ភាគច្រើន ដំណាំអំពៅ ត្រូវគេនិយមដាំនៅតាមតំបន់ដងទន្លេ ប៉ុន្តែគេក៏អាចដាំអំពៅ នៅតំបន់ដីខ្ពង់រាប ដីកោះ តាមជំរាលជើងភ្នំ លើដីក្រហម ឬដីខ្មៅបានដែរ។ នៅប្រទេសកម្ពុជា ប្រភេទដីដែលល្អសម្រាប់ដាំដុះដំណាំអំពៅ គឺដីល្បប់ល្បាយខ្សាច់ ដីច្រោះទឹកល្អ មិនជាំទឹក និងដីមានជីជាតិល្អ។ ចំពោះដី ដែលមានដែលមានក្រួសក្រហមច្រើន មិនសមស្របនឹងដំណាំអំពៅនោះទេ។ នេះបើតាមសៀវភៅបច្ចេកទេសកសិកម្មរបស់ក្រសួងកសិកម្ម រុក្ខាប្រមាញ់និងនេសាទ។
ដំណាំអំពៅ ជាប្រភេទដំណាំដែលទាមទារនូវបរិមាណទឹកគ្រប់គ្រាន់។ ទោះជាយ៉ាងនេះក្តី នៅរយៈពេល ២ ទៅ ៣ខែ មុនពេលប្រមូលផល ដំណាំនេះ មិនត្រូវការទឹកនោះទេ ដើម្បីរក្សារសជាតិផ្អែមមុតរបស់វា។ ប្រសិនបើសម្បូរទឹកនៅមុនប្រមូលផល អំពៅ នឹងលែងសូវផ្អែម។
ប្រជាកសិករនិយម ដាំអំពៅសម្រាប់គាបយកទឹក និងធ្វើជាស្ករ។ ភាគច្រើន គេដាំនៅតាមតំបន់ដងទន្លេ ប៉ុន្តែគេក៏អាចដាំអំពៅ នៅតំបន់ដីខ្ពង់រាប ដីកោះ តាមជំរាលជើងភ្នំ លើដីក្រហម ឬដីខ្មៅបានដែរ។ នេះបើតាមសៀវភៅបច្ចេកទេសកសិកម្មរបស់ក្រសួងកសិកម្ម រុក្ខាប្រមាញ់និងនេសាទ។
សម្រាប់កម្ពុជា ប្រភេទដីដែលល្អសម្រាប់ដាំដុះដំណាំអំពៅ គឺដីល្បប់ល្បាយខ្សាច់ ដីច្រោះទឹកល្អ មិនជាំទឹក និងដីមានជីជាតិល្អ។ ចំពោះដី ដែលមានដែលមានក្រួសក្រហមច្រើន មិនសមស្របនឹងដំណាំអំពៅនោះទេ។ ជាទូទៅការប្រមូលផលអំពៅ គេត្រូវធ្វើឡើងទៅតាមលក្ខខណ្ឌអាកាសធាតុ និងទីផ្សារ។ សម្រាប់អំពៅដែលដាំសម្រាប់គាបយកទឹក គេអាចប្រមូលផលនៅខែកញ្ញា និងសម្រាប់អំពៅដែលដាំសម្រាប់ធ្វើស្ករគេត្រូវប្រមូលផលអំឡុងខែ ធ្នូ និងមករា។
ដំណាំអំពៅប្រហាក់ប្រហែលដំណាំចម្ការផ្សេងៗ ជាទូទៅគេត្រូវភ្ជួរដី ២ ទៅ ៣ សារមុននឹងដាំំ។ បន្ទាប់ពីភ្ជួររួចលើកទី១ ត្រូវទុកដីហាលចោលប្រមាណ ១០ថ្ងៃសិន ចាំភ្ជួរលើកទី២។ សម្រាប់តំបន់ខ្ពង់រាបត្រូវភ្ជួរលើកទី១ ទុករយៈពេល ១ ទៅ ២ ខែមុនពេលដាំ។ ដោយឡែកវិធីដាំគេអាចបណ្ដុះកូនជាមុន ឬអាចដាក់កំណាត់ដើមដែលមានភ្នែកស្រាប់។ សម្រាប់កូនអំពៅដែលបណ្ដុះត្រូវស្រោចទឹកមួយថ្ងៃម្ដង និងទុករយៈពេល ១ខែទើបអាចយកទៅដាំបាន។
ថ្នាំងអំពៅដែលល្អសម្រាប់ធ្វើពូជ ត្រូវកាត់ជាកង់ៗ មាន ៣ ថ្នាំង និងភ្នែក ៣ ។ ដើមដែលយកធ្វើពូជ ត្រូវមានអាយុ ៧ខែ ទើបជាពូជដែលមានគុណភាពល្អ ហើយគេមិនគួរយកផ្នែកគល់ពេក និងចុងពេកដែរ ព្រោះអំពៅអាចមិនលូតលាស់ល្អ។ មុនពេលដាំត្រូវឆូតរង ឬគន្លងចន្លោះពី ០,៩០ម៉ែត្រ ទៅ ១,២០ម៉ែត្រ និងគម្លាតគុម្ពប្រមាណ ០,៥០ម៉ែត្រទៅ ០,៦០ម៉ែត្រ។
សម្រាប់ប្រទេសផ្សេង ភាគច្រើនពេលគេដាំនៅចំការធំៗ គេដាំម្ដងអាចប្រមូលផលបាន ៣ ទៅ ៤ដង ក្នុងរយៈពេល ៥ឆ្នាំ។ ប្រទេសជឿនលឿនខ្លះ ចំការអំពៅដែលមានអាយុពី ១០ឆ្នាំទៅ ១៥ឆ្នាំគេអាចប្រមូលផលពី ៨ដង ទៅ ១០ដង។ ដោយឡែកសម្រាប់កម្ពុជា កសិករដាំម្ដងប្រមូលផលតែប៉ុណ្ណោះ។
ការថែទាំជាកត្តាសំខាន់ដើម្បីឲ្យដំណាំអំពៅទទួលបានទិន្នផលល្អ។ ការថែទាំទាំងនោះមានដូចជាជម្រះស្មៅ ការដាក់ជី និងការដាក់ទឹកជាដើម។ អំពៅត្រូវការរយៈពេល ១១ខែ ទៅ១៣ខែ ទើបអាចប្រមួលផងបាន។ នេះបើតាមសៀវភៅបច្ចេកទេសកសិកម្មរបស់ក្រសួងកសិកម្ម រុក្ខាប្រមាញ់ និងនេសាទដដែល៕