បទ គោព័ទ្ធស្នឹង
 

ពូជអ្នកចម្បាំងខ្លាំងល្បាញល្បី

ល្បីក្នុងលោកីយ៍គេកោតក្រែង

ក្រែងកាលគ្រានោះព្រោះខ្លាំងស្តែង

ស្តែងស្តីសម្ញែងសម្តែងឫទ្ធិ។
 

ឫទ្ធិខ្លាំងញ៉ាំងកាយសប្បាយរស់

រស់មិនរង្គោះរង្គើពិត

ពិតបានពីរួមគ្នារិះគិត

គិតច្នៃប្រឌិតមិនបណ្តោយ។
 

ដោយសារបែកបាក់ដាក់ដុនដាប

ដាបដួលដេកក្រាបនាពេលក្រោយ

ក្រោយមកទ្រាំរស់ព្រោះគេឲ្យ

ឲ្យហេតុយើងខ្សោយហើយសង្កត់។
 

កត់កៀបរៀបកលច្របល់ជាន់

ជាន់ចៀរបំភាន់ឲ្យខ្មែរខ្សត់

ខ្សត់ខ្សោះកម្លាំងតាំងគេបត់

បត់បែបប្រាកដបន្តក់ទឹក។
 

ទឹកប្រស់យើងរស់ព្រោះឃើញផល

ផលគេបានដល់ដៀលលែងនឹក

នឹកអ្នកធ្លាប់ខ្លាំងគាំងដេកស្ពឹក

ស្ពឹកខ្លះខ្លាំងនឹកបំបែកជាតិ៕