ជាតិ
ខ្នងភ្នំគិរីរម្យ និងកសិទេសចរណ៍ ម៉ុង ឫទ្ធីសែនជ័យ សក្តានុពលទេសចរណ៍ដ៏ទាក់ទាញនៅកំពង់ស្ពឺ
× ភ្ញៀវទេសចរទៅលេងខេត្តកំពង់ស្ពឺ ចាប់ពីថ្ងៃទី ១៧-២០ ខែសីហា ឆ្នាំ២០២០ មានចំនួន ៣ម៉ឺននាក់ ក្នុងនោះមាន ២កន្លែងដែលមានអ្នកទេសចរទៅលេងច្រើនជាងគេគឺ ខ្នងភ្នំគិរីរម្យ និងតំបន់កសិទេសចរណ៍ ម៉ុង ឬទ្ធីសែនជ័យ។ នេះបើតាមលោក សៅ សារ៉ន ប្រធានមន្ទីទេសចរណ៍ខេត្តកំពង់ស្ពឺប្រាប់សារព័ត៌មានThmeyThmey25 តាមទូរសព្ទនៅថ្ងៃទី ២១ ខែសីហា ឆ្នាំ២០២០។
លោកបានបន្ថែមថា អំឡុងថ្ងៃឈប់សម្រាក កន្លែងទាំងពីរខាងលើក្នុងមួយថ្ងៃ ទទួលបានអ្នកទេសចរពី ២ ០០០ នាក់ ទៅ ៣ ០០០នាក់។ ដោយឡែក នៅភ្នំខ្នងផ្សារក្នុងមួយថ្ងៃមានអ្នកទេសចរ ១៥០នាក់ ទៅ ២០០នាក់ និងថ្ងៃចុងក្រោយ នៅខ្នងផ្សារមានទេសចរតិចតួច ដ្បិតថាជាកន្លែងកម្សាន្តបែបផ្សងព្រេង និងត្រូវធ្វើដំណើរដោយថ្មើជើង។
បញ្ហាបរិស្ថាន មិនចោទជាបញ្ហានោះទេ ទោះបីមានអ្នកទេសចរទៅលេងច្រើនក៏ដោយ។ អជ្ញាធរខេត្តបានចុះផ្សព្វផ្សាយជាប្រចាំ ហើយអ្នកទេសចរកាន់តែយល់ដឹងខ្ពស់ និងមានការទុកដាក់សំរាមបានត្រឹមត្រូវ។
ក្រៅពីតំបន់ទេសចរណ៍បែបធម្មជាតិដូចជា ភ្នំ ទឹកជ្រោះ កំពង់ស្ពឺក៏មានរមណីយដ្ឋានកែច្នៃច្រើន ដូចជា តំបន់កែច្នៃអូរសុំចត ក្បែរភ្នំគិរីរម្យ តំបន់កសិទេសចរណ៍ ម៉ុង ឬទ្ធីសែនជ័យ និងកន្លែងផ្សេងៗទៀត។
តាមរបាយការណ៍របស់ខេត្តកំពង់ស្ពឺមានតំបន់ទេសចរណ៍ចំនួន ១៣កន្លែង ក្នុងនោះ រមណីយដ្ឋានប្រវត្តិសាស្ត្រមាន ៤កន្លែង រមណីយដ្ឋានធម្មជាតិមាន ៨កន្លែង និងមានសារមន្ទីរនរៈបុរី ១កន្លែង។ ដោយឡែកតំបន់ទេសចរណ៍ផ្សងព្រេងមាន ២ទីតាំងគឺ ភ្នំឱរ៉ាល់ និង ភ្នំខ្នងផ្សារ។ ដោយឡែកសម្រាប់ឆ្នាំ២០១៩ មានភ្ញៀវទេសចរចំនួន ៣១៧ ៥៩១ នាក់៕
© រក្សាសិទ្ធិដោយ thmeythmey.com