ជាតិ
សង្គមជាតិ
សម្តេចសង្ឃ ទេព វង្ស ចុះខ្សោយព្រះសុខភាព ត្រូវបញ្ជូនទៅព្យាបាលនៅវៀតណាម សម្តេចសង្ឃ ទេព វង្ស យាងចែកព្រះរាជអំណោយ ដល់ប្រជាពលរដ្ឋប្រមាណ២០០គ្រួសារ ក្នុងភូមិកន្លែងជ្រៅ ឃុំក្របៅ ស្រុកកំចាយមារ ខេត្តព្រៃវែង កាលពីថ្ងៃទី១២ ខែកក្កដា ឆ្នាំ២០២០ (រូបពីគណនីហ្វេសប៊ុក Chea Somethy ជា សុមេធី)
× សម្តេចព្រះអគ្គមហាសង្ឃរាជាធិបតី ទេព វង្ស សម្តេចព្រះមហាសង្ឃរាជកម្ពុជា ត្រូវបានបញ្ជូនទៅសម្រាកព្យាបាលព្រះកាយនៅមន្ទីរពេទ្យវៀតណាម នាព្រឹកថ្ងៃទី២១ ខែសីហា ឆ្នាំ២០២០នេះ។ តាមរូបភាព ដែលបង្ហោះលើគណនីហ្វេសប៊ុក Preah Maha Mangalatthadipani គេ ឃើញសម្តេច ទេព វង្ស ផ្ទំលើគ្រែពេទ្យ ហើយត្រូវបានរុញចូលក្នុងរថយន្ត បញ្ជូនទៅវៀតណាម តាមច្រកព្រំដែនបាវិត។
សម្តេច ឃឹម សន ព្រះប្រធានលេខាធិការនៃលេខាធិការដ្ឋានគណៈសង្ឃនាយក ប្រាប់សារព័ត៌មានថ្មីៗ តាមទូរស័ព្ទថា សម្តេច ទេព វង្ស ផ្ទំលើគ្រែពេទ្យ ហើយត្រូវគេលើកដាក់ចូលរថយន្ត មិនមែនដោយសារសម្តេច យាងដើរមិនរួច ឬក៏បាត់ស្មារតីនោះទេ។ សម្តេច ឃឹម សន មានសង្ឃដីកាថា មុនយាងឡើងរថយន្ត សម្តេច ទេព វង្ស បានព្យួរសេរ៉ូមរួចទៅហើយ ដូច្នេះក្រុមគ្រូពេទ្យ តម្រូវឲ្យព្រះអង្គ សម្រាក (ផ្ទំ)។
សម្តេចសង្ឃ ទេព វង្ស ផ្ទំលើគ្រែពេទ្យ ហើយក្រុមគ្រូពេទ្យ លើកដាក់ក្នុងរថយន្ត បញ្ជូនទៅវៀតណាម (រូបពីគណនីហ្វេសប៊ុក Preah Maha Mangalatthadipani)
ព្រះប្រធានលេខាគណៈសង្ឃនាយក បញ្ជាក់ថា៖«លោក នៅមានបន្ទូលបាន។ ពេលរៀបចេញទៅ អាត្មាអីទៅសួរ លោក នៅមាន [បន្ទូល] ឆ្លើយលា ដូចអត់អីផង សុខភាពហ្នឹង...»។
សម្តេច ឃឹម សន បន្តថា ដោយសារតែព្រះសុខភាពហាក់ខ្សោយនិងទ្រុឌទ្រោម គួបផ្សំនឹងព្រះជន្មច្រើនផង ទើបមន្ត្រីសង្ឃ សម្រេចយាងសម្តេច ទេព វង្ស ទៅសម្រាកព្រះកាយនៅវៀតណាម។ ព្រះអង្គ មានសង្ឃដីកាថា៖«លោក គង់ [អង្គុយ] ចេះតែវិល [ព្រះភក្ត្រ]»។
សម្តេច ឃឹម សន លើកឡើងថា ចុងព្រះនេត្រម្ខាងរបស់សម្តេច ទេព វង្ស មានប្រជុយរាងធំ ហើយពេទ្យវៀតណាម ក៏តម្រូវឲ្យសម្តេច វះកាត់ប្រជុយនោះចេញ កាលពី៦ខែមុន។ សម្តេច ឃឹម សន អះអាងថា ក្រោយវះកាត់ប្រជុយរួច សម្តេច ទេព វង្ស ក៏បានជាសះស្បើយ ដោយមិនបានប៉ះពាល់ដល់ព្រះសុខភាពឡើយ ហើយការយាងទៅសម្រាកព្រះកាយនៅវៀតណាមលើកនេះ ក៏មិនមែនដោយសារបណ្តាលមកពីការវះកាត់នេះដែរ។
យ៉ាងណា សម្តេច ឃឹម សន មានថេរដីកាថា ដោយសារតែសម្តេច ទេព វង្ស មានព្រះជន្មច្រើន ដូច្នេះ ការវះកាត់ អាចធ្វើឲ្យសុខភាពចុះខ្សោយ។ សម្តេច មានថេរដីកាបន្ថែមថា ម្យ៉ាងទៀត ក្រោយវះកាត់រួច ពេទ្យវៀតណាម តម្រូវឲ្យសម្តេច ទេព វង្ស យាងទៅពិនិត្យព្រះសុខភាពម្តង ក្នុងរយៈពេល៦ខែ តែដោយសារការរាលត្បាតជំងឺកូវីដ-១៩ ទើបសម្តេច ទេព វង្ស ពន្យារដល់ទៅប្រមាណ២ខែ ក្នុងការយាងទៅពិនិត្យព្រះសុខភាពនៅវៀតណាម។
លើសនេះ សម្តេច ឃឹម សន មានសង្ឃដីកាថា ការចុះខ្សោយព្រះសុខភាព ប្រហែលជាមកពីសម្តេច ទេព វង្ស យាងទៅកាន់ទីឆ្ងាយ។ បើតាមសម្តេច ឃឹម សន ថ្មីៗនេះ សម្តេច ទេព វង្ស បានយាងទៅពីខេត្តសៀមរាប ហើយពេលយាងដល់កុដិវិញ ក៏ព្រះសុខភាពមិនទាន់មានបញ្ហាអ្វីដែរ រហូតដល់ព្រឹកថ្ងៃទី២០ ខែសីហា ឆ្នាំ២០២០ ដោយមើលទៅព្រះសុខភាព ចុះខ្សោយខ្លាំង ទើបមន្ត្រីសង្ឃ សម្រេចយាងសម្តេច ទៅវៀតណាម។
សព្វថ្ងៃ សម្តេច ទេព វង្ស មានព្រះជន្ម៨៩ព្រះវស្សា។ សម្តេច ទេព វង្ស ជាសម្តេចសង្ឃ ដែលមានឋានៈខ្ពស់ជាងគេ នៅកម្ពុជា៕
© រក្សាសិទ្ធិដោយ thmeythmey.com