«៣មិន» របស់សមាជិកសភាបក្សកាន់អំណាចសិង្ហបុរី

អន្តរជាតិ

នយោបាយអន្តរជាតិ

«៣មិន» របស់សមាជិកសភាបក្សកាន់អំណាចសិង្ហបុរី

20, Aug 2020 , 9:39 am

រូបភាព

ទិដ្ឋភាពខាងក្នុងសាលប្រជុំសភាសិង្ហបុរី។ រូបភាព Straits Times

ដោយ: តន ចាន់រិទ្ធារ៉ា

នាយករដ្ឋមន្ត្រីរដ្ឋសិង្ហបុរី លី សៀនឡុង បានសរសេរលិខិតមួយផ្ញើដែលចែងពីបញ្ញត្តិនានាឲ្យសមាជិកសភាបក្សសកម្មភាពប្រជាជនទាំងអស់។ ក្នុងលិខិតផ្សាយនៅដើមខែសីហានេះ លោក លី ដែលជាអគ្គលេខាធិការបក្សផង បានរៀបរាប់ពីសកម្មភាពទាំងឡាយដែលសមាជិកសភាបក្សកាន់អំណាចទាំងអស់ ត្រូវធ្វើ ឬមិនត្រូវធ្វើពេលកំពុងកាន់តំណែង។ ការរក្សាភាពស្អាតស្អំ ស្មោះត្រង់ សុចរឹត ជាគោលការណ៍ដែលសមាជិកសភាទាំងអស់ត្រូវអនុវត្តឲ្យម៉ត់ចត់។

ជាទម្លាប់ នាយករដ្ឋមន្ត្រីសិង្ហបុរី តែងចេញបទបញ្ញត្តិមួយសម្រាប់សមាជិកសភាបក្សអំណាចអនុវត្តក្រោយការបោះឆ្នោត។ សម្រាប់អាណត្តិថ្មីដែលកើតចេញពីការបោះឆ្នោតថ្ងៃទី១០ ខែកក្កដា លោក លី សៀនឡុង បានចេញលិខិតមួយដែលចែងពីបញ្ញត្តិទាំងឡាយដែលសមាជិកសភាបក្សសកម្មភាពប្រជាជន អនុវត្តក្នុងអាណត្តិរបស់ខ្លួន។ សារព័ត៌មានថ្មីៗ សូមរំលេចចំណុចសំខាន់ «៣មិន» សម្រាប់សមាជិកសភាបក្សកាន់អំណាច។

១. មិនប្រើតួនាទីដើម្បីប្រយោជន៍ខ្លួន បក្ខពួក

លោក លី និយាយថា អំឡុងពេលកាន់អំណាច សមាជិកសភាប្រាកដជាជួបបុគ្គលជាច្រើនប្រភេទ។ អ្នកខ្លះនឹងចង់ជួយដោយមិនចង់បានមកវិញ តែក៏មានអ្នកដែលសម្លឹងឃើញលាភសក្ការៈផងដែរ។ លោកព្រមានថា ពួកគេនឹងប្រើវិធីសាស្ត្រគ្រប់យ៉ាងដើម្បីអូសទាញសមាជិកសភាឲ្យធ្វើតាម ឬលើកជាគោលនយោបាយទៅកាន់រដ្ឋាភិបាលដែលផ្ដល់ប្រយោជន៍ឲ្យពួកគេវិញ។ លោក លី ប្រាប់សមាជិកសភទាំងអស់ កុំប្រើប្រាស់តួនាទីដើម្បីប្រយោជន៍ខ្លួន ឬបុគ្គលប្រភេទនេះ។

លោក ដាស់តឿនថា សមាជិកសភា ជាអ្នកបម្រើប្រជាជន មិនមែនជាម្ចាស់ឡើយ ដូចនេះពួកគេត្រូវស្ដាប់ប្រជាជនសិង្ហបុរី ជួយពួកគេក្នុងពេលលំបាក ហើយបំពេញតួនាទីឲ្យបានត្រឹមត្រូវ។

២. មិនទទួលវត្ថុអនុស្សាវរីយ៍ជាវត្ថុ ឬលុយកាក់

លោក លី ក៏រំឭកជាមុនដែរថា ក្នុងនាមជាសមាជិកសភា ពួកគេអាចត្រូវបានអញ្ជើញដោយមិត្តភក្តិ មេដឹកនាំថ្នាក់ក្រោម ឬអ្នកជំនួញឲ្យចូលរួមកាត់ខ្សែបូរចាប់ផ្ដើមការរកស៊ីណាមួយ ហើយនឹងត្រូវបានផ្ដល់លុយកាក់ត្រឡប់មកវិញក្នុងទម្រង់ការបរិច្ចាគចូលក្នុងមូលនិធិរបស់មណ្ឌលបោះឆ្នោត ឬកម្មវិធីសប្បុរសធម៌ជាដើម។ លោក លី ប្រាប់សមាជិកបក្សថា មិនត្រូវទទួលយការអញ្ជើញឡើយ។ ចំណែកវត្ថុអនុស្សាវរីយ៍ ក៏មិនអាចទទួលបានដែរ បើវានាំឲ្យពួកគេធ្វើខុសកាតព្វកិច្ច។ បើទទួលយកមែន សមាជិកសភានោះ ត្រូវជូនដំណឹងទៅកាន់មន្ត្រីសភា។

៣. មិនត្រូវបាត់មុខពីកម្មវិធីផ្លូវការដោយគ្មានមូលហេតុ

ក្រៅពីការបំពេញតួនាទីដោយតម្លាភាព សុចរឹត មិនពុករលួយ លោក លី ក៏ប្រាប់សមាជិកសភាទាំងអស់ឲ្យមានមុខនៅក្នុងកម្មវិធីសំខាន់របស់ជាតិដែរ។ កម្មវិធីខ្លះដូចជា ទិវាបុណ្យជាតិ ឬកម្មវិធីប្រគល់មេដាយ តែងមានវត្តមានថ្នាក់ដឹកនាំសំខាន់ទាំងនីតិបញ្ញត្តិ នីតិប្រតិបត្តិ និងតុលាការ។ ដូចនេះ សមាជិកសភាដែលទទួលបានការអញ្ជើញ ត្រូវតែបង្ហាញមុខ ព្រោះអវត្តមាន នឹងធ្វើឲ្យកៅអីរបស់ពួកគេទំនេរចោល ដែលរឿងនេះមិនល្អឡើយសម្រាប់មុខមាត់ពួកគេផ្ទាល់ ឬសូម្បីតែបក្សផង៕