បច្ចុប្បន្ន យុវជនខ្មែរវ័យក្មេងកាន់តែច្រើន ប្រកបរបររកស៊ីបង្កើនប្រាក់ចំណូល ពីវិស័យកសិកម្ម ពិសេសការចិញ្ចឹមសត្វដូចជាការចិញ្ចឹមពពែ កង្កែប កន្ធាយ ត្រី និងមាន់ទាជាដើម។ ពួកគេយល់ថា ការចិញ្ចឹមសត្វងាយស្រួល បានផលលឿន និងសម្បូរទីផ្សារផង។ ចំពេលវិបត្តិកូវីដ-១៩ វិស័យកសិកម្ម ក៏កាន់តែបង្ហាញនូវសក្តានុពល និងភាពសំខាន់របស់ខ្លួន ហើយរាជរដ្ឋាភិបាលកម្ពុជា ក៏កាន់តែជំរុញ និងលើកកម្ពស់ផលិតកម្មកសិកម្មនេះកាន់តែខ្លាំង។
កញ្ញា កន សុខណុច ជានិស្សិតឆ្នាំទី៣ជំនាញវិទ្យាសាស្ត្រជលផល នៃវិទ្យាស្ថានជាតិកសិកម្មកំពង់ចាម។ យុវតីវ័យ ? រូបនេះបានចាប់ផ្តើមចិញ្ចឹមកង្កែប (នៅទីណា?) កាលពីខែឧសភា ឆ្នាំ២០២០ថ្មីៗនេះប៉ុណ្ណោះ។ មានស្រុកកំណើតនៅ នៅភូមិអូយ៉េះ ឃុំស្រែសង្គម ស្រុកកោះញែក ខេត្តមណ្ឌលគិរី សុខណុច បានប្រាប់សារព័ត៌មាន ThmeyThmey25 ថានាងចាប់ផ្តើមចិញ្ចឹមកង្កែបនេះ គឺដោយសារនាងនាងចង់ប្រើប្រាស់ពេលវេលាទំនេររបស់ខ្លួន ឲ្យមានប្រយោជន៍ ស្របពេលដែលសាលារៀនត្រូវផ្អាក នៅអំឡុងវិបត្តិកូវីដ-១៩។ ទន្ទឹមនឹងនេះ នាងក៏មើលឃើញថាការចិញ្ចឹមកង្កែបនេះ នៅមិនទាន់មានអ្នកធ្វើច្រើនឡើយ នៅស្រុកកំណើតរបស់ខ្លួន។
លោក លីហៀង និងក្រុមចិញ្ចឹមពពែ (ពាក់អាវក្រហមមូរដៃ)
សុខណុច បន្ថែមទៀតថា៖« កង្កែប មានទីផ្សារល្អ តែមិនទាន់មានអ្នកណាចាប់ផ្ដើមចិញ្ចឹមនៅឡើយ។ ខ្ញុំគិតថា វាជាឱកាសល្អមួយ ដែលយើងជាអ្នករៀនជំនាញនេះស្រាប់ បានដកពិសោធន៍ផ្ទាល់ ពីជំនាញដែលរៀន»។
វិបត្តិកូវីដ-១៩ ហាក់បានធ្វើឲ្យវិស័យកសិម្មកាន់តែមានភាពសំខាន់ ក្នុងការធានាបាននិរន្តរភាពស្បៀងអាហារ និងរក្សាបានស្ថិរភាពសេដ្ឋកិច្ច។ ផ្នែកវារីវប្បកម្ម និងការចិញ្ចឹមសត្វ បានកើនសន្ទុះឡើងយ៉ាងខ្លាំង គួរឲ្យកត់សម្គាល់។
