ជាតិ
ទោះមានភ្លៀងធ្លាក់ច្រើនម៉ោង តែខេត្ត រតនគិរី ទទួលបានទេសចរជិត១ម៉ឺននាក់ នៅថ្ងៃទី១៩ សីហា រូបភាពពី លោក ង៉ែត ពិទូ ប្រធានមន្ទីរទេសចរណ៍ខេត្តរតនគិរី
× ខេត្តរតនគិរី ដែលស្ថិតនៅភាគឦសាន្តនៃប្រទេសកម្ពុជា ទទួលបានភ្ញៀវទេសចរចំនួន ៩ ៧០៤នាក់ នៅថ្ងៃទី១៩ សីហា ដែលជាថ្ងៃ៣ នៃពេលវេលាសម្រាកសងចូលឆ្នាំ បើទោះជាមានភ្លៀងធ្លាក់ក៏ដោយ។ នេះបើតាមរបាយការណ៍ស្ថិតិភ្ញៀវទេសចរប្រចាំសប្តាហ៍ របស់ខេត្តរតនគិរី។
របាយការណ៍ដដែលឲ្យដឹងលម្អិតថា ក្នុងចំណោមទាំងអស់ មានទេសចរជាតិចំនួន៩ ៦៨១នាក់ និងទេសចរអន្តរជាតិ ២៣នាក់។ ជាមួយនឹងការទទួលបានលំហូរទេសចរដ៏ច្រើន កន្លែងស្នាក់នៅ រួមមានសណ្ឋាគារ និងផ្ទះសំណាក់ប្រមាណ៩៥% ក្នុងចំណោមបន្ទប់ស្នាក់នៅសរុប ១ ១២៩ ត្រូវបានកក់។
រូបភាពពី លោក ង៉ែត ពិទូ ប្រធានមន្ទីរទេសចរណ៍ខេត្តរតនគិរី
លោក ង៉ែត ពិទូ ប្រធានមន្ទីរទេសចរណ៍ខេត្តរតនគិរី បានប្រាប់សារព័ត៌មានថ្មីៗ២៥ តាមទូរស័ព្ទបន្ថែមថា រមណីយដ្ឋានដែលសម្បូរទេសចរជាងគេ មានបឹងលំកុដ, បឹងយក្សឡោម ទឹកជ្រោះ៧ជាន់) និងទឹកធ្លាក់កាចាញជាដើម។ លោក ង៉ែត ពិទូ រៀបរាប់ដូច្នេះថា៖« ទេសចរទៅកម្សាន្តច្រើនជារមណីយដ្ឋាននៅជិតទីរួមខេត្ត ដែលមានទេសចរទៅកម្សាន្តច្រើនជាងគេគឺទី១ បឹងលំកុដ ទី២បឹងយក្សឡោម ទី៣ទឹកធ្លាក់អូស៊ិនលែរ៍(ទឹកជ្រោះ៧ជាន់) និងទី៤ទឹកធ្លាក់កាចាញ»។
ក្រៅពីតំបន់សក្តានុពលទេសចរណ៍ធម្មជាតិដែលនៅជិតទីរួមខេត្ត បណ្តាទីតាំងទេសចរដែលស្ថិតនៅតាមបណ្តាស្រុកនានានៃខេត្តរតនគិរី ក៏ទទួលបានទេសចរច្រើនដែរ។
ទោះជាយ៉ាងនេះក្តី លោក ង៉ែត ពិទូ បញ្ជាក់ថា កាលពីថ្ងៃទី១៩ សីហានោះ អាកាសធាតុនៅរតនគិរី មិនសូវជាអំណោយផលប៉ុន្មានឡើយ ដោយមានភ្លៀងធ្លាក់តាំងពីយប់ រហូតដល់ម៉ោង១១ថ្ងៃត្រង់។ សម្រាប់ប្រធានមន្ទីរទេសចរណ៍ខេត្តរូបនេះ បញ្ហាអាកាសធាតុ ក៏បានរារាំងដល់ដំណើរកម្សាន្តរបស់ប្រជាពលរដ្ឋខ្លះដែរ ដោយសារនៅតំបន់ខ្លះ ផ្លូវរអិលពិបាកធ្វើដំណើរ៕
រូបភាពពី លោក ង៉ែត ពិទូ ប្រធានមន្ទីរទេសចរណ៍ខេត្តរតនគិរី© រក្សាសិទ្ធិដោយ thmeythmey.com