COVID-19
អន្តរជាតិ
ក្លាយជាបេក្ខជនប្រធានាធិបតីផ្លូវការ លោក បៃឌិន សន្យាបញ្ចប់ភាពខ្មៅងងឹតក្រោមការដឹកនាំរបស់លោក ត្រាំ
×![]()
ដោយ: តន ចាន់រិទ្ធារ៉ា
លោក ចូ បៃឌិន នៅថ្ងៃទី២០ ខែសីហា (ម៉ោងអាមេរិក) បានប្រកាសទទួលយកការតែងតាំងជាបេក្ខភាពប្រធានាធិបតីបក្សប្រជាធិបតេយ្យជាផ្លូវការ ជាមួយនឹងការសន្យាបញ្ចប់ភាពខ្មៅងងឹតនៅអាមេរិកក្រោមការដឹកនាំរបស់ប្រធានាធិបតី ដូណាល់ ត្រាំ ។ លោក បៃឌិន ក៏ប្ដេជ្ញាចិត្តដោះស្រាយវិបត្តិ COVID-19 ឲ្យបាន ខណៈអាមេរិកកំពុងឈរលេខមួយលើតារាងប្រទេសមានករណីឆ្លងច្រើនជាងគេ។
ថ្ងៃទី២០ ខែសីហា ជាថ្ងៃចុងក្រោយនៃសន្និបាតបក្សប្រជាធិបតេយ្យ។ សន្និបាតនេះ បញ្ចប់ទៅដោយការថ្លែងសុន្ទរកថាទទួលយកការតែងតាំងជាបេក្ខជនប្រធានាធិបតីតំណាងបក្សពីសំណាក់លោក ចូ បៃឌិន ។ លោក បៃឌិន បានរិះគន់ការដឹកនាំរបស់លោកប្រធានាធិបតី ដូណាល់ ត្រាំ ហើយសន្យាដឹកនាំអាមេរិកទៅរកភាពភ្លឺស្វាង និងការរួបរួមគ្នាឡើងវិញ។
«ប្រធានាធិបតីបច្ចុប្បន្ន គ្របដណ្ដប់អាមេរិកទៅដោយភាពងងឹតយូរពេកហើយ។ ប្រសិនបើអ្នកទុកចិត្តខ្ញុំជាមួយតំណែងប្រធានាធិបតី ខ្ញុំនឹងនាំយកអ្វីល្អបំផុតសម្រាប់យើងទាំងអស់គ្នា មិនមែនអ្វីដែលអាក្រក់ឡើយ។ ខ្ញុំជាមិត្តនៃពន្លឺ មិនមែនភាពខ្មៅងងឹតឡើយ។» លោក បៃឌិន និយាយបែបនេះក្នុងសុន្ទរកថាតាមប្រព័ន្ធអនឡាញពីស្រុកកំណើតក្នុងរដ្ឋ Delaware ហើយបន្តថា ដល់ពេលដែលប្រជាជនទាំងអស់រួបរួមគ្នា។
និយាយដល់រឿង COVID-19 វិញ លោក បៃឌិន ស្នើឲ្យប្រជាជនអាមេរិកដាក់ពិន័យលោក ត្រាំ តាមរយៈការបោះឆ្នោតទម្លាក់ពីតំណែងប្រធានាធិបតី។ នៅអាមេរិក COVID-19 បានសម្លាប់មនុស្សច្រើនជាង១៧ម៉ឺននាក់ ហើយសេដ្ឋកិច្ចប្រទេសក៏រងគ្រោះខ្លាំងដោយសារវិធានការបិទប្រទេស។ ក្នុងសុន្ទរកថា២២នាទី លោក បៃឌិន ហៅចំណាត់ការរបស់រដ្ឋបាលលោក ត្រាំ ជារឿងមិនអាចអត់ឱនឲ្យបានឡើយ ព្រោះអាមេរិកមានអ្នកស្លាប់ច្រើនជាងគេ។
នេះជាការប៉ុនប៉ងការលើកទីបីរបស់លោក បៃឌិន ក្នុងការប្រជែងតំណែងប្រធានាធិបតីអាមេរិក។ សម្រាប់យុទ្ធនាការឈានទៅកាន់ការបោះឆ្នោតថ្ងៃទី៣ ខែវិច្ឆិកា លោក បៃឌិន វ័យ៧៧ឆ្នាំ ធ្វើបានល្អជាងការព្យាយាមពីរលើកមុន ដោយធ្លាក់វគ្គជម្រុះផ្ទៃក្នុងបក្ស។
អតីតអនុប្រធានាធិបតីរបស់លោក បារ៉ាក់ អូបាម៉ា រូបនេះ ជ្រើសរើសលោកស្រី កាម៉ាឡា ហារីស ជាដៃគូសម្រាប់បេក្ខភាពអនុប្រធានាធិបតី។ លោកស្រី ហារីស រងបរាជ័យដោយសារលោក បៃឌិន ក្នុងការជម្រុះបេក្ខភាពផ្ទៃក្នុងបក្សដែរ៕
Tag:
អាមេរិក
ចូ បៃឌិន
ដូណាល់ ត្រាំ
© រក្សាសិទ្ធិដោយ thmeythmey.com