យុវជន ហ៊ិម លីហៀង និងមិត្តភក្តិ៣នាក់ទៀត ក៏បានចាប់យកឱកាសនៅក្នុងអំឡុងវិបត្តិកូវីដ-១៩ មកចិញ្ចឹមកន្ធាយ និងពពែយកសាច់ផងដែរ ដោយសារតែការស្រលាញ់ការចិញ្ចឹមសត្វ និងយល់ថាសត្វងាយចិញ្ចឹម ហើយក៏ទទួលបានទិន្នផលខ្ពស់។ មានវ័យ២៧ឆ្នាំ លោក លីហៀង ដែលមានស្រុកកំណើតនៅភូមិសំរោងយា ឃុំសំរោងយា ស្រុកពួក ខេត្តសៀមរាបបានប្រាប់ ThmeyThmey25ថា៖ «ខ្ញុំនិងមិត្តភក្តិ គិតគ្នាថា ឆ្លៀតពេលសម្រាកពីការងារ អំឡុងពេលកូវីដ-១៩ ហ្នឹងចិញ្ចឹមសត្វ ព្រោះមើលឃើញថាវិស័យកសិកម្មសព្វថ្ងៃ កំពុងមានការយកចិត្តទុកដាក់ពីរដ្ឋាភិបាល។ ពួកគាត់ បានបញ្ជូនអ្នកឯកទេសទាក់ទងការចិញ្ចឹម ដើម្បីផលិតសាច់ឲ្យបានច្រើន ទៅតាមតម្រូវការទីផ្សារបច្ចុប្បន្ន»។
កន្លែងចិញ្ចឹមកង្កែបរបស់យុវតី កន សុខណុច
លោក លីហៀង បានប្រាប់ ThmeyThmey25 បន្ថែមថា បើទៅបច្ចុប្បន្ន លោកមានកសិដ្ឋានចិញ្ចឹមសត្វទាំងពីរកន្លែងមែន ប៉ុន្តែនៅតែមិនទាន់អាចផ្គត់ផ្គង់ឲ្យគ្រប់នឹងតម្រូវការទីផ្សារដ៏ច្រើននៅឡើយ។ លោក លីហៀង ប្រាប់ thmeythmey25 ថានឹងពង្រីកការចិញ្ចឹមបន្ថែមទៀតនៅថ្ងៃមុខ។
យុវជនម្នាក់ទៀតរស់នៅខេត្តស្វាយរៀង ក៏ទើបចាប់ផ្តើមការចិញ្ចឹមត្រី កង្កែប និងមាន់លក្ខណៈគ្រួសារដែរ។ ក្រៅពីនេះ យុវជន សូ សុទ្ធ វ័យ២៦ឆ្នាំ ក៏ជាម្ចាស់កសិដ្ឋានអាហ្សូឡាស្វាយរៀងផងដែរ។ អាហ្សូឡាគឺជារុក្ខជាតិដែលយកលាយជាំមួយបាយ និងកន្ទក់ ធ្វើជាចំណីធម្មជាតិសម្រាប់មាន់ ទា ត្រី កង្កែប និងចំណីជ្រូកជាដើម។ យុវជនរូបនេះ បានពន្យល់មូលហេតុប្រាប់ ThmeyThmey25 ថារូបគេផ្តើម ចិញ្ចឹមមាន់ កង្កែប និងត្រី ព្រោះរូបគេ ចង់ចាប់ផ្តើមឲ្យបានមុនគេខណៈអ្នកផ្សេង គេនៅមិនទាន់មើលឃើញពីសក្តានុពលនៃរបរនេះ។
ក្រៅពីយុវជនទាំង៣នាក់នេះ យើងសង្កេតឃើញថា មានយុវជនជាច្រើនទៀតនៅតំបន់ផ្សេងៗគ្នានៃប្រទេសកម្ពុជាកំពុងប្រកបរបរទទួលទានលើវិស័យកសិកម្មនេះ ដូចជាការដាំបន្លែចម្រុះ និងការចិញ្ចឹមបង្គា,បង្កង,ក្តាម,អន្ទង់ និងចង្រឹតសត្វនេះជាដើម៕
កន្លែងចិញ្ចឹមកន្ធាយរបស់លោក ហ៊ិម លីហៀង និងក្រុម
កសិដ្ឋានចិញ្ចឹមពពែរបស់លោក ហ៊ិម លីហៀង និងក្រុម
យុវជន សូ សុទ្ធ ម្ចាស់កសិដ្ឋានអាហ្សូឡា និងចិញ្ចឹមមាន់ ត្រី កង្កែប
យុវតី កន សុខណុច