ជាតិ
ខេត្តសៀមរាបនៅតែគោលដៅទេសចរណ៍នាំមុខគេនៅកម្ពុជា ប៉ុន្តែបន្តខ្សត់ភ្ញៀវបរទេស
× ភ្នំពេញ៖ ខេត្តសៀមរាប បានស្គាល់ភាពអ៊ូអសារជាថ្មី នៅក្នុងអំឡុងពេលឈប់សម្រាកជំនួសចូលឆ្នាំ ក្រោយភាពស្ងាត់ជ្រងំមួយរយៈធំ ដោយសារវិបត្តិជំងឺរាតត្បាតកូវីដ-១៩។ ខេត្តសៀមរាប បានឈរនៅលេខរៀងទី១ ជាខេត្តដែលបានទទួលស្វាគមន៍ភ្ញៀវទេសចរច្រើនជាងគេ កាលពីថ្ងៃទី២០ ខែសីហា តាមពីក្រោយដោយខេត្តជាប់សមុទ្រកែប និងកំពត។ ខេត្តបាត់ដំបង និងខេត្តព្រះសីហនុ ក៏បានស្វាគមន៍ទេសចរច្រើនជាង១ម៉ឺននាក់ដែរ នាថ្ងៃដដែលនោះ។
យោងតាមស្ថិតិទេសចរ ដែលផ្សាយដោយក្រសួងទេសចរ នៅថ្ងៃទី២០ ខែសីហា មានភ្ញៀវទេសចរ ចំនួន ៣៣៤ ៣៩១នាក់ បានដើរកម្សាន្ត នៅតាមបណ្តារមណីយដ្ឋាននានានៅទូទាំងប្រទេស។ ក្នុងចំណោមនោះ មានភ្ញៀវជាតិមានចំនួន ៣៣១ ៨៣៦នាក់ ទេសចរបរទេសចំនួន ២ ៥៥៥នាក់។
ស្ថិតិទេសចរដដែល បញ្ជាក់ថា ខេត្តសៀមរាប បានឈរនៅលេខរៀងទី១ ជាខេត្តដែលបានទទួលស្វាគមន៍ភ្ញៀវទេសចរច្រើនជាង គឺជាង ៤.៥ម៉ឺននាក់ ក្នងនោះទេសចរបរទេស ៣០១នាក់ ខណៈខេត្តកែប ស្ថិតនៅលេខរៀងទី២ ដែលមានទេសចរជាង ៣.៧ម៉ឺននាក់ បានទៅកម្សាន្ត។ ចំណែកខេត្តកំពត មានស្ថិតនៅលេខ៣ ដែលមានទេសចរជាង ៣.៥ម៉ឺននាក់។
ខេត្តបាត់ដំបង ក៏មានចំនួនទេសចរប្រហាក់ប្រហែលនឹងខេត្តកំពតដែរ គឺជិត៣.៥ម៉ឺននាក់។ ដោយឡែកមានខេត្តចំនួន៦ ដែលបានទទួលបានទេសចរច្រើនជាង ១ម៉ឺននាក់កាលពីថ្ងៃទី២០ សីហា ក្នុងនោះមាន ពោធិ៍សាត់,ព្រះវិហារ,កណ្តាល កោះកុង,រតនគិរី និងខេត្តកំពង់ឆ្នាំង។ នេះបើតាមស្ថិតិទេសចររបស់ក្រសួងទេសចរណ៍ដដែល ដោយបានឲ្យដឹងទៀតថា បណ្តាខេត្តផ្សេងទៀត គឺសុទ្ធតែទទួលបានទេសចរ ក្រោម១ម៉ឺននាក់ ខណៈដែលខេត្តឧត្តរមានជ័យ, បន្ទាយមានជ័យ,កំពង់ឆ្នាំង, ព្រៃវែង និងខេត្តស្វាយរៀង មិនមានកត់ត្រាវត្តមានទេសចរបរទេសទៅកម្សាន្តនោះទេ។
សូមជម្រាបថា រដ្ឋាភិបាលបានកំណត់ថ្ងៃឈប់សម្រាកសងថ្ងៃចូលឆ្នាំខ្មែរ រយៈពេល៥ថ្ងៃ គឺចាប់ពីថ្ងៃទី១៥ ដល់ថ្ងៃទី២១ សីហា ឆ្នាំ២០២០។ លោក តុប សុភ័ក អ្នកនាំពាក្យក្រសួងទេសចរណ៍ បានបញ្ជាក់ប្រាប់សារព័ត៌មានថ្មីៗកន្លងទៅថា មានរមណីយដ្ឋានទេសចរណ៍ចំនួន៥៥៧កន្លែង នៅទូទាំងរាជធានីខេត្ត បើកសេវាកម្មទទួលភ្ញៀវទេសចរជាតិ-អន្តរជាតិ ដោយគោរពតាមវិធានការណែនាំ របស់ក្រសួងសុខាភិបាល នាថ្ងៃឈប់សម្រាក៥ថ្ងៃនេះ។ តំបន់ទេសចរណ៍ទាំងនោះ មានតំបន់ទេសចរណ៍ធម្មជាតិ កែច្នៃ វប្បធម៌ និងប្រវត្តិសាស្ត្រចំនួន២៥៥កន្លែង, តំបន់ទេសចរណ៍ដែលមានសក្តានុពល តែមិនទាន់ចុះបញ្ជីនៅក្រសួងមានចំនួន២១៩កន្លែង, និងតំបន់ទេសចរណ៍បែបសហគមន៍មានចំនួន៨៣កន្លែង៕
© រក្សាសិទ្ធិដោយ thmeythmey.com