹទ្ធសភា។ ដោយប្រឹងធ្វើយុទ្ធនាការរកសំឡេងឆ្នោយដោយមិនខ្លាចនឿយហត់ ចុងក្រោយលោកបានយកជ័យជម្នះ ហើយក្លាយជាសមាជិកព្រឹទ្ធសភាក្មេងជាងគេទី៥ ក្នុងប្រវត្តិសាស្ត្រអាមេរិក។
បន្ថែមពីភាពមមាញឹកក្នុងអាជីពការងារ លោក បៃឌិន មានកូនៗ៣នាក់ រួមមាន Joseph Robinette "Beau" Biden III, Hunter Biden និង Naomi Biden។ «អ្វីគ្រប់យ៉ាងបានកើតឡើងលឿនជាងអ្វីដែលខ្ញុំបានរំពឹងទុក»។ លោក បៃឌិន រៀបរាប់ពីជីវិតលោកនៅពេលនោះ។
ស្របពេលដែលលោក កំពុងជួបរឿងល្អៗក្នុងជីវិតមិនថា ការងារ និងគ្រួសារ លោកបែរពើបប្រទះរឿងដ៏សោកសង្រេងមួយ។ មួយសប្តាហ៍មុនពិធីបុណ្យ Christmas ក្នុងឆ្នាំ១៩៧២ ភរិយាលោកបៃ ឌិន និងកូនៗទាំងបីនាក់ បានជួបប្រទះគ្រោះថ្នាក់ចរាចរណ៍ដ៏អាក្រក់មួយ ខណៈពួកគេធ្វើដំណើរទៅទិញអ៊ីវ៉ាន់សម្រាប់ថ្ងៃ Christmas ។
លោក បៃ ឌិន និងកូនប្រុស Beau
គ្រោះកាចនេះ បានឆក់យកជីវិតភរិយាលោក និងកូនស្រីម្នាក់ ហើយបានបង្កឲ្យកូនប្រុសលោកទាំងពីរនាក់ រួមមាន Beau និង Hunter របួសធ្ងន់ធ្ងរ។ កាលនោះ លោក បៃឌិន លែងអាចគ្រប់គ្រងអារម្មណ៍ខ្លួនឯងបាន ហើយបានទាំងគិតចង់សម្លាប់ខ្លួនឯងទៀតផង។ លោករម្លឹកថា៖«ខ្ញុំចាប់ផ្ដើមយល់ថា ការធ្វើអត្តឃាត ពុំគ្រាន់តែជាជម្រើសមួយទេ តែវាជាជម្រើសដ៏សមហេតុផលបំផុតមួយ។ ខ្ញុំមានអារម្មណ៍ថា ព្រះជាម្ចាស់បានលេងល្បិចអាក្រក់លើរូបខ្ញុំ ហើយខ្ញុំខឹងណាស់»។
៥ឆ្នាំក្រោយការស្លាប់ប្រពន្ធទី១ លោក បៃឌិន បានរៀបការជាមួយអ្នកស្រី ជិល បៃឌិន (Jill Biden) ហើយរួមរស់នៅជាមួយគ្នារហូតមកដល់បច្ចុប្បន្ន ។ គូស្វាមីភរិយាមួយគូនេះ មានកូនស្រីម្នាក់ ឈ្មោះថា Ashley កើតក្នុងឆ្នាំ១៩៨១។
និយាយដល់ជីវិតជាសមាជិកព្រឹទ្ធសភាអាមេរិកវិញ លោកបានកាន់តំណែងនេះចាប់ពីឆ្នាំ១៩៧៣ រហូតដល់ ឆ្នាំ២០០៩។ អំឡុងពេលកាន់តំណែងនេះ លោកជាមនុស្សដែលខ្លាំងខាងគោលនយោបាយការបរទេស។ ហើយលោក ក៏មានមហិច្ឆតាធ្វើជាប្រធានាធិបតីដែរ ដោយក្នុងឆ្នាំ១៩៨៧ លោកបានសម្រេចចូលប្រកួតយកតំណែងកំពូលរបស់អាមេរិកមួយនេះ។ តែលោកទម្លាក់ចោលបេក្ខភាពតំណាងបក្សប្រជាធិបតេយវិញក្នុងឆ្នាំ១៩៨៨ ក្រោមមានបញ្ហាសុខភាពធ្ងន់ធ្ងរអំឡុងពេលយុទ្ធនាការរកសំឡេងឆ្នោត។
ការតស៊ូមតិក្នុងចំណោមបេក្ខជនបក្សប្រជាធិបតេយ្យ អំឡុងឆ្នាំ២០០៧
ក្នុងឆ្នាំ២០០៧ ពោលគឺ២០ឆ្នាំក្រោយបរាជ័យលើកទី១ក្នុងការដណ្ដើមយកតំណែងជាប្រធានាធិបតីអាមេរិក អ្នកនយោបាយជើងចាស់ បៃឌិន បានសម្រេចចិត្តចូលប្រជែងជាថ្មីម្ដងទៀត។ ទោះជាមានបទពិសោធន៍ច្រើនឆ្នាំក្នុងព្រឹទ្ធសភាអាមេរិក យុទ្ធនាការរកសំឡេងឆ្នោតរបស់លោក បៃឌិន មិនសូវទទួលបានការគាំទ្រ ដ្បិតមានគូប្រជែងខ្លាំងៗដូចជា អ្នកស្រី Hillary Clinton និងលោក បារ៉ាក់ អូបាម៉ា។ ចុងក្រោយ លោកបានសម្រេចចាកចេញក្នុងសមរភូមិនេះ ក្រោយទទួលបានសំឡេងបោះឆ្នោតតិចជាង១ភាគរយក្នុងការបោះឆ្នោតបឋម (lowa caucuses) ក្នុងចំណោមបេក្ខជនបក្សប្រជាធិបយេយ្យ។
៧ខែក្រោយមក លោក អូបាម៉ា ដែលក្លាយជាបេក្ខជនឈានមុខរបស់បក្សប្រជាធិបតេយ្យ ក្រោយយកឈ្នះអ្នកស្រី Clinton បានជ្រើសរើសលោក បៃឌិន ជាដៃគូ។ ដោយមានឬសគល់មកពីគ្រួសារកម្មករ លោក បៃឌិន បានជួយយុទ្ធនាការលោក អូបាម៉ា បញ្ចុះបញ្ចូលអ្នកគាំទ្រដែលកម្មករឲ្យបោះឆ្នោតជូនពួកគេ។
ក្នុងថ្ងៃទី២ ខែវិច្ឆិកា ឆ្នាំ២០០៨ លោក បារ៉ាក់ អូបាម៉ា និងលោក ចូ បៃឌិន បានយកឈ្នះក្នុងបោះឆ្នោត ហើយនៅថ្ងៃទី២០ ខែមករា ឆ្នាំ២០០៩ លោក អូបាម៉ា បានស្បថចូលកាន់តំណែងជាប្រធានាធិបតីអាមេរិកទី៤៤ និងលោក បៃឌិន ក្លាយជាអនុប្រធានាធិបតីទី៤៧។ លោក អូប៉ាម៉ា និងបៃឌិន បានឈ្នះការបោះឆ្នោតអាណត្តិទី២ក្នុងឆ្នាំ២០១២ ហើយលោកបៃឌិនក្លាយជាអនុប្រធានាធិបតីអាមេរិកមួយអាណត្តិទៀត។
សោកនាដកម្មធំមួយទៀតក្នុងជីវិតលោក បៃឌិន បានកើតឡើងនៅពេលកូនប្រុសលោកម្នាក់ទៀត គឺលោក Beau ក្នុងខែឧសភាឆ្នាំ២០១៥ បានស្លាប់នៅអាយុ៤៦ឆ្នាំ ដោយសារជំងឺមហារីកខួរក្បាល។ ក្រោយហេតុការណ៍នេះ លោកសម្រេចមិនចូលរួមប្រជែងតំណែងប្រធានាធិបតីអាមេរិកក្នុងឆ្នាំ២០១៦។
លោក បៃឌិន ត្រូវបានប្រធានាធិបតី អូបាម៉ា ប្រគល់មេដាយសេរីភាព (Presidential Medal of Freedom)
យ៉ាងណា នៅមុនពេលចប់អាណត្តិជាអនុប្រធានាធិបតីអាមេរិក លោក បៃឌិន ត្រូវបានប្រធានាធិបតី អូបាម៉ា ប្រគល់មេដាយសេរីភាព (Presidential Medal of Freedom) ហើយក្នុងពិធីប្រគល់នេះ លោក អូបាម៉ា បានហៅលោកបៃឌិនថាជា«អនុប្រធានាធិបតីល្អបំផុតដែលសហរដ្ឋអាមេរិកធ្លាប់មាន» និងជា«តោនៃប្រវត្តិសាស្ត្រអាមេរិក»។
ទោះចាកចេញពីសេតវិមានអាមេរិក លោក បៃឌិន នៅតែបន្តសកម្មក្នុងឆាកនយោបាយ។ ជារឿយៗ លោកបានរិះគន់ចំៗលើប្រធានាធិបតី ដូណាល់ ត្រាំ ហើយធ្លាប់ទាំងបានប្រកាសក្ដែងៗទៀតថា លោក ត្រាំ អត់យល់ការក្នុងរឿងអភិបាលកិច្ចឡើយ។
នៅថ្ងៃទី ២៥ ខែមេសា ឆ្នាំ២០១៩ លោក បៃឌិន បានប្រកាសដំណឹងដ៏ភ្ញាក់ផ្អើលមួយ ដែលលោកនឹងចូលរួមប្រកួតប្រជែងតំណែងប្រធានាធិបតីអាមេរិកក្នុងការបោះឆ្នោតឆ្នាំ២០២០។ ឆ្លងកាត់ការតស៊ូមតិក្នុងបក្សជាច្រើនលើក ហើយទទួលការគាំទ្រខ្លាំងផងនោះ បច្ចុប្បន្ន លោក បៃឌិន ស្ថិតក្នុងជំហានទៅកាន់កាប់សេតវិមានក្នុងតួនាទីជាប្រធានាធិបតីទី៤៦របស់សហរដ្ឋអាមេរិក។
លោក បៃឌិន នៅថ្ងៃទី១១ ខែសីហា បានប្រកាសរើសយកអ្នកស្រី Kamala Harris ដៃគូលោក ហើយក៏ជាកៅអីអនុប្រធានាធិបតីអាមេរិក បើលោកឈ្នះឆ្នោត
ដូចការសន្យាអំឡុងការតស៊ូមតិមួយស្មើជាមួយសមាជិកព្រឹទ្ធសភា Bernie Sanders កាលពីខែមីនា លោក បៃឌិន នៅថ្ងៃទី១១ ខែសីហា បានប្រកាសរើសយកអ្នកស្រី Kamala Harris ដៃគូលោកសម្រាប់តំណែងជាបេក្ខភាពអនុប្រធានាធិបតីអាមេរិក។
បើអ្វីទាំងអស់ដូចជាការគ្រោងទុក លោក បៃឌិន នឹងក្លាយជាប្រធានាបតីដែលមានអាយុចាស់ជាងគេនៅពេលចូលកាន់តំណែង ពោលគឺក្នុងអាយុ៧៧ឆ្នាំ ដោយបំបែកកំណត់ត្រា លោក ដូណាល់ ត្រាំ ដែលមានអាយុ៧០ឆ្នាំ និងលោក Ronald Reegan ដែលមានអាយុ៦៩ឆ្នាំ ពេលចូលកាន់តំណែង៕